ހަށިގަނޑަށް ބޭނުން ނުވާ ބޭކާރު މާއްދާތަށް (ވިހަ މާއްދާތައް) ހަށިގަނޑުން ބޭރުކުރުމުގައި ގުރުދާގެ (ކިޑްނީގެ) މަސައްކަތް ވަރަށް ބޮޑު. ގުރުދާއިން އިންސާނާގެ ލޭގެ ތެރޭގައި ދައުރުވާ މި ވިހަ މާއްދާތަށް ބޭރުކޮށްދެނީ ކުޑަކަމުދާ ތަކެތީގެ ޒަރިއްޔާއިން. އެ ވިހަ މާއްދާތަކުގެ ތެރޭގައި ހިމެނޭ އެންމެ ގިނަ ދެ މާއްދާ އަކީ ޔޫރިއާ އަދި ކްރިއޭޓިނިން ނަމަކަށް ކިޔާ ދެ މާއްދާ. ޔޫރިއާ އަކީ އިންސާނާގެ ހަށިގަނޑުގައި ހުންނަ ޕްރޮޓީންގެ މާއްދާ "ކުދިކުދިވެ" ބޭނުން ކުރެވުމުން އުފެދޭ މާއްދާއެއް. ކްރިއޭޓިނިން އަކީ މަސްތަކުގެ މަސައްކަތްތަކުގެ ސަބަބުން އުފެދޭ "ބައި ޕްރޮޑަކްޓެއް". ހަށިގަނޑުގައި ދައުރުވާ ލޭ، ގުރުދާގެ ތެރެއަށް ވަންނަނީ ދެ ލޭ ހޮޅިއަކުން. އެއީ ދެ "ރީނަލް އާރޓަރީ". އެއީ ކޮންމެ ގުރުދާ އަކަށް އެއް ރީނަލް އާރޓަރީ. އެހެނީ ކޮންމެ އިންސާނެއްގެ ހަށިގަނޑުގައިވެސް ވަނީ ދެ ގުރުދާ ލައްވާފަ. މި ލޭ ހޮޅި، ގުރުދާގެ ތެރޭއަށް ވަނުމަށްފަހު، އަފިއަފި ވެ ކުދި ކުދި ބައިވަރު ލޭ ހޮޅިތަކަކަށް ބަދަލުވޭ. ލޭ ސާފު ކޮށްދެނީ ގުރުދާގެ ތެރޭގައި ހުންނަ ކުދި ކުދި ގުނަން ތަކަކުން. މި ގުނަން ތަކަށް "ނެފްރޯންސް" އޭ ކިޔާ. މީގެ މިލިއަނެންހާ ގުނަން ކޮންމެ ގުރުދާއެއްގާ ވޭ. މިއީ ކުޑަ ނަމަވެސް އޭގެ މަސައްކަތް ވަރަށް ފުރިހަމަ ގުނަން ތަކެއް. މި ނެފްރޯންސް ތަކުގެ ތެރެއިން ލޭ ދައުރުވާ އިރު، ލޭގައި ހުންނަ ވިހަ މާއްދާތައް ނެފްރޯންތަކުގައި ހުންނަ "ޑަކްޓް" ތަކެއްގައި ޖަމާކުރޭ. މިކަމަށްވެސް އެކި މަރުހަލާތައް އެ ނެފްރޯންސް ތަކުގެ ތެރޭގައި ކަޑައްތު ކުރޭ. އެއަށްފަހު މަސާނާ އާއި ގުޅިފައިވާ ހޮޅިއަކުން އެ މާއްދާތައް މަސާނާއަށް އެޅޭ. އެ ހޮޅިއަށް "ޔުރެޓާރ" އޭ ކިޔާ. ކުޑަކަމުދާ ތަކެތި އުފެދުމުގައި ހަށިގަނޑުގައި ދައުރުވާ ފެނުގެ (ފުދި އިތުރުވާ) މިންވަރުވެސް ހިމެނޭ. އެގޮތުން ކުޑަކަމުދާ ތަކެތި ހަށިގަނޑުން ބޭރު ވުމުގެ ކުރީގައި ޖަމާވެފައި ހުންނާނީ މަސާނައިގަ. ގުރުދާއިން ލޭ ސާފުކުރުމުގައި މިދެންނެވި ނެފްރޯންސް ތަކުން ލޭގެ ތެރޭގައި ލޮނު ހުންނަ މިންވަރުވެސް ހަމަހަމަ ކޮށްދޭ. ލޭގެ ޕުރެސަރާ ލޮނާއި ހުރި ގުޅުން ގުޅުވައިދޭ ގުނަވަނަކީ ގުރުދާ. އަދި ސާފުވެގެން ނުކުންނަ ލޭތައް އަނެއްކާ ލޭގެ ތެރެއަށް ދައުރުވަނީ ކުދި ކުދި ލޭނާރުތަކުގެ އެހީގަ. މި ލޭނާރުތައް އެކުވެގެން ގުޅިފައިވާނީ ލޭ ހޮޅިއަކާ. އެއީ "ރީނަލް ވެއިން". މި ލޭ ހޮޅިން ސާފުކުރެވިފައިވާ ލޭތައް ހަށިގަނޑުގެ ތެރޭ ދައުރު ކޮށްދޭ.