އެކި ސަގާފަތްތަކުގައި ގަބޫލުކުރާ އެކި ކަންކަން ހުރޭ. އެގޮތުން ދޫންޏަކާއި ބެހޭ ތަފާތު ވާހަކައެއް ފާރިސް ކަރައިގައި ކިޔާ އުޅުނު. އަދި ކިޔަމުން ވެސް ދޭ. މިލިއުމަކީ އެއްވެސް ހާލެއްގައި އެ ގަބޫލުކުރުން ގަބޫލު ކުރުމަށާއި އެކަމަށް ތަރުހީބު ދިނުމުގެ މަގުސަދުގައި ލިޔާ ލިޔުމެއް ނޫން. އެހެނަސް ތަފާތު މައުލޫމާތަކަށް ވާތީ ހިއްސާކޮށްލުމުގެ މަގުސަދުގައި ލިޔެވޭ ލިޔުމެއް.

ފާރިސީ އާދަކާދައިގައި ހޯމާ ނުވަތަ ހުމަ ކިޔާދޫންޏެއް އުޅޭ. އެއީ އެބައިމީހުން ގަބޫލު ކުރަމުން އައި ގަބޫލު ކުރުމެއް. އެބައިމީހުން ގަބޫލުކުރާގޮތުގައި، މި ދޫންޏަކީ އެގޭ މުޅި ޙަޔާތް އިންސާނީ ލޮލަށް ފެންނަ ވަރަށްވުރެ މަތިން އުދުހުމުގައި ހޭދަކުރާ އެއްޗެއް. އަދި ދުވަހަކުވެސް ބިމުގައި ފައި ނުޖައްސާ. ބައެއް ގަބޫލުކުރުންތަކުގައި އެދޫނީގެ ފައެއް ނުހުރޭ.

ފީނިކްސްއާ ވައްތަރު ނުވަތަ ހަށިގަނޑުގެ މަތީބައި ބާޒެއްހެންވާ މިދޫނި އެހެން ދިރޭއެއްޗެއް ޝިކާރަކޮށް އޭގެ މަހެއް ނުކާނެ. އަކަމަކު ކައިއުޅެނީ މަރުވެފައިވާ ޖަނަވާރުގެ މުޅަމަސް. ހަށިގަނޑުގެ ތެރޭގައި ދެޖިންސުގެ ހިއްސުއެކުލެވޭ މިދޫނި ބިސްއަޅަނީ ވައިގެ ތެރޭގަ. ބިސް ވައިގެ ތެރެއިން ބިމަށް ވެއްޓުމުގެ ކުރިން ބިސްފީވެ އެއިން ޅަދޫނި ނުކުމެ އުދުހިގަނޭ. 

ފާރިސީ ގަބޫލުކުރުމުގައި މިދޫންޏަކީ އޯގާތެރި ދޫންޏެއް. ތިޔާގިކަމާއިވެސް ގުޅިފައިވާ މިދޫނީގެ ހިޔަނި އެޅިއްޖެނަމަ އެމީހަކު މުއްސަނދިވޭ. އަދި މުޅި އުމުރަށް އުފާވެރިކަން ގެނެސްދޭ. އަދި ބޮލުގައި ނުވަތަ ކޮނޑުގައި އިށީނދެއްޖެނަމަ އެމީހެއްގެ ނަމުގައި ރަސްކަމެއް ހިލޭ. މިދޫނީގެ ނަސީބު ހޯދަން ކިތަންމެ ބޭނުންވިނަމަވެސް، އެކަންހާސިލް ވުމަކީ ނާދިރު ކަމެއްކަމަށް ބުނޭ. އަދި އެދޫނި ދިރިހުއްޓާ އަތުލައިގަތުމަކީ ނުވާނެ ކަމެއް. ހަމަ އެގޮތަށް އެދޫނި މަރާލައިފިނަމަ އެމީހަކު ސާޅީސް ދުވަސްތެރޭގައި މަރުވާނެ ކަމަށް ބުނޭ.

މިއީ އެމީހުން ޒަމާނުއްސުރެ ކިޔަމުން އައި ވާހަކައެއް. މިހާރުވެސް އީރާނުގައި އެކަން ގަބޫލު ކުރާ ބަޔަކު އުޅޭ. ބައެއް މީހުން ބުނާގޮތުން އެއީ އެޒަމާނުގައި މަދުން ފެންނަ ވައްތަރެއްގެ ބާޒެއްކަމަށް ބުނޭ. ބާޒަކީ ވަރަށް މަތިން އުދުހޭ ދޫންޏެއް.