ޖަންގަލި ތަކުގައި ދިރިއުޅޭ ޖަނަވާރުންގެ ތެރެއިން ހަރުފައަކީ ނުރައްކާތެރި ޖަނަވާރުންގެ ތެރޭގައި ހިމެނޭ ޖަނަވާރެއް. ހަރުފައިގެ ދަތްތަކުގައި ވިހަ އެކުލެވޭއިރު، އެހެން ޖަނަވާރުތަކާއި ތަފާތު ދުލެއް ހަރުފައަށް ލިބިފައިވޭ. އެގޮތުން ހަރުފައިގެ ދުލާއި ބެހޭގޮތުން އަޖައިބުކުރަނިވި މައުލޫމާތުކޮޅެއް ހިއްސާކޮށްލާނަން. ހަރުފައިގެ ދުލަކީ، ހަމަލާދިނުމަށް ނުވަތަ ޝިކާރަކުރުމަށް ބޭނުންކުރާ ނުރައްކާތެރި ގުނަވަނެއް ނޫން. ހަރުފައިގެ ދޫ ބޭރަށް ނެރެނީ، ހަރުފައިގެ އަނގައިގެ މަތީތަލީގައިވާ ވަހުން މަޢުލޫމާތު ދެނެގަތުމުގެ ގާބިލުކަން ލިބިފައިވާ ގުނަވަނަށް (ޖެކޮބްސަންސް އޯގަން) މަޢުލޫމާތު ހޯދައިދިނުމަށްޓަކާ. ދޫ ބޭރަށް ނެރޭ ކޮންމެ ފަހަރަކު، ހަރުފައިގެ އަނގައިން، ކެމިކަލް ޕާރޓިކަލްތަކެއް ބޭރަށް ބުރުވާލާނެ. އަދި ދޫ އަނގައިގެ ތެރަށް އެނބުރި ވަންނައިރު، ދެބަޔަށްވާ ދުލުގެ ދެކޮޅު (ހަރުފައިގެ ދޫ އުފެދިފައިވަނީ ދެ ބަޔަކަށް)، ހުޅުވިފައިވާ ޖެކޮބްސަންސް ގުނަވަނުގެ ތެރަށް ކުޑަކޮށް ވައްދައިލާނެ. އެއަށްފަހު، މާހައުލުގައިވާ ޖަނަވާރުތަކުގެ ވަހާއި އެނޫންވެސް މަޢުލޫމާތުތައް ދެނެގަނެވޭ. އަދި މިހާހިސާބުން، ހަރުފަ ޢަމަލުކުރަންވީގޮތްވެސް ވިސްނަން ފަށާނެ. ހަރުފައިގެ ދުލުން ކޮށްދޭ މި ބޭނުންތެރި ކަންތަކަކީ ހަރުފައަށް އޭގޭ ޝިކާރަ ދެނެގަތުމަށް ވަރަށްވެސް ފަސޭހަ ވާނޭ ކަމެއް. އަދި އޭގެ ޝިކާރަ ފިލާ އޮތަސް، މި ދުލުގެ ބޭނުން ކޮށްގެން އެސޮރު ދެނެގަނެވޭނެ.