ކުޑަ އަކީ އަވިބާރު ދުވަސް ދުވަހުގައްޔާއި ވާރޭ ވެހޭ ދުވަސްދުވަހު ހިޔާވުމުގެ ގޮތުން ބޭނުން ކުރާއެއްޗެއް. މިއަދު ކުޑައަކީ ކޮންމެ މީހަކުވެސް އޭގެ ބޭނުން ކުރާ އެއްޗެއް. އަންހެނަކަސް ފިރިހެނަކަސް، ކުޑަކުއްޖަކަސް ބޮޑު މީހަކަށް ވިޔަސް ކުޑަ ބޭނުން ކުރޭ. އަދި ކުޑައިގެ އެކި ސައިޒުތައް އުފައްދާފައި ހުރޭ. މޮޅެތި އެކި ޑިޒައިންތަކުގެ ކުޑަ ހުރޭ. އަންހެނުންނަށް ހާއްސަ ކުޑަ އާއި ފިރިހެނުންނަށް ހާއްސަ ކުޑަ ހުރޭ. މިއަދު ކަން އޮތީ މިހެެންކަމުގައި ވީނަމަވެސް 18 ވަނަ ގަރުނުގެ ކުރީކޮޅާއި އަދި އޭގެ ކުރީ ދުވަސްވަރުގައި ކުޑައިގެ އެކި ސައިޒު ތަކާއި ތަފާތު ކުލަތަކާއި ޑިޒައިންތަކެއް ނުހުރޭ. އެ ދުވަސްވަރު ކުޑަ ނަގާ އުޅުމުގައި ވަކި އުމުރެއް އޮވޭ. އަދި ވަކި ޖިންސެއް އޮވޭ. ތިޔަ ބޭފުޅުންނަށް ގަބޫލު ކުރެވެނީ އެއީ ކޮން ޖިންސެއްގެ ބަޔަކު ކޮށް އުޅުނު ކަމެއް ކަމައްތޯ؟ ކުޑަ އުފެދިގެން އައީ އަވިން އިންސާނާގެ ހަންގަނޑު ސަލާމަތް ކުރުމުގެ މަގުސަދުގައި ކަމަށް ބުނެވޭ. އެގޮތުން އެންމެ ފުރަތަމަ ކުޑަ އަޅާ އުޅުނީ އަންހެނުން. ހަމަ އެކަނި އަންހެނުން. އަންހެން ކުޑަކުދިންނެއްވެސް ކުޑައެއް ނާޅާ. ސަބަބަކަށް ވެފައި އޮންނަނީ އެމީހުންގެ ހަންގަނޑުގެ ކުލަ ބަދަލުވިޔަ ނުދިނުމާއި ހަންގަނޑަށް ގެއްލުމެއް ވިޔަ ނުދިނުމަށް. އެޒަމާނުގައި އަންހެނުން ކުޑަ ނަގާ އުޅެނީ ޒީނަތްތެރި ވުމުގެ ގޮތުން ކުރާކަމެއްގެ ގޮތުގައި. އަދި ޒީނަތްތެރި ވުމަށް ބޭނުންކުރާ ސާމާނުގެ ލިސްޓުގައި އެޒަމާނުގައި ކުޑަ ހިމަނާފައި ވާކަމަށް ބުނެވޭ. އެޒަމާނުގައި އޮތް މި އާދަ ބަދަލުކޮށްދިނީ 18 ވަނަ ގަރުނުގެ މެދުތެރޭ އުޅުނު މަޝްހޫރު މީހެއް ކަމަށްވާ ޖޯނަސް ހަންވޭ ނަމަކަށް ކިޔާ ފިރިހެނެއް. އޭނާ ވަނީ ހަފްލާތަކަށާއި އާންމު އިޖްތިމާއީ ސަރަހައްދުތަކަށް ދާއިރު ކުޑަ އަޅައިގެން ގޮސް އުޅެފައި. އޭގެ ފަހުން މިހާރު ކުޑައަކީ ވަކި އުމުރެއް އަދި ވަކި ޖިންސެއް ނެތި އެންމެން ބޭނުން ކުރާ އެއްޗެއް.