ބޮނޑުގެ އާއިލާ އަކީ ބޮޑު އާއިލާއެއް. އެކި ވައްތަރުގެ ބޮނޑު ދުނިޔޭގައި އުޅޭ. މިއިން ކޮންމެ ވައްތަރެއްގެ ބޮނޑަކަށްވެސް އެއަށް ހާއްސަވެގެންވާ ސިފަތަކަކާއި ތަފާތު ނިޒާމުތަކެއް ވޭ. އޮގޮތުން އެމެރިކަން ހޯންޑް ލިޒާޑް ނަމުން ނަންދެވިފައިވާ މި ބޮނޑުގައި އާދަޔާ ހިލާފު ސިފަތަކެއްވޭ. އަދި އާދަޔާ ހިލާފު ނިޒާމެއްވެސް ފުރިހަމަ ވެފައިވޭ. މިބޮނޑަށް ހޯންޑް ލިޒާޑް އޭ ކިޔުނީ މި ބޮނޑުގެ ބޮލާއި ދިމާލުން މަތީގައި ދެ ދަޅު ފާޑަކަށް ސިފަވާ ދެ ތަންކޮޅު ހުންނާތީ. ބަލާ ބެލުމަށް މިއީ ބިރުވެރި ސިފައެއް ޖަހާ ބޮނޑެއް. ހަގީގަތުގައިވެސް މިއީ ބިރުވެރި ބޮނޑެއް. މި ބޮނޑަށް އެއްވެސް ނުރައްކަލެއް ކުރިމަތިވާނަމަ، މި ނުރައްކަލުން ސަލާމަތް ވުމަށް މި ބޮނޑުގައި ހާއްސަ ނިޒާމެއް ލައްވާފައިވޭ. މި ބޮނޑުގެ ދެލޮލުން ލޭ ފޮނުވައިލާ. މިކަމުގެ ސަބަބުން އެ ބޮނޑު ޝިކާރަ ކުރަން އަންނަ ޖަނަވާރު ޖެހިލުންވޭ. އަދި ބިރުން ދުރަށްދޭ.

މި ބޮނޑުގެ ލޮލުގައި ހުންނަ އޮކްލިއާ ސައިނަސް ނަމަކަށް ކިޔާ ގުލޭންޑެއްގައި ލޭތައް ޖަމާވެފައި ހުރޭ. އެސޮރުގެ ސިކުނޑިން ފޮނުވާ، މެސެޖެެއްގެ ސަބަބުން މި ގުލޭންޑުގެ މަސްތައް ކޮންޓްރެކްޓްވޭ. ނުވަތަ މަސްތަކަށް ބާރުލިބި، ކުރުގެޅޭ ގޮތްވޭ. ނަތީޖާއަކީ އެ ގުލޭންޑުގައި ހުންނަ ލޭތައް ބާރު ޕުރެސަރުގައި ލޮލުން ބޭރުކޮށްލުން.

މާތް ﷲ މި ބޮނޑަށް ދެއްވާފައިމިވާ އާދަޔާ ހިލާފު ނިޒާމުގެ ސަބަބުން، އެ ސޮރަށް ހަމަލާދޭން އަންނަ ޖަނަވާރުންގެ ކިބައިން އެސޮރު ސަލާމަތްކޮށްދޭ.