މަސްތުވާތަކެތީގެ ބާވަތެއް ކަމައްވާ "މެތް" އަކީ ކޮބާ؟ މެތް ނުވަތަ މެތަމްފެޓަމައިން އަކީ ވަރަށް ބާރުގަދަ އަދި އެއަށް ދެވި ހިފާ މަސްތުވާ އެއްޗެއް ނުވަތަ ބޭހެއް. މެތް އަކީ އޭގެ ބޭނުން ކުރުމުން ސިކުނޑީގެ ހިނގުމަށް ބަދަލު ގެނުވާ އެއްޗެއް. ޢާންމު ގޮތެއްގައި މެތް ހުންނަނީ އަލި ބިއްލޫރި ގޮތަށް. ބައެއްފަހަރަށް އެއަށް އައިސް ނުވަތަ ބިއްލޫރިއޭ ކިޔާ. މިއީ އެތަކެތި ބޭނުން ކުރާ މީހުންގެ މެދުގައި އާންމު ނަންތަކެއް. މަސްތުވާތެކި ބޭނުން ކުރާ މީހުން މެތް ބޭނުން ކުރަނީ ވަސްބަލައިގެން ނުވަތަ ދިރުވާލައިގެން ނުވަތަ ނާރުގެ ތެރެއަށް ފޮނުވާލައިގެން. ބުނެވޭ ގޮތުގައި މެތް ބޭނުން ކުރާ މީހުން ބޭނުން ކުރަނީ އެ ތަކެތި ބޭނުން ކުރުމުން އެމީހުން އެބުނާ "ވަގުތީ ހިތްހަމަޖެހުމެއް" ހޯދުމަށް. މެތް އަކީ އިންސާނުންގެ އަތްތަކުން ހަދާ އެއްޗެއް. މެތް އުފައްދާތާ އެތައް އަހަރެއް ވަނީ ވެފަ. ބުނެވޭ ގޮތުގައި ދެވަނަ ބޮޑުހަނގުރާމައިގައި ހަނގުރާމަވެރިން ހޭލާ ބެހެއްޓުމަށް މެތް ބޭނުން ކޮށްފައިވޭ. ހާސްވެ ނުތަނަވަސްވާ މީހުންވެސް މެތް ބޭނުން ކުރޭ. ވަގުތީ އުފަލެއް ލިބުނު ނަމަވެސް މިއީ ބޭނުން ކުރަން ހެޔޮވާ ވަރުގެ އެއްޗެއް ނޫން. މެތް ބޭނުން ކުރުމަކީ ގާނޫނީ ގޮތުން ބޮޑު ކުށެއް. ބޭސް ވެރިކަމުގައި މެތް ބޭނުން ކުރަނީ އެންމެ ދެ ބޭހެއްގައި. އެއީ ބަރުދަން ލުއިކުރުމަށްދޭ ބޭހެއްގަ އާއި ނަފްސާނީ ބައްޔަކަށް ފަރުވާކުރާ ބޭހެއްގައި. މި ދެ ބޭހުގައިވެސް މެތް އެކުލެވިގެންވަނީ ވަރަށް ކުޑަ މިންވަރަކަށް. އަދި މި ދެ ބޭހަކީ ޑަކްޓަރުގެ ހުއްދަ އާއި ނުލާ ލިބެންވެސް ހުންނަ ބޭސް ތަކެއް ނޫން. މެތް އުފެއްދުމަކީ ވަކި ހާއްސަ މެޝިނަރީތަކެއް ބޭނުން ކޮށްގެން ކުރާކަމެއް. މިއީ ވަރަށް ނުރައްކާތެރިކަމެއް. އޭގައި ބޭނުން ކުރާ ކެމިކަލްތަކުގެ ސަބަބުން ބޮޑެތި ގޮވުންތައް ގޮވާފައިވެސް އެބަހުރި. މެތް ބޭނުން ކުރާ މީހާ މެތް ބޭނުން ކުރުމުން އޭނާގެ ސިކުނޑީގައި ޑޮޕަމިން ނަމަކަށް ކިޔާ ކެމިކަލް އެއް ކުއްލި ގޮތަކަށް ގިނަވޭ. އޭގެ ސަބަބުން ސިކުނޑީގައި ހިނގާ އެހެން ހުރިހާ މެސެޖުތަކަކަށް ބުރޫ އަރާ އެހެން ހިއްސުތައް ދެނެގަތުމުން މީހާ ބަރީއަކޮށްލާ. މެތް ބޭނުން ކުރާ މީހުން ބުނާގޮތުގައި މިއީ އެމީހުން އެބުނާ ހިތްހަމަ ޖެހޭ ވަގުތު ކޮޅު. މެތް ބޭނުން ކުރުމަކީ ދެވި ހިފާ ކަމެއް. އެކަން އެހެން ވަނީ ސިކުނޑިން ދޭ މެސެޖުތަކެއްގެ ސަބަބުން. ދެވި ހިފައިފި ނަމަ ހުއްޓާލުމަކީ އުނދަގޫ ކަމެއް. އަދި ބޭނުންވާ މިންވަރު އިތުރުވުމަށް އެދެވޭ ކަމެއް. މީގެ ސަބަބުން ސިއްހީ އެތައް ގެއްލުން ތަކެއް ލިބޭ. މެތް ބޭނުން ކުރާ މީހެއްގެ ހަށިގަނޑުގެ ފިނިހޫނުމިން މަތިކޮށްލާ، ބައެއްފަހަރު މައިތިރި ނުވެ ފިޓު ޖެހޭގޮތްވޭ، އަދި އަނެއްބައިފަހަރު މީހާ ޝޮކަކަށް ގޮސް މަރުވެސް ވޭ. މެތް ގެ ބާރުގަދަ ކަމުން މީހާ މޮޔަކޮށްލާ. ބުއްދި ފިލުވާލާ. ވާނުވާ އޮޅުވާލާ. ދުރު މުސްތަގުބަލުގައި މީހާ ހާސްކަމެއްގެ ތެރެއަށް ވައްޓާލާ. މެތް ބޭނުން ކުރުމަކީ މީހާގެ ދަތްތައް ކަޅުވެ، އަނގަ ހިކޭ ކަމެއް. އަދި ހަންގަނޑުގެ ވާންކެނޑި ރޫ ޖެހޭ ކަމެއް. ހަށިގަނޑުގައި ހުންނަ ވަކި ހާއްސަ ދުލިފައްތަކަށް އަސަރު ކުރުވާ ކަމެއް. އެގޮތުން ލޭހޮޅިތަކުގެ އެތެރޭގައި ލެވިފައިވާ ދުލިފަށަކީ އޭގެ ގެއްލުން ލިބޭ އެއް ދުލިފަށް. މެތް ބޭނުން ކުރަނީ އިންޖެކްޓްކޮށްގެން ކަމަށްވާނަމަ، ބޮޑެތި ނަޖިސް ބަލިތައް ޖެހުމުގެ ފުރުސަތު ބޮޑުވޭ. އެގޮތުން އެއިޑްސް ފަދަ ނުރައްކާތެރި ބަލިތައް ހިމެނޭ. ދުރު މުސްތަގުބަލުގައި ޖިންސީ އެދުމުގެ ބާރު ދަށްވެ ޖިންސީ ގުނަން ތަކުގެ މަސައްކަތް ހުއްޓޭ ގޮތްވޭ. މެތް އަކީ "ސަޅި" އެއްޗެއް ކަމަށް ބަޔަކު ދެކުނަސް، ހަގީގަތަކީ އެއީ "ނަޖިސް" އެއްޗެއް. އިސްލާމްދީނުގައި ކަމެއް މަނާ ކުރައްވާފައި ވާނަމަ އޭގެ ކޮންމެ ކަމެއްގެ ފަހަތުގައި ބޮޑެތި ހިކުމަތްތަކެއްވޭ. އިންސާނުންނަށް އޮތީ ބުއްދި އިސްކޮށް ހަރާމްކުރެއްވި ކަންކަމުން ދުރުހެލިވުން.