ދުނިޔޭގެ ޖަންގަލި ތަކުގައި އާދަޔާ ހިލާފު ގަސްގަހާގެހި ހެދިފައި ހުރޭ. އޭގެ ތެރެއިން ވީނަސް ފްލައި ޓްރެޕް ނަމަކަށް ކިޔާ މި ގަހަކީ، ކުދި ސޫފި ޝިކާރަކޮށް ކައިގެން އުޅޭ ގަހެއް. މިގަސް ހެދިފައި ހުންނަނީ ބިންގަނޑުގެ އެސިޑިޓީ މަތި ބިންތަކުގައި. އަދި އެހާގިނަ ކާނާ ވެސް ނުހުންނަ ބިންތަކުގައި. މި ގަހަށް ބޭނުންވާ ގިނަ ކާނާ، ނުވަތަ ނިއުޓްރިއެންޓްސް ހޯދަނީ ކުދި ސޫފި ޝިކާރަކޮށްގެން. މި ގަހުގެ އަފި ތަކުގެ ކޮޅުގައި މަލެއް ފާޑު އެއްޗެއް ވޭ. ދެ ފިޔަން ފަތްގަނޑެއްހެން ހުންނަ ދެ ފަތް މީގައި ވޭ. އެ ދެފަތުގެ ތުންފަތުގައި ކަށިތަކެއް ފާޑު އެއްޗެއް ހުރޭ. އަދި ދެ ފަތުގެ އެތެރޭގައި ކުދިކުދި އިސްތަށިތަކެއް ކަހަލަ އެތިކޮޅު ތަކެއް ހުރޭ. އަދި ޒާތެއްގެ މަޑު ތެތް ކަމެއް ނުވަތަ ލޮނދިކަމެއް ހުރޭ. އޭގައި މަޑު ވަހެއްވެސް ހުރޭ. ދިރޭ ސޫފާސޫފި އެ ވަހުގެ ޝައުގުވެެރިކަމުގައި އެ ފަތަށް ތިރިކުރޭ. އަދި އެ ދެފަތުގެ ދޭތެރެއަށް ފައިބާ. މިގޮތަށް ފައިބައިގެން އުޅޭ އުޅުމުގައި އިސްވެ ދެންނެވުނު އިސްތަށިތަކެއް ފާޑު އެތިކޮޅު ތަކުގައި ސޫފި ބީހުމުން، އެ ދެ ފަތް ލެއްޕޭ. މިގޮތަށް ލެއްޕުމުން، އެ ދެ ފަތުގެ ތެރޭގައި އެ ސޫފިތާށިވޭ. ދެން އެ ދެފަތުގެ ތެރެއިން ދިޔަވަރެއް އުފެދެން ފަށާ، މި ދިޔަވަރުގެ ތެރޭގައި ސޫފި މަރުވެ ހަޖަމުވާން ފަށާ. އަދި އޭގައި ހުރި ފައިދާތައް މި ދެފަތުގެ ތެރެއިން ގަހުގެ ތެރެއަށް ދަމާލާ. އެއަށް ފަހު އެ ސޫފި ހަޖަމު ކުރުމަށްފަހު އެ ދެ ފަތް ހުޅުވޭ. މިގޮތަށް ހުޅުވޭއިރު، އެ ސޫފިން ހަޖަމު ނުވެ އޮންނަ ބައި އޭގެ ތެރޭގައި އޮވޭ. ގިނަ ވަގުތު ވާވަރަކުން ވަޔާއި އެކު އަންނަ ކުދި ކުދި ހަރަކާތްތަކާއެކު އެ ބައި ފަތުގެ ތެރެއިން ބޭރަށް ވެއްޓޭ. މިގޮތަށް އާންމުގޮތެއްގައި މި ގަހުގެ ޝިކާރަ އަކަށް ވަނީ ހިންޏާއި، މެއްސާއި، މަސްކާށި ދޫންނާއި ފައިދިގު މަކުނު. މީގެ އިތުރުންވެސް ކިތަންމެ ސުއިއްޕެއް މި ގަހުގެ ޝިކާރަ އަކަށްވޭ. މިހާރު މިގަހަކީ ދުނިޔެއިން ނެތި ދިޔުމުގެ ބިރު ހީވެ، ހިމާތް ކޮށްފައިވާ ބާވަތެއް.