ދުނިޔޭގެ ބިމުގައިވާ ޖަވާހިރުތަކުގެ ތެރެއިން އެންމެ އަގުބޮޑު ޖަވާހިރުތަކުގެ ލިސްޓުގައި ހީރާ ނުވަތަ އަލިމަސް ހިމެނޭ. މިއަށް އިނގިރޭސި ބަހުން ޑައިމަންޑޭ ކިޔާ. އަލިމަހަކީ ބިމުގެ 90 އާއި 120 މޭލު ފުނުގައި ނުވަތަ އަޑީގައި ހުންނަ ޖަވާހިރެއް. މި ޖަވާހިރު ބިމުގެ މަތީ ހިސާބުތަކަށް ފޯރަނީ އަލިފާން ފަރުބަދަތައް ގޮވާ އޭގެން އަރާ ދިޔަ އަލިފާނާއެކު މައްޗަށް އަރައިގެން. އަލިމަހަކީ ދުނިޔޭގެ ބިމުގައިވާ އެންމެ ހަރު ނުވަތަ ވަރުގަދަ މައުދަން. އަލިމަހުގައި ކޫރުމެއްވެސް އަޅާލެވޭނީ ހަމަ އަލިމަހަކުން. އަލިމަސް ވިރުވުމަށްޓަކައި 3547 ޑިގްރީ ސެލްސިއަސްގެ ހޫނުމިން ބޭނުންވޭ. އަލިމަހުގައި ހުންނަ ޗެމިކަލް ކޮންޕައުންޑަކީ ކާބަން. ހަމަ އެކަނި ކާބަން. ބިމުގެ އެހާ އަޑީގައި ހުންނަ ކާބަންގެ މޮލިކިއުލްތަކަށް އަންނަ ގުދުރަތީ ބަދެއްގެ ސަބަބުން މި މޮލިކިއުލްތައް އެކުވެ ޖަމާވޭ. އަދި އެކަތިގަނޑަކަށް ވާން ފަށާ. އެހިސާބުން އަލިމަސް އުފެދެން ފަށާ. އަލިމަހުގައި އިތުރު އެހެން ކެމިލަކް ކޮންޕައުންޑެއް ނުހުންނަކަމަށް ސައިންސުވެރިން ބުނޭ. އެންމެ ފުރަތަމަ އަލިމަހެއް ފެނިފައިވަނީ އިންޑިޔާއިން ކަމަށް ބުނެވޭ. ނަމަވެސް އެންމެ ގިނައިން އަލިމަސް ފެނިފައިވަނީ ބްރެޒިލް އިން.