ކަންފަތު ތޫރި ފަޅައިގެން ދާ ވާހަކައަކީ ދިވެހިންގެ ތެރޭގައި އާންމު ވާހަކައެއް. މިހެން ބުނެ އުޅެނީ މި ތޫރި ފަޅައިގެން ގޮސްގެނެއް ނޫން. ނަމަވެސް ބާރު އަޑެއް ނުވަތަ މީހަކު ބާރަށް ހަޅޭއްލަވާ ނަމަ އެފަދައިން ބުނެ އުޅޭ. މިބުނާ ފަޅައިގެން ދާ ތޫރި އަކީ ކޮބާ؟ ކަންފަތް އުފެދިފައި ހުންނަ ގޮތުން ބޭރު ކަންފަތަކާއި މެދު ކަންފަތަކާއި އެތެރެ ކަންފަތެއް ވޭ. ބޭރު ކަންފަތަކީ ބޭރަށް ފެންނަން މިހުންނަ ބައި. ކަފަ ބުރުން ސާފު ކުރާ ބަޔަކީ މެދު ކަންފަތް. އެތެރެ ކަންފަތަކީ ބޮލުގެ ތެރޭގައި އިންނަ ބައި. މި ދެންނެވި އެތެރެ ކަންފަތާއި މެދު ކަންފަތް ވަކިކޮށްދޭ ފަރުދާ އަކީ ތޫރި. މިއަށް އިއަރ ޑްރަމް އޭ ނުވަތަ ޓިމްޕެނިކް މެންބްރޭންއޭ ކިޔާ. ތޫރި އުފެދިފައި ހުންނަނީ ވަރަށް ތުނި މަސްތަކަކަކުން. މިފަދަ މަސްތަކަށް ސްމޫތް މަސަލްސް އޭ ކިޔާ. މި ތުނި މަސްކޮޅުގެ ދެފަރާތުން ހަން އަރާފައި ހުރޭ. ތޫރީގެ ތުނިކަމުން އެއަށް ދުލިފަށެކޭވެސް ކިޔާ. ކަންފަތަށް ވަދެގެން އަންނަ އަޑު އެންމެ ފުރަތަމަ ޖެހޭނީ ތޫރީގައި. އެއާއި އެކު ތޫރިއަށް ގުޑުންތަކެއް އާދޭ. މި ގުޑުމުގެ ސަބަބުން އެތެރެ ކަންފަތުގައި ހުންނަ ކުދި ކަށިތަކަކަށް މި ގުޑުން ވާރުތަކުރޭ. މި ކުދި ކަށިކޮޅުތަކުގެ ތިން ކަށިކޮޅުވޭ. އެތަނުން އެއް ކަށިކޮޅު ތޫރީގައި ޖެހިފައި ހުރޭ.

ދިވެހިން މިބުނާ ފަދައިން ބާރުގަދަ އަޑެއް އިވުމުން ތޫރިއަށް އަންނަ މި ގުޑުމަކީ އާދަޔާ ހިލާފު ގަދަ ގުޑުމެއް ނަމަ ތޫރި ފަޅައިގެން ދިއުމުގެ ފުރުސަތު އޮވޭ. ތޫރިއަށް ލިބޭ ކުދި ކުދި ގެއްލުން ތަކަކީ އޭގެ އަމިއްލަ ޒާތަށް ރަނގަޅުވާ ކަންކަން. ކަންފަތަށް އެޅޭފެން އެތެރެ ކަންފަތަށް ނުދީ ހިފަހައްޓައިދޭ ހުރަހަކީވެސް މި ތޫރި. ކަންފަތުގައި އިންފެކްޝަން އަށަގަތުމަކީ މި ތޫރި އިންފެކްޓުވުން ނުވަތަ މެދުކަންފަތުގައި ޖަރާސީމު އަށަގަތުން. ތޫރީގައި ގިނަ އަދަދަކަށް ހިއްސު ދެނެގަންނަ ނާރު ހުރޭ. ނަތީޖާއަކީ އަޑު އިވެން ފަސޭހަވުން. ހަމަ އެއާއި އެކު ތޫރިއަށް ކުޑަ ނަމަވެސް ގެއްލުމެއް ލިބިއްޖެނަމަ ވަރަށް ގަދައަށް ވޭންވެސް އަޅާނެ. އެހެނީ ތަދުގެ ހިއްސަށްވެސް މި ނާރުތަކުގެ "ހީލި" ގަދަ ވާނެތީ.