އިންސާނުންގެ ހަށިގަނޑަށް އެއްވެސް ކަހަލަ ހާނިކައެއް، އަނިޔާއެއް ނުވަތަ ގެއްލުމެއް ލިބުމުން ނުވަތަ ހަށިގަނޑުގައި ކަމެއް ގޯސްކޮށް ހިނގާނަމަ އިންސާނާއަށް ތަދު އިހުސާސްކުރެވޭ. ހަށިގަނޑުގައި ހުންނަ ހިއްސު ދެނެގަންނަ ނާރުތަކުން މިއިން ކޮންމެ ކަމެއް ދިމާވުމުން އިންސާނާގެ ސިކުނޑިއަށް އެތައް ބައިވަރު މެސެޖެއް ފޮނުވާނެ. އެތައް ބައިވަރު އިހުސާސްތަކެއް ކުރުވާނެ. މި މެސެޖުތަކުގެ ނަތީޖާއަކީ އިންސާނާއަަސް ތަދު އިހުސާސް ކުރެވުން. 

މި އިހުސާސުގައި އިންސާނާ އަމަލު ކުރާނޭ ގޮތް ބުނެދެނީ އެ ތަދެއްގެ އިހުސާސް ސިކުނޑިއާއި ހިސާބަށް ފޮނުވައިދޭ ނާރެއްގެ ގޮތުން. އިންސާނާއަށް ވާ އަނިޔާއަކުން ނުވަތަ ކުރެވޭ ވޭނީ އިހުސާސަކުން ކުއްލިއަކަށް އަވަހަށް ހަރަކާތްތެރިވެވޭ މަންޒަރު ފެނޭ. މިސާލަކަށް ހޫނު އެއްޗެއްގައި އަތް ލެވުމުން ކުއްލިއަކަށް އަތް ދަމައިގަނެވޭ. އެހާލަތުގައި އަތް ދަމައިގަންނާނީތޯ ނުވަތަ ނޫންތޯ ވިސްނުމުގައި އިންސާނާގެ ބާރެއް ނުފޯރާ. އެ އަނިޔާ ނުވަތަ ގެއްލުމުން އިންސާނާ ސަލާމަތްވަނީ ސިމްޕަތެޓިކް ނާވަސް ސިސްޓަމް އޭ ކިޔާ ނިޒާމެއްގެ ހިއްސު ދެނެގަންނަ ނާރުތަކެއްގެ ސަބަބުން. މިއީ މިފަދަ ކުއްލި ނިންމުންތައް ނިންމުމުގައި ހަރަކާތްތަރިވާ ނާރުތަކެއް.

ގިނަވަގުތައް ދެމިގެންދާ ތަދަކީ އެއާއި މެދު އިންސާނާ ވިސްނާ، ދެން އަމަލު ކުރަންވީ ގޮތް ހޯދާ ދެނެގަތުމަށް ފުރުސަތު ލިބޭ ތަދެއް. މިއީ ހަގީގަތުގައި އިތުރު އެހެން ގެއްލުމެއް ލިބުނަ ނުދިނުމަށް އިންސާނާގެ ހަށިގަނޑަށް އަންގާ އެންގުމެއް. އެހެނީ ބިނދިފައިވާ ފަޔަކާއި އެކު ވޭން ނާޅާނަމަ އިތުރަށް ހިނގަން މަސައްކަތްކުރެވި އިތުރު ގެއްލުމެއް ލިބިދާނެ. އެހެންކަމުން އެ ތަދަކީ އެފަދަ އިންޒާރެއް.

ހަމަ އެއާއި އެކު ގެއްލުމެއް ލިބެން އުޅޭ ކަމުހެ އިހުސާސް ކުރުވުމަށްވެސް ދަތު ވެދާނެ. މިއަށް ފަހަރުގައި ބިރުގަތުމޭވެސް ކީދާނެ. ނަމަވެސް ހަގީގަތަކީ މިއީވެސް ތަދެއް. އެހެނީ ތަދު އިހުސާސް ކުރުވާ ނިޒާމުން، ހަމަ އެ ތަރުތީބުން މިކަންވެސް ހިނގާތީ. މިސާލަކަށް އުސް ތަންތަނަށް ފަރިތަ ނޫން މީހަކު އުސް ތަނަކަށް އެރުމުން އެ ހިއްސު ދެނެގަންނަ ނާރުތަކުން އެމީހާއަށް ބިރު އިހުސާސް ކުރުވާ. މިއީ މިބުނާ ތަދު. އޭގެ ސަބަބުން ގެއްލުމެއް ލިބިދާނޭ ހުރިހާ މަގަކުން އެ މީހަކު ދުރުވާން ފުރުސަތު ނުވަތަ ވަގުތު ލިބޭ.