އިންސާނާގެ ހަށިގަނޑުގައި އެކި ގުނަވަންތައް އުފެދިފައިވަނީ އެކި ކަހަލަ ޓިޝޫތަކުން. އެކި މަސައްކަތްތައް ކުރާ އެކި އެކި ގުނަވަންތައް އެކި ގޮތްގޮތައް ފަރުމާކުރައްވާފައިވާއިރު، އިންސާނާގެ ހަށިގަނޑުގައިވާ އެންމެ ބާރުގަދަ ނުވަތަ އެންމެ ހަރު ގުނަވަނަކީކޮބައިކަން އެނގޭތަ؟ އެންމެ ބާރުގަދަ އަދި އެންމެ ހަރު ގުނަވަނަކީ ކައްޓޭ ބުނާތީ އަޑުއިވޭ. ނަމަވެސް އެއީ ގޯހެއް. އިންސާނާގެ ހަށިގަނޑުގައިވާ އެންމެ ބާރުގަދަ އަދި އެންމެ ހަރު ގުނަވަނަކީ ދަތް. ހަށިގަނޑުގައިވާ ކަށްޓަށްވުރެ ދަތުގެ ބާރުގަދަވެފައި ހަރު. ދަތަށް މި ހަރުކަމާއި ބާރުގަދަކަން ލިބެނީ ދަތުގައިވާ އެނޭމަލް ނަމަކަށް ކިޔާ ބައިން. އެނޭމަލް އުފެދިފައިވަނީ އެކި އެކި މާއްދާތައް އެކުލެވިގެން އޭގެ ތެރެއިން އެންމެ ގިނަ މާއްދާއަކީ އަޕުޓައިޓް ނަމަކަށް ކިޔާ މާއްދާއެއް. މޮހް ސްކޭލް ނަމަކަށް ކިޔާ ތިލަފަތަކީ ނުވަތަ ޗާޓަކީ އެންމެ ހަރު މާއްދާތައް ތަރުތީބަކުން އަތުރާފައިވާ ތިލަފަތެއް ނުވަތަ ޗާޓެއް. އެ ޗާޓުގެ ފަސްވަނައިގައި ވަނީ އަޕުޓައިޓް. އެހެންކަމުން ދަތަކީ ވަރަށްވެސް ހަރު ގުނަވަނެއްކަން އިނގޭ. އިންސާނާ މަރުވުމަށްފަހު ކަށިތައް ފީވެގެން ދާއިރުވެސް ދަތްތަކަށް މާބޮޑު ގެއްލުމެއް ނުވެ ހުރޭ. ދިރާސާވެރިން ދެކިލަައްވާގޮތުގައި 100 އަހަރަށްވުރެ ގިނަ ދުވަހު، ދަތް ހަލާކުނުވެ ނުވަތަ ފަނާނުވެ ހުރޭ. އެހެންކަމުން އިންސާނާގެ ހަށިގަނޑުގައިވާ އެންމެ ބާރުގަދަ އަދި ހަރު ގުނަވަނަކީ ކަށި ނޫންކަމާއި ދަތްކަން މިކަމުން ހާމަވޭ.