ބުޅަލަކީ ވަރަށް ގިނަ މީހުން އޮޅު ޖަނަވާރެއްގެ ގޮތުގައި އޮޅުކޮށްގެން ގެންގުޅޭ ޖަނަވާރެއް. އަދި ވަގު ބުޅާވެސް މިއީ މިހާރު ވަރަށް ގިނަ އެއްޗެއް. ބުޅާ އޮޅުކޮށް ގެންގުޅޭ ފަރާތްތަކަށް ބުޅަލާއި ބެހޭގޮތުން މި ހިއްސާކޮށްލެވޭ މައުލޫމާތަކީ އެނގުން މުހިންމު ކަމަކަށް ވެދާނެ. ބުޅަލުގެ ދުލަކީވެސް އަޖައިބެއްކަހަލަ ފުރިހަމަ ގުނަވަނެއް. ނަމަވެސް އެ ގުނަވަނުގައި ނުވަތަ ބުޅަލުގެ ދުލުގައި ފޮނި ރަހަ ދެނެގަތުނަށް ހާއްސަ ބަޑުތަކެއް ނުހުރޭ. އެހެނަސް އެހެން ރަހަތައް ދެނެގަތުމުގެ ގާބިލުކަން ބުޅަލަށް ލިބިގެންވޭ. މިކަމުގެ ސަބަބުން ބުޅަލަކަށް ފޮނި ރަހަ އިހުސާސެއް ނުކުރެވޭ. ނުވަތަ ބުޅަލަށް ފޮނިރަހަ އެއް ނުލާނެ. ނުވަތަ ފޮނި ރަހަ ދެނެގަންނާކަށް ނޭނގޭނެ. ދިރާސާވެރިން ވަނީ މިކަން ކަށަވަރު ކުރުމަށްޓަކައި ދިރާސާއެއް ކޮށްފަ. އެ ދިރާސާގައި ބޭނުން ކޮށްފައިވަނީ އާދައިގެ ފެނާއި، ހަކުރު އަޅާއި ގިރާފައިވާ ފެން. ބުޅާތަކަކަށް މި ފެންތައް ދިނުމުން އެއްވެސް ބުޅަލެއްގެ ފަރާތުންވެސް ހަކުރު އަޅައިގެން ގިރާފައި ހުރި ފެނަށް ހާއްސަ އެއްވެސް ޝައުގުވެރިކަމެއް ދީފައެއް ނެތް. އެހެންކަމުން މިކަން ވެގެން ދިޔައީ ދިރާސާވެރިން މި ދައްކާ ވާހަކައަށް ލިބުނު ވަރަށްވެސް ބޮޑު ހިތްވަރަކަށް. ބުޅަލުގައި މި ނިޒާމު މިފަދައިން ތަރުތީބު ވުމުގައިވެސް ވަރަށްބޮޑު ހިކުމަތްތަކެއް ވާނޭކަން ޔަގީން. ވިސްނާ ފިކުރުކުރާނަމަ މިކަން ކަމުގައި އިންސާނުންނަށްޓަކައި އިބުރަތްތަކެއް ވާކަން ޔަގީން.