އާންމުކޮށް މީހުން އިށީނދެ ތިބެނީ ގޮނޑީގައި. އެގޮތުން ޖުމުލަކޮށް ބުނާނަމަ އިށީނދެ ހެދޭ ކޮންމެ އެއްޗަކަށް ގޮނޑިއޭ ކީދާނެ. ކަންމިހެން ހުރިނަމަވެސް އާންމުކޮަށް ގޮނޑިއޭ ކިޔެނީ އޭގައި ފައި ހަރުކޮށް، އިށީންނާނޭ ބައެއް ލާފައި ހުންނަ އެއްޗަކަށް. މި ލިޔުމުގައި ގޮނޑި މި މާނަކުރަނީ އާންމުކޮށް ގޮނޑިއޭ މިކިޔޭ މާނައިގަ. އިހުޒަމާނުގައި ގޮނޑިއަކީ ޝާހީ އާއިލާތަކުން ބޭނުން ކުރާ އެއްޗެއް. ރަސްކަމުގެ ގަނޑުވަރުތަކުގެ ތެރޭގައި މިފަދަ ގޮނޑިތައް ބޭނުން ކުރޭ. އެޒަމާނުގައި އާންމުން އިށީނދެ ހަދަނީ ތިރިކޮށް އެއްވަރަށް ބުރިކޮށްފައި ހުންނަ ލަކުޑި ގަނޑުތަކުގައްޔާއި ގާގަލުގަ. ގޮނޑި އާންމުވެ، އާންމުން ގޮނޑީގެ ބޭނުން ކުރަން ފަށާފައިވަނީ 16ވަނަ ގަރުނުގެ ތެރޭގަ. އޭގެ ފަހުން މިހާރު ގޮނޑިއަކީ ވަކި ހާއްސަ މީހަކަށް ނުވަތަ ވަކި މޮޅު މީހަކަށް ހާއްސަ ފަރުނީޗަރެއް ނޫން. ދުނިޔޭގައި މިހާރު ހުރި އެންމެ ދުވަސްވީ ގޮނޑި ފެންނަން ހުރީ މިސްރުގެ ދާރުލްއާސާރަކުން. އެއީ އެގައުމުގެ ފަސްގަނޑުގެ ދަށުން އެ ގައުމުގެ ތާރީހު އިލްވުމެރިން ނަގާފައިވާ ގޮނޑިއެއް. ބުނެވޭ ގޮތުގައި އެ ގޮނޑިއަކީ 3000ބީ.ސީ (އަހަރުގުނާ ގޮތެއް، އީސާގެފާނު ވަޑައިގަތުމުގެ 3000އަހަރު ކުރި) ގެ ގޮނޑިއެއް. އެ ގޮނޑިއަކީވެސް އެގައުމުގެ ތާރީހު އިލްމުވެރިން ދެކިލައްވާ ގޮތުގައި ޝާހީގަނޑުވަރެއްގައި ބޭނުންކޮށްފައިވާ ގޮނޑިއެއް.