މީގެ އަހަރުތަކެއް ކުރިން ކުޑަކުދިންގެ މެދުގައި އެންމެ މަޝްހޫރު ޓޮމް އެންޑް ޖެރީ ކާޓޫނަކީ މުޅި ދުނިޔޭގެ އެކި ކަންކޮޅުތަކުގައި މަގުބޫލުކަން ލިބިފައިވާ އެނިމޭޓެޑް ކާޓޫނެއް. އެތައް ސިލްސިލާއެއް ހިމެނޭގޮތަށް އެކުލެވިފައިވާ މި ކާޓޫނުގައި 150 އަށް ވުރެ ގިނަ ސިލްސިލާ ހިމެނޭ. އޭގެތެރެއިން އެންމެ ދިގު ސިލްސިލާ އަކީ އޭގެ އެންމެ ފުރަތަމަ ސިލްސިލާ. އެއީ 1940 ވަނަ އަހަރުގެ ފެބުރުއަރީ މަހުގެ 10 ވަނަ ދުވަހު އާންމު ކުރި "ޕުސް ގެޓް ދަ ބޫޓް" ގެ ނަމުން ނަން ދީފައިވާ ސިލްސިލާ. ޓޮމް އެންޑް ޖެރީ ކާޓޫނު ފުރަތަމަ އުފެދިގެން އައި އިރު އެކާޓޫނުގެ މައިގަނޑު ދެ ކެރެކްޓާއިންގެ ނަން ވަރަށް ތަފާތު. އޭރު ޓޮމް އަށް ކިޔަނީ ޖެސްޕާ. އަދި ޖެރީއަށް ކިޔާ ވަކި ހާއްސަނަމެއް ދީފައި ނުވި ނަމަވެސް އެނިމޭޓަރުން ޖެރީއަށް ޖިންޒް ގެ ނަން ވަނީ ދީފައި. މިދެ ކެރެކްޓަރުންނަށް ދޭނޭ ނަމަކާއި މެދު ވަނީ ވަރަށް ވާދަވެރި މުބާރާތްތަކެއް ބާއްވާފައި. އެގޮތުން މި ކާޓޫނުގައި އުޅޭ ބުޅަލަށް ޓޮމް އަދި މީދަލަށް ޖެރީގެ ނަން ހުށަހެޅީ އެނިމޭޓަރ ޖޯން ކާރ. އެނަން ވަނީ ބަލައިގަނެ ފާސްކޮށްފަ. އޭގެ ފަހުން މި ކާޓޫނު ވަނީ ޓޮމް އެންޑް ޖެރީގެ ނަމުން މަޝްހޫރުވެގެން ގޮސްފަ. ދުވަހަކުވެސް އެއްގަލަކަށް ނާރާ ދެ ކެރެކްޓާ އުޅޭ މިކާޓޫނުގެ އެކި ސިލްސިލާތަކުގައި އެންމެ ފުރަތަމަ މި ދެ ކެރެކްޓަރުން އެއްގަލަކަށް އެރީ 1970 ވަނަ އަހަރު ގެނެސްދިން ސިލްސިލާއެއްގައި.