އެކި ގައުމުތައް އެކި ކަންކަމަށް ހާއްސަވެފާ އޮންނަ އިރު ކޮފީ އުފެއްދުމާއި ވިއްކުމުގައި އެންމެ މަޝްހޫރު ގައުމަކީ ކޮބާ؟ އަހަރެމެން އެންމެންނަކީ ކޮފީ ބުއިމުގައި ގިނަ ވަގުތު ތަކެއް ހޭދަކުރާ ބައެއް. އެހެންކަމުން އިސްވެ މިކުރެވުނު ސުވާލުގެ ޖަވާބު އެނގިފައި ހުރުން މުހިންމު ކަމަކަށް ވެދާނެ. ދުނިޔޭގައި އުފައްދާ ބޭނުންކުރަމުންދާ ކޮފީގެ ނިސްބަތުން ތިންބައިކޮށްފަ އެއްބައި ކޮފީ އުފައްދާ ވިއްކަނީ ބްރެޒިލް އިން. އެގައުމުގެ ބިމުގެ ބޮޑު އިންސައްތައެއް ވަނީ ކޮފީ ހެއްދުމާ އުފެއްދުމަށް ދޫކޮށްފައި. ބުނެވޭ ގޮތުގައި އެގައުމުގެ ބިމުގެ 2 މިލިއަނަށް ހެކްޓަރަށް ވުރެ ބޮޑު ބައެއް ވަނީ މިކަމަކަށް ހާއްސަ ކުރެވިފައި. ކޮންމެ އަހަރަކު އެތައް މިލިއަން ބަސްތާއެއްގެ ކޮފީ އެގައުމުން އުފައްދާ އެހެން ގައުމުތަކަށް ބޭރުކުރޭ. އެގޮތުން ކޮންމެ އަހަރަކު އެވްރެޖުކޮށް 43 މިލިއަން ބަސްތާގެ ކޮފީ އެ ގައުމުން ބޭރުކުރޭ. ކޮފީގެ މައިގަނޑު ދެވައްތަރެއް ހުންނައިރު ބްރެޒިލްގައި ގިނައިން އުފައްދަނީ "އަރަބިކާ" ކޮފީ. އެއީ އެގައުމުގައި އުފައްދާ ކޮފީގެ ނިސްބަތުން ގާތްގަނޑަކަށް 70 އިންސައްތަ.