ކެއުމުގައި ބޭނުންކުރާ ތަރުކާރީގެ ބާވަތްތަކުގެ ތެރެއިން ކެރެޓަކީ ވަރަށް އާންމުކޮށް ބޭނުން ކުރެވޭ ތަރުކާރީއެއް. ކެރެޓަކީ ރޮލާވެސް ކެވޭ ތަރުކާރީއެއް. އަދި ކެރެޓަކީ ހަގީގަތުގައި ގަހެއްގެ މުލެއް.

އަހަރެމެންނަށް އާންމުކޮށް މިފެންނަ ކެރެޓުގައި ހުންނަނީ އޮރެންޖުކުލަ. އެހެނަސް ކެރެޓުގައި ކިތަންމެ ކުލައެއް ހުރޭ. އެގޮތުން ހުދު، ދަނބު، ރީނދޫ އަދި ރަތްކުލައިގެ ކެރެޓުވެސް ހުރޭ. އެންމެ އިހުޒަމާނުގައި ކެރެޓަކީ ކެއުމަށް ބޭނުން ކުރި އެއްޗެއް ނޫން. އެއީ ބައެއް ޖަނަވާރަށް ކާންދޭން ގެންގުޅުނު އެއްޗެއް. އަދި އެއީ ބޭސްވެރިކަމުގައި ބޭނުންކުރި އެއްޗެއް. އެހެނަސް އޭގެފަހުން ވަނީ ކެއުމަށްވެސް ބޭނުން ކުރަން ފަށާފަ.

ކެރެޓުން ލިބޭ ފައިދާތަކަށް ބަލާއިރު ކެރެޓަކީ ވިޓަމިން-އޭ ވަރަށް ގިނަ އަދަދަކަށް ލިއްބައިދޭ ތަރުކާރީއެއް. ދިރާސާވެރިން ފާހަގަ ކުރައްވާގޮތުގައި އެވްރެޖު އިންސާނަކު ކެރެޓެއް އެއްކޮށް ކާލައިފިނަމަ، 24 ގަޑިއިރު ތެރޭ އޭނާއަށް ބޭނުންވާ ވިޓަމިން-އޭ ގެ 200 އިންސައްތަ ލިބޭ. ކެރެޓަކީ އެހާވެސް ގިނައިން ވިޓަމިން-އޭ ލިއްބައިދޭ ތަރުކާރީއެއް. ކެރެޓުގައި ހުންނަ ކުލަ ގަދަވި ވަރަކަށް އެއިން ލިއްބައިދޭ ވިޓަމިން-އޭ ގެ މިންވަރު އިތުރުވޭ.