ފިޔާއަކީ ކެއުމުގައި އެކިއެކި ބޭނުންތައް ކުރާ ތަރުކާރީއެއް. ފިޔާ ބޭނުންކޮށްގެން ތަފާތު އެކި ރިހަތަކާއި ހަވާދުތަކާއި ހެދިކާތަކާއި އަދިވެސް ކިތަންމެ މީރު ކެއުމެއް ތައްޔާރުކުރޭ. މީގެ އިތުރުން ފިޔާއަކީ ރޮލާވެސް ކެވޭ ތަރުކާރީއެއް.

މިހާގިނައިން ކެއުމުގައި ފިޔާ ބޭނުން ކުރެވޭއިރު، މި ފިޔާ ބޭނުން ކުރެވޭނީ ކޮށައިގެން. އެގޮތުން ބަދިގޭގައި އުޅޭ ކޮންމެ މީހަކީ ކޮންމެ ދުވަހަކުވެސް ކޮންމެވެސް ވަރަކަށް ފިޔައިކޮޅެއް ކޮށަން ޖެހޭމީހަކަށް ވާނޭ ބުނުން ދޮގަކަށް ނުވާނެ. ފިޔާ ކޮށުމަކީ ލޮލުން ފެންނަ އަންނަ ކަމެއް. ފިޔާކޮށާ ބައެއް މީހުން ހީވާނީ ކަމަކާ ހިތްދަތިވެ، ވަރަށް ގިނައިން ކަރުނައަޅާ ރޯހެން. މިކަން މިހެން މި ދިމައިވަނީ ކީއްވެގެންކަން ދެނަހުރީމުތަ؟

މިކަން މެދުވެރިވަނީ ފިޔާ ކޮށުމުން ފިޔާގައި ހުންނަ ލެކްރިމެޓޮރީ ފެކްޓާ ސިންތޭސް ނަމަކަށް ކިޔާ މާއްދާއެއް ވައިގެ ތެރެއަށް ބޭރުވުމަށް ފަހުގައި ހިނގާ ކެމިކަލް ރިއެކްޝަންތަކެއްގެ ސަބަބުން. އެއާއިއެކު އިސްވެ ދެންނެވުނު ފެކްޓާ ވައިގެ ތެރޭގައި ވުމުން، ފިޔާގައި ހުންނަ އެމިނޯ އެސިޑްތައް ސަލްފިއުރިކް އެސިޑް ނަމަކަށް ކިޔާ އެސިޑަކަށް ބަދަލުވޭ. ދެން މި ތަރުތީބެއް ނެތް ސަލްފިއުރިކް އެސިޑްތަކުގެ ނަހަމަކަމުން އިތުރުއެހެން ކެމިކަލްއެއް އުފެދޭ. އެއީ ސިން-ޕްރޮލެނެތިއަލް-އެސް-އޮކްސައިޑް ނަމަކަށް ކިޔާ ކެމިކަލްއެއް. މި ކެމިކަލް އަނެއްކާ ވައިގެ ތެރެއަށް ދޫވޭ. މި ކެމިކަލް އިންސާނާގެ ލޮލާއި ހަމައަށް ފޯރުމުން ލޮލުގައި ހުންނަ ހިއްސު ދެނެގަންނަ ނާރުތަކުން މި ކެމިކަލް ދެނެގަނެ ކަރުނަ އުފައްދައިދޭ ގްލޭންޑްތަކަށް "އުނދަގޫ" ތަކެއް ކުރިމަތިކުރުވާ. އެއާއެކު އެ ގްލޭންޑުން ކަރުނަ އުފައްދައިދޭން ފަށާ. މިއީ ވަރަށް އާދައިގެ ކަމެއް ނަމަވެސް މިކަން މިހިރަ ހިނގާ ފުރިހަމަ ތަރުތީބަކީ ހެއްދެވިފަރާތުގެ ކުޅަދުންވަންތަކަން ސާފުކޮށް ފެންނަން ހުރި ކަމެއް.