އާދަވެ އިންސާނުން ކުރާ ނުވަތަ ކުރެވޭ ނުވަތަ ކުރަންޖެހޭ އެއް ކަމަކީ ބޮޑުކަމު ދިއުން. މިއީ އެއްވެސް އިންސާނަކު ނުކޮށް ހުންނާނޭ ކަމެއް ނޫން. ބޮޑުކަމު ދިއުމާއި ބެހޭ ވާހަކަ ތަކަކީ ގިނަބަޔަކު ގަބޫލު ކުރާ ގޮތުގައި ހަޑި ވާހަކަ ތަކެއް. ނަމަވެސް ބޮޑުކަމުދިއުމާއި ބެހޭގޮތުންވެސް އެނގުން މުހިންމު ބައެއް ކަންކަން ހުރޭ. އަންހެނުންނާއި ފިރިހެނުން ބޮޑުކަމުދިއުމުގެ ނިޒާމުގެ ތަރުތީބުގައި ތަފާތުތަކެއް ކުރޭ. އެހެނަސް މިއީ ވަރަށް ކުޑަ ތަފާތެއް. ފިރިހެނުންނަށްވުރެ އަންހެނުންގެ އުނަގަނޑުމަތީގެ ކަށިތައް ބޮޑުވެފާ ފުޅާވާނެ. މީގެ އިތުރަށް އަންހެނާގެ ދަށްބަނޑުގައި ފިރިހެނުންގެ ނުވާ ގުނަވަންތަކެއްވޭ. އެއީ ބިސްރަވަ އާއި ރަހިމު. މިސަބަބައްޓަކައި އަންހެނާގެ ބޮޑު ގޮހޮރު އިންނާނީ ފިރިހެނާގެ ބޮޑު ގޮހޮރު އިންނަ ހިސާބު ނުވަތަ މިންގަނޑަށްވުރެ ތިރީގަ. އަދި އަންހެނާގެ ބޮޑުގޮހޮރުގެ މަސްތައް ފިރިހެނާގެ ބޮޑުގޮހޮރުގެ މަސްތަކަށް ވުރެ "ދޫވާނެ". އެހެނީ މާބަނޑުވުމާއި މިކަންކަމަށް އަންހެނާގެ ހަށިގަނޑު ތައްޔާރުވާން ޖެހޭނެތީ. މިކަމުން މާތް ﷲ ގެ ކުޅަދުންވަންތަކަމާއި އެކަލާންގެ ހަލްގުތަކުން އުފައްދަވާފައިވާލެއް ފުރިހަމަކަން ދަލީލުކޮށްދޭ. މިއީ ވިސްނުމެއް، ބުއްދިއެއް ހުރި އިންސާނަކު މަލާމާތްކޮށް ޖޯކު ޖެހައިގެންވާނޭ ކަމެއް ނޫން.

މި ސަބަބުތަކާއި ހުރެ އަންހެނުންނަށް ބޮޑުކަމުދިއުން ފިރިހެނުންނަށް ވުރެ "ދަތިވޭ". ފިރިހެނުން ބޮޑުކަމު ދެވޭހާ ގަވައިދުން އަންހެނުންނަށް ނުދެވޭ. އަންހެނާގެ ބޮޑުގޮހޮރުގައި ބޮޑުކަމުދާ ތަކެތި ހުންނަ މުއްދަތުވެސް އިތުރުވޭ. މިސަބަބާއި ހުރެ ވައިގެ އެކި އެކި އުނދަގޫތައް އަންހެނުންނަށް ކުރިމަތިވާލެއް، ފިރިހެނުންނަށްވުރެ އިތުރުވޭ.