އިންސާނާ އުފަންވާއިރު އެ އިންސާނާގެ ކިބައިގައި އެވެނި މިވެނި ބައްޔެއް ނުވަތަ އެވެނި މިވެނި އުނިކަމެއް ނުވަތަ އެވެނި މިވެނި ކަމެއް ހުރެއޭ ބުނެވޭ. އެގޮތުން އަންހެން ކުއްޖާ އުފަންވާއިރު، އެ ކުއްޖާއާއި ބެހޭ ވަރަށް ހާއްސަ މައުލޫމާތެއް ނުވަތަ ކަމެއް އެ ކުއްޖާގެ ހަށިގަނޑުގައި ފުރިހަމަވެފާވޭ. އެއީ އެ އަންހެންކުއްޖާގެ ބިސްރަވައާއި ގުޅިފައިވާ ވަރަށް ހާއްސަ ކަމެއް. މައިމީހާގެ ރަހިމުގެ ތެރޭގައި ކުއްޖާ (އަންހެންކުއްޖާ) އޮންނަ އިރު، (އެ ކުއްޖާގެ ހަށިގަނޑު ފުރިހަމަވެފައިވާ އިރު) އެ ކުއްޖާގެ ބިސްރަވައިގައި ގާތްގަނޑަކަށް 7 މިލިއަނެއްްހާ "އޫސައިޓްސް" ވޭ. "އޫސައިޓްސް" އޭ ކިޔަނީ އަންހެން ބިސްތަކުންކުރެ "ޅަ" ނުވަތަ "ހަގު" ބިސްތަކަށް. މައިމީހާ ކުއްޖާ ވިހެއުމާއި އެކު މި ދެންނެވި 7 މިލިއަނެއްހާ "ހަގު" އަންހެން ބިސްތަކުގެ އަދަތު ގާތްގަނޑަކަށް 2 މިލިއަނަށް މަދުވޭ. އަންހެން ކުއްޖާ ބާލިޣުވުމާއި ހަމައަށް އެ ކުއްޖާގެ ބިސްރަަވައިގައި ހުންނަ ބައެއް "ހަގު" ބިސްތައް މަރުވާން ފަށާ. އެ ކުއްޖާ ބާލިޣުވުމާއި އެކު، އެ "ހަގު" ބިސްތައް "ދޮށި" ވެ ކޮންމެ މަހަކު ބިސްރަވައިން ބޭރުވޭ. މިގޮތަށް ކޮންމެ އަންހެން ކުއްޖަކުވެސް އުފަންވާއިރު އެ ކުއްޖާގެ ހަޔާތުގައި އެ ކުއްޖެއްގެ ހަށިގަނޑުގައި ހުންނަ އަންހެން ބިހުގެ އަދަދު، ބިސްރަވައިގައި ހިމެނިފައިވޭ. މި އަދަދު އެކި ކުދިންގެ ތަފާތުވޭ.