އިންސާނާގެ ލޮލަކީ ވަރަށް އާދަޔާ ހިލާފު ގުނަވަނެއް. އަދި މިއީ އެންމެ ނާޒުކު އެއް ގުނަވަންވެސް މެ. އިންސާނާގެ ލޮލަށް ފެނުމުގައި އަލި، އަދާ ކުރާ ދައުރަކީ ވަރަށް މުހިންމު ދައުރެއް. އަލިކަމެއް ނުވަތަ އައްޔެއް ނުވާ ތަނަކު، އިންސާނާއަކަށް އެއްވެސް އެއްޗެއް ނުފެންނާނެ. އިންސާނާ ލޯ މެރުމުން ނުފެންނަނީވެސް ލޮލަށް އަލި ނުފޯރާތީ.

ލޮލަށް ފެނުމުގައި އަލި އަދާކުރާ ދައުރަކީ ކޮބާ؟ އެންމެ ފުރަތަމަ ކޮންމެވެސް އަލިކަމެއް ބޭނުން ވާނެ. އެ އަލިކަން ކޮންމެވެސް އެއްޗަކަށް އެޅެން ވާނެ. އެ އަލި، އެއްޗަކަށް ނޭޅި އިންސާނާގެ ލޮލަށް އެޅުމަކުން ނުވަތަ ހަމަ އެކަނި ލޮލަށް އަލިކަމެއް ހުރުމަކުން އެހެން އެއްޗެއް ލޮލަކަށް ނުފެންނާނެ. ފެންނަން ނުވަތަ ބަލަން ބޭނުންވާ އެއްޗަކަށް އަލި އެޅެނިކޮށް އިންސާނާއަށް އެ އެއްޗެއް ފެންނާނެ. އެ އެއްޗަކަަށް އެޅިފާހުންނަ އަލި، ވަށައިގެން އެ އެއްޗަކުން "ރިފްލެކްޓް" ވެފާ ހުންނާނެ. އެ އަލި އިންސާނާގެ ލޮލަށް އެޅުމުން އެ އެއްޗެއް އިންސާނާއަށް ފެންނާނެ. 

ދުރުގައިވާ އެއްޗަކަށް ބަލާނަމަ، ލޮލުގައިވާ ލެންސު ދިގުވާނެ. އަދި ކައިރީގައިވާ އެއްޗަކަށް ބަލާނަމަ، ކުރުވާނެ. ލެންސަކީ ލޮލަށް އެޅޭ އަލި ބަޅު ނުވަތަ ބެންޑުކޮށްލާ ގުނަވަނެއް. މި އަލި ލޮލަށް އެޅުމާއި އެކު ލެންސުން މި އަލި ބަޅު ނުވަތަ ބެންޑު ކުރުމަށްފަހު ލޮލުގެ އެތެރޭގައި އިންނަ ރެޓިނާއޭ ކިޔާ ހިސާބަށް ފޮނުވައިދޭ. މިހެން ފޮނުވައިދޭ އިރު، އެ އަލި އިންނާނީ އެކޮޅުކޮޅުން. އިންސާނާ ބަލާ މަންޒަރެއް ނުވަތަ އެއްޗެއް ރެޓިނާއަށް އެޅިފައި އިންނާނީ އެކޮޅުކޮޅުން. އެއާއި އެކު ލޮލުގައިވާ އޮޕްޓިކް ނާވްއިން އެ އެއްޗަކުން ނުވަތަ އައްޔަކުން އުފެދޭ ކެމިކަލް މެސެޖު ސިކުނޑިއަށް ފޯރުކޮށްދޭ. އެހިސާބުން ސިކުނޑިން އެ މެސެޖު ނަގައިގަނެ، އެއީ ކޮން އެއްޗެއްކަމާއި އޭގައި ވަނީ ކޮން ކުލަތަކެއްކަން އަންގައިދޭ.

އިންސާނާއަށް ފެނުމުގައި އެންމެ ފުރަތަމަ އަލިކަމެއް ބޭނުންވޭ. ރޭގަނޑު އެއީ ފޭރާމެއް ނުވަތަ ފަރުދާއެއް ކަމުގައި މާތް ﷲ ލައްވާފައިވުމާއި، ރޭވެ އަނދިރިވުމުން ލޮލަށް ފެންނަ ގިނަ މަންޒަރުތައް ކަޝްފުވެގެން ދިއުމުން މާތް ﷲ ގެ ކުޅަދުންވަންތަކަމާއި އެ އިލާހުގެ އިންސާފުވެރިކަން ހާމަވެގެންދޭ. މިއީ ވިސްނާ ފިކުރުކުރާ ބަޔަކަށް އިބުރަތްތަކެއް ހާސިލުކުރެވޭނޭ މިސާލުތަކެކެވެ.