ދުނިޔޭގެ ބިމުގައިވާ ގަސްގަހާއި ފަރުބަދަ ތަކާއި ކަނޑުތަކާއި ކޯރުތަކަކީ އެތަކެތީގައި މާތް ﷲ ގެ ކުޅަދުންވަންތަކަމުގެ އެތައް ހެއްކެއް ފެންނަން ހުރި ތަކެއްޗާއި ތަންތަން. އެގޮތުން އަޖައިބު ކުރަނިމި އެއް ތަނަކީ ދުނިޔޭގައިވާ އެންމެ ދިގު ކޯރު. މިއީ ނީލު ކޯރު. ނީލުކޯރަކީ އެފްރިކާގައިވާ ކޯރެއް. ނީލުކޯރުގެ ފެށުން އެކި ތަންތަނާއި ގުޅިފާވޭ. އެގޮތުން ނީލުކޯރުގެ އެންމެ ބޮޑު ނުވަތަ މައިގަނޑު އެއް ފެށުމަކީ ވިކްޓޯރިއާ ނަމަކަށް ކިޔާ ފެންގަނޑެއް. ހަމަ އެއާއި އެކު ނީލުކޯރުގެ ފެށުމުގެ ބޮޑުބައެއް ވަނީ ރުވީރޮންޒާ އޭ ކިޔުނު ކޯރުން ކަމުގައިވެސް ބުނެވޭ.

ނީލު ކޯރުގެ ނިމުން ގުޅިފައިވަނީ މެޑިޓްރޭނިއަމް ކަނޑާ. ބުނެވޭ ގޮތުގައި ނީލުކޯރުން ސިކުންތަކު 3.1 (ތިނެއް ޕޮއިންޓް އެކެއް) މިލިއަން ލީޓަރުގެ ފެން، މެޑިޓްރޭނިއަމް ކަނޑަށް ބޭރުވޭ. މި ކޯރުގެ އަންދާޒީ ދިގުމިނަކީ ގާތްގަނޑަކަށް 4160 (ހަތަރުހާސް އެއްސަތޭކަ ފަސްދޮޅަށް) މޭލު. މި ކޯރު އެފްރިކާގެ 10 ގައުމެއް ހުރަސްކޮށްފައިވޭ.

ނީލުކޯރަށް "ނީލު" އޭ ކިޔާ ނަން ދެވުނީ ގްރީކް ބަހުން. އެބަހުގެ ނުވަތަ ނީލުގެ މާނައަކީ ކޯރުތަކުގެ ވާދީ.