އިންސާނާގެ ހަށިގަނޑުގައިވާ ގުނަންތަކުން، އިންސާނާއާއި އޭނާގެ މައި މީހާއާއި އޮންނަ ގުޅުން އެންމެ ބޮޑަށް ހާމަވާ އެއް ގުނަވަނަކީ ފޫޅު. އެކި މީހުންގެ ފޫޅު އިންނަ ގޮތް ތަފާތުވޭ. ބައެއްމީހުން އެމީހުންގެ ފޫޅު އެތެރެއަށް ވަދެފައި ހުންނަ އިރު އަނެއްބައި މީހުންގެ ފޫޅު ހުންނަނީ ބޭރަށް ވާގޮތަށް ނުކުމެފަ.

ބަނޑުގެ މެދާ ދިމާލުން ތަންކޮޅެއް ދައްބަނޑާއި ކައިރީގައި އިންނަ މި ފޫޅަކީ ވަރަށް "އިހުސާސް" ގަދަ އެއްޗެއް. ވަރަށް އާދަޔާ ހިލާފު ބަރު އިހުސާސެއް އިންސާނާއަށް ކުރުވާ ގުނަވަނެއް. މަތިންދާ ބޯޓަަށް އެރުމާއި އުސްތަނަކުން ތިރި ބެލުމާއި ބާރަަށް ދުއްވާ އުޅަނދަކަަށް އެރުމާއި ބާރަށް ހެއްލާ ޖޯއްޔެއް ހެއްލުމަކީ ފޫޅަށް ޒާތެއްގެ އިހުސާސެއް ކުރުވާ ކަމެއް. އަދި ފޫޅުގައި އަތްލާ ނުވަތަ އިނގިލި ކާތާ ނުވަތަ ކަފަބުރެއްފަދަ އެއްޗަކުން ފޫޅުގައި ޖެއްސުމުން، ޒާތެއްގެ ބަރު އިހުސާސެއް ކުރެވޭނެ. މިފަދައިން ފޫޅުގައި މި ޒާތުގެ ބަރު އިހުސާސެއް ހުންނަނީ ކީއްވެ؟

ފޫޅާއި ގުޅިފައިވާ ނާރުތަކަކީ ދިގު ނާރުތަކެއް. އެ ނާރުތައް ހަށިގަނޑުގެ ތެރެއިން އެތެރޭގައި ގުނަންތަކާއި ގުޅިފާވޭ. އެގޮތުން ދަށްބަނޑުގެ ގިނަ ގުނަންތަކާއި ގުޅިފާވޭ. ކުޑަކަމުދާ ނިޒާމުގެ ގުނަންތަކާއިވެސް ގުޅިފާވޭ. ފޫޅަށް ކުރާ މި ބަރު އިހުސާސްގެ ސަބަބުން ބައެއް މީހުންނަށް ކުޑަކަމުދަވާކަމުގެ އިހުސާސެއްވެސް ކުރޭ. އަނެއްބަޔަކަށް ބުނަން ނޭނގޭކަހަލަ "ހާސްކަމެއް" ކުރިމަތިވޭ. އެއީ އެއްވެސް ހާލެއްގައި ލިބޭ ގެއްލުމެއް އަދި އަނިޔާއެއްވެސް ނޫން. އެއީ ހަށިގަނޑު އުފެދިފައިވާ ގޮތުން، އެ ނިޒާމު ތަރުތީބު ވެފައިވާ ގޮތް.