ދުނިޔޭގައިވާ ކޯރުތަކާއި ފެންގަނޑުތަކުގެ ތެރެއިން އެންމެ ދިގު ކޯރަކީ ނީލް ކޯރުކަން އަހަރެމެން އެންމެންވެސް އެއްބަސްވޭ. ނަމަވެސް މިފަހަރު މި ބަލާލަނީ ދުނިޔޭގައިވާ އެންމެ ފުން ކޯރަށް. ކޯރުތަކަކީ ދުނިޔޭގެ ބިމުން، އެއްގަމުގައި ހުންނަ ފެން ދައުރު ކުރާ އާރުތަކެއް. އެހެންކަމުން މާސިންގާ ބޮޑެތި ކަނޑުތަކުގެ ފުންމިނާއި އެއްވަރަށް ކޯރުތަކުގެ ފުންމިނެއް ނުހުންނާނެ. ނަމަވެސް ދުނިޔޭގައިވާ އެންމެ ފުން ކޯރަކީ ވަރަށްވެސް ފުން ކޯރެއް.

އެފްރިކާގައި އޮންނަ ކޮންގޯ ނަމަކަށް ކިޔާ މި ކޯރަކީ ދުނިޔޭގެ އެންމެ ފުން ކޯރު. މިއީ ދުނިޔޭގެ އެންމެ ދިގު ކޯރުތަކުގެ ލިސްޓުގެ ނުވަވަނައިގައި ހިމެނޭ ކޯރު. މި ކޯރުގެ ދިގު މިނަކީ 2900 މޭލު. ކޮންގޯ ކޯރުގެ ފުންމިނުގައި 220 މީޓަރު ހުރޭ. އެއީ 720 ފޫޓު. ދިރާސާވެރިން ހާމަ ކުރައްވާގޮތުގައި ކޮންމެ ސިކުންތަކު 41،200 ކިއުބިކް މީޓަރުގެ ފެން މި ކޯރުން އެޓްލާންޓިކް ކަނޑަށް ބޭރުވޭ. ބުނެވޭގޮތުގައި ޤުދުރަތީ ދިރުންތައް އެންމެ ގިނަ ކޯރަކީވެސް ކޮންގޯ ކޯރު. 

ދުނިޔޭގެ މެދުކަމަށް ބުނެ ކަމާބެހޭ ފަރާތްތަކުން ފާހަގަ ކުރާ "ރޮނގެއް" އޮވޭ. މިއަށް އިކުއެޓާ އޭ ކިޔާ. ދުނިޔޭގައިވާ ކޯރުތަކުގެ ތެރެއިން މި މެދު "ރޮނގު" ދެފަހަރަށް ހުރަސްކޮށްފައިވާ ހަމައެކަނި ކޯރަކީވެސް ކޮންގޯ ކޯރު.