ޒަމާނާއެކު ބަދަލުވަމުންދާ ފެޝަނަކީ އެއާއެކު އަހަރެމެން ދީލެމުންދާ އެއްޗެއް. އެގޮތުން އަވިއައިނު އެޅުމުގެ ފެޝަނަކީވެސް ފާހަގަކޮށްލެވޭ ފެޝަނެއް. އަވިއައިނު ނާޅާ ޒުވާނަކު މިއަދު މަދު. އުމުރުން ދުވަސްވީ މީހުންނާއި ކުޑަކުދިންވެސް އަވިއައިނު އަޅާ އުޅޭ. އަވިއައިނު އަޅާ އުޅޭ މީހުންނަށް އަވުއައިނުގެ އަސްލު އެނގެނީ ކިހާ މިންވަރަކަށް.

އެންމެ ފުރަތަމަ އަވިއައިނު އުފައްދާފައިވަނީ މީގެ ގާތްގަނޑަކަށް 2000 އަހަރު ކުރިން. ބުނެވޭގޮތުގައި އެންމެ ފުރަތަމަ އަވިއައިނު ހަދާފައިވަނީ ޖަނަވާރުންގެ ކައްޓާއި ގަސްގަހުގެ ލަކުޑިން. އެ އަވި އައިނުގައި ބިއްލޫރިއެއް ޕުލާސްޓިކެއް ނުހުރޭ. ހަނި ދޭތެރެއަކުން ފެންނަ ގޮތަށް ފަރުމާކޮށްފައިވާ އެ އަވިއައިނު ކޮންމެ މޫސުމެއްގައިވެސް ބޭނުން ކުރެވޭ.

12 ވަނަ ގަރުނުގެ ތެރޭގައި ސީނުކަރައިގައި އަވިއައިނު ބިއްލޫރި ލައިގެން އުފެއްދި. ނަމަވެސް އެ އަވިއައިނު ބޭނުން ކުރީ އެ ގައުމުގެ ފަނޑިޔާރުން، ހުކުމް ކުރާއިރު އެމީހުންގެ މޫނުތައް ފޮރުވުމުގެ މަގުސަދުގަ. މިހާރު، މިޒަމާނުގައި ބޭނުންކުރާ އަވިއައިނުގެ ފަރުމާއަކީ 1929 ވަނަ އަހަރު އުދައްދާ ބޭނުން ކުރަމުން އަންނަ ފަރުމާއެއް. އޭގެ ފަހުން އެކި ކުންފުނިތަކުން ތަފާރު އެކި ކުރެހުންތަކުގެ އަވިއައިނު އުފައްދާ އުޅުނު.