ވާރޭ ވެހުމާއި ގުޅިގެން ތަފާތު އެކި ކަންކަން އަހަރެމެންގެ ތެރޭގައި ހިނގާ. ހާދިސާ ތަކާއި ކާރިސާތައް ދިމާވޭ. ހަމަ އެގޮތަށް ބައެއްމީހުން ހިތްހަމަ ޖެހޭ ކަމަކަށްވެސް އެކަން ވެގެން ދޭ. ވާރޭ ވެހުމާއި އެކު، ދުނިޔޭގެ މާހައުލުން، ދުވާ ވަހެއް ހުރޭ. ގިނަ ބަޔަކަށް މިއީ ވަރަށް ކަމުދާ އަދި ގަޔާވާ މީރު ވަހެއް.

ފެނަކީ އޭގެ ޠަބީއަތުގައި އެއްވެސް ވަހެއް އެކުލެވިގެން ނުވާ އެއްޗެއް ކަމުގައި ވީނަމަވެސް ވާރޭ ވެހުމަށްފަހު "ހިތްގައިމު" ވަހެއް އުފެދެނީ ކީއްވެ؟ އެއީ ބިމުގައި ދިރިއުޅޭ ބެކްޓީރިއާތަކުން ނުވަތަ މައިކްރޯއޯގަނިޒަމްތަކަކުން އުފައްދާ "ޖިއޮސްމިން" ނަމަކަށް ކިޔާ މޮލިކިއުލެއްގެ ސަބަބުން އުފެދޭ ވަހެއް. ވާރޭ ވެހޭއިރު ވައިގެ "ކަލިވަތްތަކެއް" އުފެދޭ. އެ "ކަލިވަތްތަކުގައި"، "ޖިއޮސްމިން" ހުރޭ. ވާރޭ ވެހުމާއި އެކު، މި "ކަލިވަތްތައް" ވައިގެ ތެރެއަށް ދޫވެގެން ދޭ. އެއާއެކު، "ޖިއޮސްމިން" ވައިގެ ތެރެއަށް ފަތުރާލެވޭ ހިނދު، މުޅި ޖައްވުގައި އެ ވަސް ފެތުރިގެން ދޭ. މުޅި ޖައްވު އެއްވަސް ވަމުން ދޭ.

ވާރޭގެ ވަހަށް، ވަކި ހާއްސަ ނަމެއް ވެސް، ސައިންސުވެރިން ދީފާވޭ. އެގޮތުން ވާރޭ ވެހޭއިރު މި ދުވާ ވަހަށް، "ޕެޓްރިކޯރ" އޭ ކިޔާ.