ބައެއް މީހުން ގެދޮރު ބިނާ ކުރާ ގޮތުންނާއި ގެދޮރު ހުންނަ ތަނުގެ ގޮތުން ބައެއް ފަހަރަށް، ދުވާލުގެ ވަގުތުގައިވެސް އަނދިރިވޭ. އެހެނެއްކަމަކު، ދުވާލުގެ ވަގުތުގައި އަނދިރިކޮށް ހުންނަ ގޭތަކަަށް ނުވަތަ ކޮޓަރިތަކަށް އަލި ކުރެވޭނޭ މިއީ ތަފާތުގޮތެއް.

މިއީ ކަރަންޓު ބޭނުން ނުކޮށް އަދި މާ ގިނަ ސާމާނެއް ބޭނުން ނުކޮށް ކުރެވޭ ކަމެއް. ދެފުއްފެންނަ ޕްލާސްޓިކް ފުޅިއަކަށް، ކްލޮރިން އޭގައި އެކުލެވޭ ފެން، ފުރެންދެން އަޅާފައި، ކޮޓަރީގެ ފުރާޅު ގައި، ފުޅީގެ އެއްބައި ފުރާޅުގެ މައްޗަށް، އަދި އަނެއްބައި ފުރާޅުގެ ތިރިއަށް ކޮޓަރިތެރެއަށް ވާގޮތަށް ބެހެއްޓުމުން އެއިން ގަދަ އައްޔެއް އުފެދޭ. މިގޮތަކަށް ބަހައްޓާ ފުޅި ބަހައްޓަން ވާނީ ފުޅީގެ މަތިގަނޑާ ދިމާ، ފުރާޅު މަތިން ފެންނާނޭ ގޮތަށް.

މިގޮތަށް ފުޅި ބެހެއްޓުމުން އިރުގެ އަލި އެ ފުޅިއަށް އެޅޭ ގޮތުން، އެ އަލީގެ ރައްދު އަލި ފުޅި ތެރޭގައި ގަދައަށް ވިދާ. މިގޮތަށް ވިދާއިރު، އަނދިރި ކޮޓަރީގެ ތެރޭގައި އިންނަ ފުޅީގެ ބަޔައްވެސް މި ރައްދު އަލި އެޅޭ. އެހެންކަމުން އެ އަނދިރި ކޮޓަރިއަށް މި ރައްދު އަލިން އަލިކަން ލިބިގެންދޭ. މިއީ އަނދިރިކޮށް ހުންނަ ކޮޓަރިތަކާއި ގުދަންތައް ފަދަ ތަންތަނަށް، ދުވާލުގެ ވަގުތުގައި އަލިކުރުމަށް ބޭނުން ކުރެވިދާނެ މޮޅު ގޮތެއް. ކަރަންޓެއް އަދި އެހެން ގިނަ ވަސީލަތްތަކެއްވެސް މިކަމަށް ބޭނުމެއް ނުވޭ!