ދިވެހިރާއްޖޭގެ ޖުމްހޫރިއްޔާގެ ޤައުމީ މަލަކީ "ފިޔާތޮށި ފިނިފެންމާ". ކޮންމެ ކޮންމެ ކުލައެއްގެ ފިނިފެންމަލެއް ދިވެހިރާއްޖޭގެ ގައުމީ މަލަކަށް ނުވޭ. މިއީ ބޮޓާނިކަލީ ރޯޒް ޕޮލިއަންތާގެ ނަމުން ނަންދެވިފައިވާ މަލެއް. އެހެންކަމުން ދިވެހިރާއްޖޭގެ ގައުމީ މަލޭ ބުނުމުން، ފިނިފެންމަލޭ ބުނުން މުޅިއަކުން ރަނގަޅެއް ނޫން. އެންމެ ފުރިހަމަ ޖަވާބަކަށް ވާނީ ފިޔާތޮށި ފިނިފެންމާ.

ދުނިޔޭގެ ބައެއް އެހެން ގައުމުތަކުގައިވެސް ފިނިފެންމާ އެބައިމީހުންގެ ގައުމީ މާ ކަމުގައި ބަލައިގަނެފައިވޭ. ނަމަވެސް ދިވެހިން ބަލައިގަތީ އޭގެ ތެރެއިން ހާއްސަ ފިނިފެން މަލެއް. އެއީ ފިޔާތޮށި ފިނިފެންމާ. 

ފިޔާތޮށި ފިނިފެންމަލަކީ ދިވެހިންގެ މެދުގައި ވަރަށް ބޮޑު އިހުތިރާމެއް ލިބިފައިވާ މަލަކަށް ވާއިރު، ފިޔާތޮށި ފިނިފެންމަލަކީ ދިވެހި ފަސްގަނޑުގައި ފަސޭހައިން ހެދިދާނެ ފިނިފެންމަލުގެ އާއިލާގެ އެއް މެމްބަރު.

ދިވެހި ގައުމާ ފިޔާތޮށި ފިނިފެންމަލާ ގުޅެނީ އެ ފިޔާތޮށި ފިނިފެންމަލުގައިވާ އާދަޔާހިލާފު، އެމަލަށް ހާއްސަ ރީތިކަމަކުން. އެ ހާއްސަ ރީތިކަން ރަމްޒުކޮށްދެނީ މި ދިވެހިރާއްޖޭގެވެސް ހާއްސަކަމާއި ރީތިކަން.

ފިޔާތޮށި ފިނިފެންމާ ޤައުމީ މަލެއްގެ ގޮތުގައި އިޢުލާން ކުރެވުނީ 25 ޖުލައި 1985 (07 ޛުލްޤައިދާ 1405) ގަ.