މާހައުލުގެ ސާފުތާހިރުކަމާ މުޖުތަމައުގެ އަމާންކަމަށްޓަކައި ދުނިޔޭގެ އެކި ގައުމުތަކުގައި ތަފާތު ގާނޫނު ތަކާއި ގަވާއިދުތައް ހަދާފާ ހުރޭ. މަގުމައްޗަށް ކުޅު ޖެހުމާއި ކުޑަކަމުދިއުމާއި އެފަދަ އަމަލުތަކުން މަގުތަކުގެ ތާހިރުކަން ގެއްލިގެން ދިއުމަކީ ދެރަވަރު ކަންކަން ކަމުގައި ގަބޫލުކުރަން ޖެހޭ.

މިކަމަށް ހައްލެއް ހޯދުމަށްޓަކައި ދުނިޔޭގެ ގައުމަކުން ވަނީ އެ ގައުމުގައި ވަކި ވައްތަރެއްގެ ކެއުމެއް ނުވަތަ އެފަދަ އެއްޗެއް ނަމާ ކޮށްފާ. މިއީ ސިންގަޕޫރުގެ ވާހަކަ. 

1992 ވަނަ އަހަރު އެ ގައުމުގައި ވަނީ ޗުއިންގަމް ބޭނުން ކުރުން ރަސްމީ ގޮތުން މަނާ ކޮށްފަ. ސަބަބަކަށް ވަނީ ޗުއިންގަމު ކައިފަ ކިރުގަނޑު މަގުމައްޗަށް އުކުމާއެކު މަގުތަކުގެ ސާފުތާހިރުކަން ގެއްލުމާއި އެހެން މީހުންނަށް އޭގެ އުނދަގޫ ފޯރުން.

އެގޮތަށް މަނާ ވެފާ އޮތް ނަމަވެސް 2004ވަނަ އަހަރު ވަނީ ބައެއް ކަންކަމުގައި ޗުއިންގަމް ބޭނުން ކުރުން ހުއްދަކޮށްފަ. އެއީ ބައެއް ސިއްހީ ފަރުވާތަކަށް. އެގޮތުން އެފަދަ ބައެއް ބޭހާ، ދަތުގެ ފަރުވާތަކަށާއި ދުންފަތާ ދުރުހެލިވުމަށް ބޭނުން ކުރާ ނިކޮޓިން ޗުއިންގަމް ވަނީ ހުއްދަ ކޮށްފަ. އެހެންނަމަވެސް އާންމުން ޗުއިންގަމު ބޭނުން ކުރުމާ އޭގެ ވިޔަފާރިކުރުން އޮތީ މަނާކަމެއްގެ ގޮތުގަ.