އިންސާނުންގެ ހަށިގަނޑުގެ ގުނަންތައް މަސައްކަތްކުރާ އެންމެ ވައްތަރު ގޮތަކަށް އެ ޖަނަވާރެއްގެ އެތެރެ ހަށީގެ ގުނަންތައް މަސައްކަތްކުރާ ޖަނަވާރަކީ މީދާ. އެހެންކަމުން ސިއްހީ އަދި އެނޫންވެސް އެކި އެކި ދިރާސާތަކުގައި އިންސާނުންނަށް ކުރާނޭ އަސަރު ބަލަން، ތަހުލީލު ކުރަން މީދާ ބޭނުން ކުރޭ.

މީދަލަކީ އިންސާނުންގެ ހަށިގަނޑުގެ ނިޒާމުތަކާ ވައްތަރު ގޮތަކަށް އޭގެ ހަށިގަނޑުގެ ނިޒާމުތައް މަސައްކަތްކުރާ ޖަނަވާރެއް ކަމުން، މީދަލެއް ހީލިކޮއްޓުމުން ނުވަތަ ގިލިގިލިކޮއްޓުމުން އެސޮރު ހީލިކަރުވާނެ. މީދަލެއް ހީލިކޮއްޓައިފިނަމަ މީދާ ހޭންވެސް ހޭނެ. 

ނޭޝަނަލް ޖިއޯގުރަފީގައި އާއްމުކޮށްފައިވާ މައުލޫމާތާއި ވީޑިއޯތަކުން މިކަންކަން ހެކިވޭ. އިންސާނުންގެ ހީލި ހުންނަ ސަރަހައްދުތަކާއި ގާތްގަނޑަކަށް އެއް ސަރަހައްދުތަކެއްގައި މީދަލުގެވެސް ހީލި ހުރޭ. އެއީ ދެއަތުގެ އެތެރެފަރާތުން ކިހިލިފަތްދޮށް. އަދި އެސޮރުގެ ކަރުދޮށާއި ބަނޑުދޮށްވެސް ހިމެނޭ.

އެހެންކަމުން މީދަލަކީވެސް އިންސާނުންނެކޭ އެއްގޮތަށް ހީލިކޮއްޓުމުން، ހީލިކަރުވާ ޖަނަވާރެއް. އަދި ހުނޭ ޖަނަވާރެއް. އަޖުމަބަލާލުމުގެ ގޮތުން ތަޖުރިބާކޮށްލަންވެސް މިއީ ހަމަ ކުރެވިދާނެ ކަމެއް.