ފިރިހެން މަދިރިއާއި އަންހެން މަދިރީގެ ކާނައަކީ ކޮބާކަން ދެނަހުރީމުތަ؟ މަދިރީގެ އަސްލު ކާނާ އަކީ ލެޔެއް ނޫން.

އަންހެން މަދިރިއެއް ވިޔަސް އަދި ފިރިހެން މަދިރިއެއްކަމުގައި ވިޔަސް، އެސޮރުމެންގެ އަސްލު ކާނާ އަކީ އިންސާނުންނާ ޖަނަވާރުންގެ ލެޔެއް ނޫން! މަދިރީގެ އަސްލު ކާނާ އަކީ ގަސްގަހުގެ ފޮނި، މާމަލުގެ ފޮނި! އެސޮރުމެން ގަސްގަހުންނާ މާމަލުން ފޮނި ބޮއެ ހަދަނީ އެސޮރުމެންގެ ކަށި ބޭނުން ކޮށްގެން! 

ކަންމިހެން ހުރިނަމަވެސް މަދިރީގެ ނަސްލު ދެމިގެން ދިއުމަށްޓަކައި އަންހެން މަދިރިއަށް ލޭ ބޭނުންވޭ! އެގޮތުން އިންސާނުންނާ ޖަނަވާރުންގެ ގައިން ލޭ ބޮއެ ހަދަނީ ހަމައެކަނި އަންހެން މަދިރި! އެސޮރުމެން ލޭ ބޮއެ ހަދަނީ ކޮންމެހެން ދުނިޔޭގައި ހުރުމަކަށް ނޫން! ނަމަވެސް ދަރިމައިވުމަށާއި އެސޮރުމެންގެ ހަށިގަނޑުގައި ބިސް އުފެއްދުމަށްޓަކައި ލޭ ބޭނުންވޭ! މި ސަބަބާއި ހުރެ އަންހެން މަދިރި ބިސް އަޅާ އުމުރަށް ދިއުމުން އިންސާނުންނާ ޖަނަވާރުންގެ ގައިން ލޭ ބޮއެ ހަދާ!

އެއްވެސް ފިރިހެން މަދިރިއެއް، އިންސާނެއްގެ ގައިންވިޔަސް އަދި ޖަނަވާރެއްގެ ގައިން ވިޔަސް، ލޭ ބޮއެ ނޫޅޭނެ! އެހެންކަމުން އެސޮރުމެންގެ ފަރާތުން އިންސާނުންނަކަށް އެއްވެސް ނުރައްކަލެއް ކުރިމަތިވުމުގެ ބިރެއް ނެތް! ނަމަވެސް އަންހެން މަދިރި، ލޭ ބޮއެ ހަދާތީ، މިއީ ތަފާތު ބަލިތައް ޖައްސުވާ މަދިރިއެއް ކަމުގައި ވޭ!