އޭޖިންގ ރިސާޗް ރިވިއުސް ޖާނަލްގައި ޝާއިޢުކޮށްފައިވާ އާ ދިރާސާއަކުން ދައްކާގޮތުގައި ގަވާއިދުން ކޮފީ ބުއިމުން އިންސާނުންގެ އުމުރު 1.8 އަހަރު އިތުރުވެއެވެ. މި ދިރާސާއިން ދައްކާގޮތުގައި ކޮފީގައި ހަށިގަނޑަށް ފައިދާހުރި 2،000 އަށްވުރެ ގިނަ ބާވަތުގެ ކެމިކަލް މާއްދާ ހިމެނެއެވެ.

ޕޯޗުގަލްގެ ޔުނިވަރސިޓީ އޮފް ކޮއިމްބްރާގެ ޕްރޮފެސަރު ރޮޑްރިގޯ ކުންހާ ބުނާގޮތުގައި، މި ދިރާސާ ކުރަން މެދުވެރިވި މައިގަނޑު ސަބަބަކީ ދުނިޔޭގެ އާބާދީ އަވަސް ސްޕީޑެއްގައި ދުވަސްވަމުން ދިއުމެވެ. އެހެންކަމުން، މީހުންނަށް ދުޅަހެޔޮ ސިއްހަތެއްގައި ދިގު އުމުރެއް ލިބޭނެ ކާނާގެ ބާވަތްތައް ދެނެގަތުމަކީ މުހިންމު ކަމެކެވެ.

ދިރާސާގައި ފާހަގަކޮށްފައިވާ ގޮތުގައި ކޮފީގައި ހިމެނޭ މާއްދާތަކުގެ ސަބަބުން ހަށިގަނޑުގެ ނިއުރޯ އިންފްލަމޭޝަން ކުޑަވެ، އިންސިއުލިން ސެންސިޓިވިޓީ ރަނގަޅުވެއެވެ. އަދި އެންޓި އޮކްސިޑެންޓް އަދި އެންޓި އިންފްލަމެޓަރީ ބާރު ލިބި، ހަށިގަނޑުގެ އެތެރޭގައި ކުރިމަތިވާ އޮކްސިޑޭޓިވް ސްޓްރެސް ކުޑަކުރުމަށް އެހީތެރިވެއެވެ.

60 އަހަރުން މަތީގެ މީހުން ކޮފީ ބުއިން މަދުކުރުމަށް ދޭ ލަފާތައް އަލުން މުރާޖަޢާކުރަން ޖެހޭކަމަށް މި ދިރާސާއިން ފާހަގަކޮށްފައިވެއެވެ. އެއީ ކޮފީ ބުއިމުން ލިބޭ ފައިދާތަކަށް ރިޢާޔަތްކޮށެވެ. ދުނިޔޭގެ އެކި ކަންކޮޅުތަކުގައި ކުރެވިފައިވާ ދިރާސާތަކުން ދައްކާގޮތުގައި ގަވާއިދުން ކޮފީ ބުއިމުން އުމުރުން ދުވަސްވުމާ ގުޅުންހުރި ބަލިތަކުން ރައްކާތެރިވެވެއެވެ.

ނަމަވެސް، ކޮފީގައި ހިމެނޭ މާއްދާތަކުން ދުޅަހެޔޮ ސިއްހަތަކަށް މަގުފަހިވަނީ ކިހިނެއްކަން އިތުރަށް ދިރާސާކުރަން ޖެހޭކަމަށް ދިރާސާކުރި ފަރާތްތަކުން ބުނެއެވެ.