ދުނިޔޭގައި އެކި މީހުން ކުރާ އެކި ކަންކަމުން ދުނިޔޭގެ ރިކޯޑު ހޯދާ. އެގޮތުން ދުނިޔޭގައި ކުރެވުނު އެންމެ އަވަސް އޮޕަރޭޝަނަކީ އިންސާނެއްގެ ފައި ބުރިކޮއްލި އޮޕަރޭޝަނެއް. މި އޮޕަރޭޝަން ކޮށްފައިވަނީ ސްކޮޓް ލޭންޑަށް ނިސްބަތްވާ ޑަކްޓަރެއް. ރޮބާޓް ލިސްޓަން (1847-1794) މި އޮޕަރޭޝަން ކޮއްފައިވަނީ ތޫނު ވަޅިއެއްފަދަ ހަތިޔާރަކުން. މި އޮޕަރޭޝަންގައި ހޭދަވެފައިވަނީ 120 ސިކުންތު. ފައިބުރިކޮއްލުމަށް އޭނާގެ ހަރަކާތްތައް ހުރިލެއް އަވަސްކަމުން، ބަލިމީހާގެ ފައިގައި ހިފަހައްޓައިގެން އިން އެހީތެރިޔާގެ އިނގިއްޔެއް ވެސް ވަނީ ބުރިވެފައި. އެ އޮޕަރޭޝަންގައި ބައިވެރިވެފައި ވަނީ ލިސްޓަންގެ އިތުރުން ޑަކްޓަރުންގެ ބޮޑު ޓީމަކުން. އެ ޒަމާނަކީ އޮޕަރޭޝަން ތަކަށް ހޭނައްތާ އުޅުނު ޒަމާނެއް ނޫން. އެހެންކަމުން އޮޕަރޭޝަން ތަކުގައި އަވަސްވުމަކީ ބަލިމީހަށް ކުރާ ވޭން ކުޑަ ވާނެކަމެއް. އެކި އެކި ހާދިސާ ތަކުގައި ދިމާވާ އެކި އެކި މައްސަލަތަކުގެ ސަބަބުން ފައި ބުރިކޮށްލަން ޖެހުމަކީ އާންމު ކަމެއް. އެ ޒަމާނަށް ބަލާ ނަމަވެސް އެއީ އާންމު ކަމެއް.