ރުއްކުރިއަކީ ދިވެހިންގެ މެދުގައި ވަރަށް މަގުބޫލު އެއްޗެއް. ރަހަ މީރުވެފައި ހަށިގަނޑަށް އެތައް ފައިދާއެއް ލިއްބައިދޭ މި ކާނާއަކީ މާބަނޑު ދުވަސްވަރު ކާންވެސް ވަރަށް ރަނގަޅު އެއްޗެއް. އެކި ކަހަލަ ވިޓަމިންސް އާއި މިނަރަލްސް ގެ އިތުރުން ރުއްކުރީގައި "ފޯލިކް އެސިޑް" ކިޔާ މާއްދާއެއް ވޭ. ފޯލިކް އެސިޑް ނުވަތަ ވިޓަމިން ބީ9 އަކީ މާބަނޑު ދުވަސްވަރު (ހާއްސަކޮށް ކުރީކޮޅު) ބޭނުން ކުރުމުން، ބަނޑުގައިވާ ތުއްތު ދަރިފުޅަށް ލިބިދާނޭ އައިބުތަކުން ދުރުކޮށްދޭ މާއްދާއެއް. ހަމަ އެއާއެކު، ފޯލިކް އެސިޑް ގެ ސަބަބުން، މައިމީހާގެ ކިރު އުފައްދައިދޭ މިންވަރު އިތުރު ކޮށްދޭ. މީގެ އިތުރުން ރުއްކުރީގައި ދަގަނޑުގެ ބައި އެކުލެވިފައި ވުމުން، މާބަނޑު ދުވަސްވަރު، ބައެއް އަންހެނުންނަށް ދިމާވާ ލޭ މަދުވުމުގެ މައްސަލަ ދިމާވުމުގެ ފުރުސަތުވެސް ކުޑަކޮށްދޭ. އަދި، ރުއްކުރީގައި ފައިބަރުގެ ބައި އިތުރުވެފައި، ކާބޯހައިޑްރޭޓްގެ ބައި މަދު ވުމުގެ ސަބަބުން، މާބަނޑުވުމާ ގުޅިގެން ޖެހޭ ހަކުރު ބައްޔާއި ބަނޑު ހިކުމުގެ ފުރުސަތުވެސް ކުޑަކޮށްދޭ.