ޕްރިންސް ހެރީ އާއި މޭގަން މާރކަލް ޝާހީ ޒިންމާތަކުން ދުރުވެ 2020 ވަނަ އަހަރު ވަނީ އެމެރިކާއަށް ދިރިއުޅުން ބަދަލު ކޮށްފައެވެ. އަދި އޭގެ ފަހުން ހަމަ އެ އަހަރު އެދެމަފިރިން ވަނީ“އާރޗަވެލް ޕްރޮޑަކްޝަންސް” ގެ ނަމުގައި ޕްރޮޑަކްޝަން ކުންފުންޏެއް އުފައްދާފައެވެ. މި ކުންފުނީގެ ދަށުން ޕްރިންސް ހެރީ އާއި މޭގަން މާރކަލް ޕްރޮޑިއުސް ކުރާ އިތުރު 2 ސީރީޒްއެއް ނެޓްފްލިކްސްއަށް އަންނާނެކަން ނެޓްފްލިކްއިން ވަނީ ހާމަކޮށްފައެވެ.

ނެޓްފްލިކްސްއަށް އަންނަ މީގެއިން އެއް ސީރިޒްއަކީ، ކެއްކުމާއި ބަގީޗާ ހެެއްދުން އަދި ރަހްމަތްތެރިކަމާ ބެހޭ ސީރިޒްއެކެވެ. އަދި އަނެއް ސީރީޒްއަކީ ޕްރޮފެޝަނަލް ޕޯލޯ ކުޅުމާއި ބެހޭސީރީޒްއެކެވެ. ޕޯލޯއަކީ ޕްރިންސް ހެރީ ކުޑައިރުން ފެށިގެން ކުޅެމުން އަންނަ ކުޅިވަރެކެވެ.

މި ދެ ސީރީޒް ނެރޭނެ ތާރިހަކާއި އިތުރު ތަފްސީލު ކުރިޔަށް އޮތް މަސްތަކުގެ ތެރޭގައި އިއުލާންކުރާނެ ކަމަށް ނެޓްފްލިކްސް އިން ބުނެފައިވެއެވެ.

ޕްރިންސް ހެރީ އާއި މޭގަން ޝާހީ އާއިލާ ދޫކޮށްލިފަހުން 2022 ވަނަ އަހަރު ނެރުނު “ހެރީ އެންޑް މޭގަން” ޑޮކިއުމެންޓްރީ އަކީ ބެލުން ތެރިންގެ ތަރުހީބު އިންތިހާއަށް ލިބުނުޑޮކިއުމެންޓްރީއެކެވެ. މިހާތަނަށް މި ޑޮކިއުމެންޓްރީ 28 މިލިއަން މީހުން ބަލާފައިވެއެވެ. މި ޑޮކިއުމެންޓްރީގައި ބޮޑަށް އަލިއަޅުވާލާފައި ވަނީ އެދެމަފިރިންނަށް ޝާހީ އާއިލާ ތެރޭގައި ދިމާވި ދަތިތަކާއި އުނދަގޫތަކަށެވެ.