މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި ރޭ ކުޅުނު މެޗުތަކުން އެންމެ ފަހުގެ ޗެމްޕިއަން ޕޯޗުގަލް އާއި ދުނިޔޭގެ ޗެމްޕިއަން ފްރާންސުން މޮޅުވެއްޖެއެވެ.

މި މުބާރާތުގެ ގްރޫޕް އެފްގައި ރޭ ކުޅުނު ފުރަތަމަ މެޗުގައި ފަހުވަގުތު ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ވައްދާލި ދެލަނޑާއެކު އެ ޓީމުން 3-0 ގެ ތަފާތަކުން ހަންގޭރީ ބަލިކުރިއިރު، ޖަރުމަނު އަތުން ފްރާންސް މޮޅުވީ 1-0 އިންނެވެ.

ރޭގެ މެޗުގައި ޖެހި ދެލަނޑާއެކު ރޮނާލްޑޯ ވަނީ ޔޫރޯގެ މުބާރާތްތަކުގައި މިހާތަނަށް އެންމެ ގިނަ ލަނޑުޖެހި ކުޅުންތެރިޔާގެ ޝަރަފު ހޯދާފައެވެ. ކުރީން މި ރެކޯޑް އޮތީ ނުވަ ލަނޑުޖަހައިގެން ފްރާންސްގެ ލެޖެންޑް މިޝޭލް ޕްލެޓިނީ އަތުގައެވެ. ރޮނާލްޑޯ، މި ރެކޯޑް މުގުރާލީ 11 ލަނޑުޖަހައިގެންނެވެ. މީގެއިތުރުން، ރޭގެ މެޗާއެކު އޭނާ ވަނީ މިހާތަނަށް އެންމެ ގިނަ ޔޫރޯގައި ކުޅުނު ކުޅުންތެރިޔާގެ ޝަރަފު ހޯދާފައެވެ. މިއީ ޔޫރޯގެ ރޮނާލްޑޯ ކުޅޭ ފަސްވަނަ ފަހަރެވެ.

ހަންގޭރީގެ ޕުސްކަސް އެރީނާގައި ރޭ ކުޅުނު މި މެޗުގެ ފުރަތަމަ ހާފުގައި ޕޯޗުގަލް އަށް ލީޑްނަގަން ރަނގަޅު ފުރުޞަތެއްލިބި ޑިއޯގޯ ޔޮޓާ ވަނީ ބޭކާރުކޮށްލާފައެވެ. އޭނާ މި ބޯޅަ ފޮނުވާލިއިރު، އޭރިޔާތެރޭގައި މުޅީން ހުސްކޮށް ހުރި ރޮނާލްޑޯ ވަނީ ހިތްހަމަނުޖެހުން ފާޅުކޮށްފައެވެ. މި ހާފުގައި ރޮނާލްޑޯ އަށް ލަނޑުޖަހަން ލިބުނު ދެ ފުރުޞަތުގެ ވެސް ބޭނުންހިފޭގޮތެއްނުވިއެވެ. މެޗުގެ ކުރީކޮޅު ފޮނުވާލި ބޯޅަ ހަންގޭރީގެ ކީޕަރު ޕީޓަ ގުލާޝީ މަތަކުރިއިރު، މި ހާފު ނިމެންދަނިކޮށް ފޮނުވާލި ބޯޅަ ދިޔައީ ގޯލްގެ ދަނޑިކައިރިން ބޭރަށެވެ.

މި މެޗުގެ ދެވަނަ ހާފު ނިމެން 10 މިނެޓަށްވެފައިވަނިކޮށް ހަންގޭރީ އިން ގޯލެއް ކާމިޔާބުކުރިއެވެ. އެ ޓީމުގެ ޝަބޮލްޒް ޝޯން ފޮނުވާލި ބޯޅަ ގޯލްގެ ތެރެއަށް ވަނީ ޕޯޗުގަލްގެ ކީޕަރު ރުއީ ޕެޓްރީޝިއޯ އަތުގައި ޖެހިފައެވެ. މި ލަނޑުޖެހުމަށްފަހު ޝޯން އުފާ ފާޅުކުރަން ބެލިއިރު ލައިންސްމަން ހުރީ އޮފްސައިޑްކަމަށް ދިދާ ނަގައިގެންނެވެ. އޭގެ ހަތަރު މިނެޓުފަހުން، މި މެޗުގައި ޕޯޗުގަލް އިން ޖެހި ފުރަތަމަ ލަނޑު، ކާމިޔާބުކޮށްދިނީ ބޮރޫޝިއާ ޑޯޓްމަންޑްގެ އެޓޭކިން ފުލްބެކް ރަފައެލް ގަރޭރޯ އެވެ. އޭނާ ފޮނުވާލި ބޯޅަ ގޯލްގެ ތެރެއަށް ވަނީ ހަންގޭރީގެ ޑިފެންޑަރު ވިލީ އޮބާން ގައިގަ ޖެހިފައެވެ.

އޭގެފަހުން، މެޗުގެ 85 ވަނަ މިނެޓުގައި ޕޯޗުގަލްގެ ދެވަނަ ލަނޑުޖަހައިދިނީ ލިބުނު ޕެނަލްޓީއަކުން ރޮނާލްޑޯ އެވެ. މިއީ އެ ޓީމުގެ ރަފާ ސިލްވާ އަށް ހަންގޭރީގެ އޮބާން ކުރި ފައުލަކަށް ރެފްރީ ދިން ޕެނަލްޓީއެކެވެ. އަދި މެޗުގެ އިތުރުވަގުތުގައި ރޮނާލްޑޯ ވަނީ ޕޯޗުގަލްގެ ތިންވަނަ ލަނޑުޖަހައިދީފައެވެ. މިއީ ހަންގޭރީގެ ކީޕަރު ގުލާޝީ ކައިރިން ވަރަށް ރީއްޗަށް ނައްޓާލުމަށްފަހު ރޮނާލްޑޯ ކާމިޔާބުކުރި ގޯލެކެވެ.

މި މުބާރާތުގައި ރޭ ޖަރުމަނުގެ އެލިއާންޒް އެރީނާގައި ކުޅުނު މެޗުގައި ފްރާންސުން ޖެހި ގޯލަކީ މެޗުގެ 20 ވަނަ މިނެޓުގައި ޖަރުމަނުގެ ޑިފެންޑަރު މެޓް ހަމެލްސް އަތުން ބައިކޮޅަށް ވަތް ގޯލެކެވެ. ދެވަނަ ހާފުގެ ކުރީކޮޅު، ފްރާންސަށް ލީޑްނަގައިދޭން އެޑްރިއެން ރަބިއޯ އަށް ލިބުނު ފުރުޞަތުގައި ފޮނުވާލި ބޯޅަ އަމާޒުވީ ގޯލްގެ އަރިމަތީދަނޑިއަށެވެ.

އަދި އޭގެފަހުން، ފްރާންސްގެ ކުރިއަށް ކުޅެމުން އަންނަ ދެ ކުޅުންތެރިން ކަމަށްވާ ކަރީމް ބެންޒެމާ އާއި ކިލިއަން އެމްބާޕޭ ވެސް ގޯލެއް ކާމިޔާބުކުރިއެވެ. އެކަމަކު، ރެފްރީ ވަނީ ވީއޭއާރްގެ އެހީ ހޯދުމަށްފަހު މި ދެ ގޯލްޖެހިއިރު ވެސް އެމްބާޕޭ އޮފްސައިޑް މަގާމެއްގައި ހުރި ކަމަށް ނިންމައި، އެ ލަނޑުތައް ގަބޫލުނުކޮށްފައެވެ.