ޔޫރޯ ފުޓްބޯޅަ މުބާރާތުގައި މިރޭ ޗެކް ރިޕަބްލިކް އަތުން 1-0 އިން ހޯދީ މޮޅާއެކު އިންގްލެންޑުން ގްރޫޕް ޑީ ގެ އެއްވަނަ ކަށަވަރުކުރިއިރު، ސްކޮޓްލެންޑާ ދެކޮޅަށް ކްރޮއޭޝިއާ ކުޅުނު މެޗުން އެ ޓީމު މޮޅުވީ 3-1 އިންނެވެ.

މިނަތީޖާއާއެކު އިންގްލެންޑުން ކުޅުނު ތިން މެޗުން ހަތް ޕޮއިންޓް ހޯދާފައިވާއިރު، ކްރޮއޭޝިއާ ދެވަނައިގައި އޮތީ ހަތަރު ޕޮއިންޓާއެކު އެވެ. ތިންވަނައިގައި އޮތް ޗެކް ރިޕަބްލިކަށް ވެސް މި އަދަދަށް ޕޮއިންޓް ލިބިފައިވާއިރު، ކްރޮއޭޝިއާ އަށް ކުރިލިބެނީ ޖެހި ގޯލުންނެވެ. އެންމެ ފުލުގައި އޮތް ސްކޮޓްލެންޑަށް ލިބިފައިވަނީ އެއް ޕޮއިންޓެވެ.

އިންގްލެންޑުން މިރޭގެ މެޗަށް ނިކުތީ އެންމެ ފަހުން ސްކޮޓްލެންޑާ ދެކޮޅަށް ކުޅުނު މެޗުގެ ފުރަތަމަ އެގާރައަށް ހަތަރު ބަދަލެއް ގެނެސްގެންނެވެ. އެ މެޗުގައި އެ ޓީމުގެ ފުރަތަނަ އެގާރައިގައި ހިމެނުނު ޓައިރޮން މިންގްސް އާއި ރީސް ޖޭމްސްގެ އިތުރުން މޭސަން މައުންޓް އަދި ފިލް ފޯޑެންގެ ބަދަލުގައި ހެރީ މެގުއާ، ކައިލް ވޯކާ އާއި ބުކާޔޯ ސާކާ އަދި ޖެކް ގްރީލިޝް ވަނީ މި މެޗުގެ ފުރަތަމަ އެގާރައިގައި ހިމަނާފައެވެ.

ލަންޑަންގެ ވެމްބްލީ ސްޓޭޑިއަމްގައި މިރޭ ކުޅުނު މި މެޗު ފެށިގެން ދެވަނަ މިނެޓުގައި އިންގްލެންޑްގެ ރަހީމް ސްޓާލިން ވަނީ އެ ޓީމަށް ލީޑްނެގުމާ ގާތަށް ޖެހިލާފައެވެ. އެކަމަކު، ޕެނަލްޓީއޭރިޔާތެރެއިން ޗެކް ރިޕަބްލިކްގެ ކީޕަރު ތޯމަސް ވަސްލިކްގެ ބޯމަތިން ގޯލްގެ ތެރެއަށް އޮއްސާލަން ސްޓާލިން ފޮނުވާލި ބޯޅަ އަމާޒުވީ ގޯލްގެ އަރިމަތީދަނޑިއަށެވެ. އޭގެ ދިހަ މިނެޓުފަހުން، އިންގްލެންޑްގެ ފުރަތަމަ ލަނޑުޖަހައިދިނީ ވެސް ސްޓާލިން އެވެ. މިއީ ޖެކް ގްރީލިޝް ނަގައިދިން ހުރަހަކުން ލިބުނު ބޯޅައެއް ސްޓާލިން ބޮލުން ފޮނުވާލައިގެން ކާމިޔާބުކުރި ގޯލެކެވެ.

ފުރަތަމަ ހާފުގައި ޗެކް ރިޕަބްލިކަށް ލަނޑުޖަހަން ލިބުނު އެންމެ ރަނގަޅު ފުރުޞަތުގައި މި ހާފު ނިމެން 10 މިނެޓަށްވެފައިވަނިކޮށް އެ ޓީމުގެ މިޑްފީލްޑަރު ތޯމަސް ސޯޗެކް ފޮނުވާލި ބޯޅަ ދިޔައީ ގޯލްގެ ދަނޑިކައިރިން ބޭރަށެވެ. އޭގެކުރީން، މެޗުގެ 28 ވަނަ މިނެޓުގައި ޕެނަލްޓީއޭރިޔާބޭރުން އެ ޓީމުގެ ތޯމަސް ހޮލެޝް ފޮނުވާލި ބާރު ހަމަލާ އިންގްލެންޑްގެ ކީޕަރު ޖޯޑަން ޕިކްފޯޑް ވަނީ މަތަކޮށްފައެވެ.

ދެވަނަ ހާފުގައި، ޗެކް ރިޕަބްލިކުން އެއްވަރުކުރުމަށް ކުރި މަސައްކަތުގެ ތެރެއިން އެ ޓީމުގެ ފުލްބެކް ވްލަޑިމިރް ސޯފަލް ނަގައިދިން ހުރަހެއް ޕެޓްރިކް ޝިކް އާއި ސޯޗެކް އަށް ލިބުމުގެ ކުރީން އިންގްލެންޑްގެ ކީޕަރު ޕިކްފޯޑް ވަނީ ސަލާމަތްކޮށްފައެވެ.

މި މުބާރާތުގައި މިރޭ ކުޅުނު އަނެއް މެޗުގައި ސްކޮޓްލެންޑްގެ މައްޗަށް 3-1 އިން ކުރިހޯދައި، ކްރޮއޭޝިއާ އިން ވަނީ ދެވަނަ ބުރުގެ ޖާގައެއް ކަށަވަރުކޮށްފައެވެ. މިއީ ޔޫރޯ ފުޓްބޯޅަ މުބާރާތުގެ މެޗެއްގައި ކްރޮއޭޝިއާ އިން ތިން ލަނޑުޖެހި ތިންވަނަ ފަހަރެވެ. މީގެކުރީން، އެ ޓީމުން 1996 ވަނަ އަހަރުގެ މުބާރާތުގައި ޑެންމާކް އަތުން 3-0 އިން މޮޅުވިއިރު، ޔޫރޯ 2012 ގައި ރިޕަބްލިކް އޮފް އަޔާލެންޑް ބަލިކުރީ 3-1 އިންނެވެ.

ގްލާސްގޯގެ ހެމްޕްޑަން ޕާކްގައި ކުޅުނު މި މެޗުގައި ކުރީން ލީޑްނެގީ ކްރޮއޭޝިއާ އިންނެވެ. މެޗުގެ 17 ވަނަ މިނެޓުގައި އެ ޓީމަށް މިލަނޑުޖަހައިދިނީ ނިކޮލާ ވްލަސިޗް އެވެ. ފުރަތަމަ ހާފު ނިމުމުގެ ކުރީން ސްކޮޓްލެންޑަށް އެއްވަރުކޮށްދިނީ ކެލުމް މެގްރެގާ އެވެ. މިއީ ޕެނަލްޓީއޭރިޔާބޭރުން ފޮނުވާލި ހަމަލާއަކުން މެގްރެގާ ކާމިޔާބުކުރި ރީތި ގޯލެކެވެ.

މި މެޗުގައި ކްރޮއޭޝިއާ އަށް ދެވަނަ ފަހަރަށް ލީޑްނަގައިދިނީ އެ ޓީމުގެ ކެޕްޓަން ލޫކަ މޮޑްރިޗް އެވެ. މިއީ ޕެނަލްޓީއޭރިޔާތެރެއިން މޮޑްރިޗް ކާމިޔާބުކުރި ހިތްގައިމު ގޯލެކެވެ. އޭގެފަހުން، މޮޑްރިޗް ދިން ބޯޅައަކުން ކްރޮއޭޝިއާގެ ތިންވަނަ ލަނޑުޖަހައިދިނީ އިވާން ޕެރިސިޗް އެވެ. ޕެރިސިޗް މިލަނޑުޖެހީ މޮޑްރިޗް ނަގައިދިން ކޯނަރަކުން ލިބުނު ބޯޅައެއް ބޮލުން ގޯލްގެ ތެރެއަށް ފޮނުވާލައިގެންނެވެ.