ނެދަލެންޑްސް ސިއްސުވާލުމަށްފަހު ޗެކް ރިޕަބްލިކް ކުއާޓާ ފައިނަލަށް

މިހާރު ކުރިއަށްދާ ޔޫރޯ ފުޓްބޯޅަ މުބާރާތުގައި މިރޭ ކުޅުނު ދެވަނަ ބުރުގެ މެޗުގައި ނެދަލެންޑްސް ސިއްސުވާލުމަށްފަހު ޗެކް ރިޕަބްލިކުން އެ މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ. މި މެޗުން ޗެކް ރިޕަބްލިކް މޮޅުވީ 2-0 އިންނެވެ.

މިރޭގެ މެޗާއެކު ނެދަލެންޑްސް ވަނީ މި މުބާރާތުގައި ނޮކްއައުޓް ބުރުގައި އެންމެ ފަހުން ކުޅުނު ތިން މެޗުން ވެސް ބަލިވެފައެވެ. މިއީ 2004 ވަނަ އަހަރުގެ ޔޫރޯގެ ފަހުން ޗެކް ރިޕަބްލިކުން މި މުބާރާތުގެ ކުއާޓާ ފައިނަލަށް ދަތުރުކުރި ފުރަތަމަ ފަހަރެވެ. އަދި މިއީ ނެދަލެންޑްސްއާ ދެކޮޅަށް ޗެކް ރިޕަބްލިކް އެންމެ ފަހުން ކުޅުނު ހަތަރު މެޗުގެ ތެރެއިން މޮޅުވި ހަތަރުވަނަ ފަހަރެވެ. 

ބުޑަޕެސްޓްގެ ޕުސްކަސް އެރީނާގައި މިރޭ ކުޅުނު މި މެޗުގެ ފުރަތަމަ ހާފުގައި ނެދަލެންޑްސް އަށް މާ ރަނގަޅު ފުރުޞަތުތަކެއް ތަނަވަސްކުރެވިފައިނުވާއިރު، ޗެކް ރިޕަބްލިކުން ދިޔައީ ކެނޑިނޭޅި އެ ޓީމުގެ ޑިފެންސަށް ބާރު ބޮޑުކުރަމުންނެވެ. އެގޮތުން، މެޗުގެ 28 ވަނަ މިނެޓުގައި ޗެކް ރިޕަބްލިކްގެ ފޯވާޑް ޕެޓްރިކް ޝިކް ފޮނުވާލި ބޯޅަ ނެދަލެންޑްސް ކީޕަރު މާޓެން ސްޓެކެލެންބާގް މަތަކުރިއެވެ. އަދި އޭގެފަހުން، ފުރަތަމަ ހާފުގައި ޗެކް ރިޕަބްލިކަށް ލިބުނު އެންމެ ރަނގަޅު ފުރުޞަތުގައި އެންޓޮނިން ބަރަކް ފޮނުވާލި ބޯޅަ ނެދަލެންޑްސްގެ ޑިފެންޑަރު މަތައިސް ޑި ލިޓް ބްލޮކް ކުރިއެވެ.

ދެވަނަ ހާފުގެ ކުރީކޮޅު ނެދަލެންޑްސްގެ މެމްފިސް ޑިޕާއީ ތަނަވަސްކުރި ފުރުޞަތަކުން އެ ޓީމުގެ ޑޮންޔެލް މާލެން އަށް ރަނުގެ ފުރުޞަތެއްލިބި ވަނީ ބޭކާރުވެފައެވެ. ޗެކް ރިޕަބްލިކްގެ ކީޕަރު ތޯމަސް ވަސްލިޗް ކައިރިން ނައްޓާލުމަށްފަހު ގޯލްގެ ތެރެއަށް ފޮނުވާލަން މާލެން ކުރި މަސައްކަތް ކާމިޔާބުވާގޮތެއްނުވިއެވެ. މާލެން ފޮނުވާލި ބޯޅަ ވަސްލިޗް ވަނީ ހުއްޓުވާފައެވެ.

އޭގެ އެއް މިނެޓުފަހުން، ނެދަލެންޑްސްގެ ޑިފެންޑަރު ޑި ލިޓް އަތުން ގެއްލުނު ބޯޅައެއް ހޯދަން ކުރި މަސައްކަތުގެ ތެރެއިން ޗެކް ރިޕަބްލިކްގެ ފޯވާޑް ޝިކް އަށް ހުރަސްއެޅުމުގެ ގޮތުން ބޯޅައިގައި އަތްލުމުން ރެފްރީ ވަނީ ޑި ލިޓަށް ރީނދޫ ކާޑެއް ދައްކާފައެވެ. އެކަމަކު، ފަހުންް ވީއޭއާރްގެ އެހީ ހޯދުމަށްފަހު ރެފްރީ ވަނީ ކުރީގެ ނިންމުން ބަދަލުކޮށް، ޑި ލިޓަށް ރަތް ކާޑު ދައްކާ ދަނޑުން ފޮނުވާލާފައެވެ.

ކުޅުންތެރިއަކު މަދުވުމުން ނެދަލެންޑްސް އަށް މައްސަލަތައް ކުރިމަތިވެ، އެކަށީގެންވާ ފަދަ އެޓޭކެއް އުފެއްދުމަށް އުނދަގޫތަކާ ކުރިމަތިވެފައިވަނިކޮށް ޗެކް ރިޕަބްލިކުން އޭގެ ފައިދާނަގައި މެޗުގެ 68 ވަނަ މިނެޓުގައި ތޯމަސް ހޮލޭޝް ވަނީ ނަތީޖާ 1-0 އަށް ބަދަލުކޮށްލާފައެވެ. މިއީ އެ ޓީމުގެ މިޑްފީލްޑަރު ބަރަކް ނަގައިދިން ހިލޭޖެހުމަކުން ލިބުނު ބޯޅައެއް ހޮލޭޝް ބޮލުން ފޮނުވާލައިގެން ކާމިޔާބުކުރި ގޯލެކެވެ. އަދި އޭގެފަހުން، މެޗު ނިމެން 10 މިނެޓަށްވެފައިވަނިކޮށް ހޮލޭޝް ތަނަވަސްކުރި ފުރުޞަތަކުން ޗެކް ރިޕަބްލިކަށް ކުއާޓާ ފައިނަލްގެ ޖާގައެއް ކަށަވަރުކޮށްދިނީ ޝިކް އެވެ.

މި ގޯލާއެކު ޝިކް ވަނީ ޔޫރޯގެ މުބާރާތެއްގައި ޗެކް ރިޕަބްލިކަށް ހަތަރު ލަނޑުޖަހައިދިން ދެވަނަ ކުޅުންތެރިޔާގެ ޝަރަފު ހޯދާފައެވެ. މީގެކުރީން، 2004 ވަނަ އަހަރުގެ މުބާރާތުގެ ޓޮޕް ސްކޯރާގެ މަގާމު ހޯދި ކުރީގެ ފޯވާޑް މިލާން ބަރޮސް ވަނީ ފަސް ލަނޑުޖަހާފައެވެ.

މިހާތަނަށްއައިއިރު މި މުބާރާތުގެ ކުއާޓާ ފައިނަލުން ޖާގަ ކަށަވަރުކޮށްފައިވަނީ ޗެކް ރިޕަބްލިކްގެ އިތުރުން އިޓަލީ އާއި ޑެންމާކެވެ. ޗެކް ރިޕަބްލިކުން ކުއާޓާ ފައިނަލްގައި ނިކުންނާނީ ޑެންމާކާ ދެކޮޅަށެވެ. މި ދެ ޓީމު ބައްދަލުކުރާ މެޗު އޮންނާނީ އަންނަ ޖުލައި މަހުގެ 3 ވަނަ ދުވަހު ބަކޫގެ އޮލިމްޕިކް ސްޓޭޑިއަމްގައެވެ.