ސަލްވިޔާ ހިސްޕެނިކާ ނަމަކަށް ކިޔާ އާއިލާއަށް ނިސްބަތްވާ މި ގަހާއި ބެހޭގޮތުން މި ފަހަކުން ހެދޭ ދިރާސާތައް ވަނީ ގިނަވެފައެވެ. ދިރާސާތަކުން ފެންނަ ނަތީޖާތައް ރަގަޅުވުމާއި އެކު މިއީ "ސުޕަރފުޑް" ގެ ގޮތުގައި އަންނަނީ ބެލެވެމުންނެވެ. ޚާއްސަކޮށް ޗިއާ ސީޑް ބޭނުންކުރުމުން ބަރުދަން ލުއިކުރުމަށް އެއްވެސް އެހީތެރިކަމެއް ލިބޭތޯ އާއި ލިބެނީ ކިހިނެތް ބޭނުން ކުރުމުން ކަން ބެލުމަށް ވަރަށް ގިނަ ދިރާސާތައް ކުރެވެއެވެ.

ޗިއާ ސީޑް ބޭނުން ކުރުމުން ބަރުދަން ލުއިކުރުމަށް އެހީތެރިވަނީ، ޗިއާ ސީޑްގައި ޕްރޮޓީން އާއި ފައިބަރ ހިމެނޭ އަދަދު އިތުރު ވެފައި، އޭގައި ހިމެނޭ ކެލޮރީ މަދުވުމުންނެވެ. ފައިބަރ އާއި ޕްރޮޓީންގެ ސަބަބުން ބަނޑުފުރިފައި ހުންނަ ކަމުގެ އިހުސާސް ގިނަ ވަގުތަށް ހުންނާނެއެވެ، އެހެންކަމުން އެހެން އެއްޗެހި ކާހިތްވުން ކުޑަވެ، ކެޔަސް ކެވޭ މިންވަރު މަދުވާނެއެވެ.

26 މީހަކު ބޭނުން ކޮށްގެން 2014 ވަނަ އަހަރު ހެދުނު ދިރާސާއެއްގައި ކޮންމެ ދުވަހަކު 35 ގްރާމްގެ މުގުރި ޗިއާ ސީޑް ދެވުނެވެ. 12 ހަފްތާފަހުން ބެލި ބެލުމުން އެނގުނު ގޮތުގައި، ނިސްބަތުން ބަރުދަން އެންމެ ބޮޑަށް ލުއިވެފައިވަނީ، ދިރާސާ ފެށިއިރު ބަރުދަން އެންމެ މަތިކޮށް ތިބި މީހުނެވެ. މީގެ އިތުރުން ވެސް މި ދިރާސާއިން އެނގުނު ގޮތުގައި ޗިއާ ސީޑް ބޭނުން ކުރުމުގެ ސަބަބުން ހަށިގަނޑުގައިވާ "ނުބައި" ކޮލެސްޓްރޯލްގެ މިންވަރު ވަރަށް ބޮޑުތަނުން ދަށްވިއެވެ.

77 މީހުން ބޭނުންކޮށްގެން ހެދުނު އިތުރު ދިރާސާއަކުން އެނގުނު ގޮތުގައި، 6 މަސްވަންދެން ކޮންމެ ދުވަހަކު 300 ގްރާމް ޗިއާ ސީޑް ބޭނުންކުރި މީހުންގެ ތެރެއިން އެވްރެޖްކޮށް ކޮންމެ މީހަކުވެސް 1.9 ކިލޯ ލުއި ވިއެވެ. އަދި މީހުންގެ ހަށިގަނޑުން ފެނުނު އެންމެ ފާހަގަ ކުރެވޭ ކަމަކީ އެމީހުންގެ އުނަގަނޑުގެ ވަށައިގެންވާ ސަރުބީތައް ވަރަށް ބޮޑަށް ވިރި، އުނގަނޑުގެ ވަށަމިން ކުޑަވި ކަމެވެ.

ބަރުދަން ލުއިކުރަން ނޫނަސް ޗިއާ ސީޑަކީ ކެއުމުގައި ބޭނުން ކުރަން ރަގޅު އެއްޗެކެވެ. ޗިއާ ސީޑް، ހަށިގަނޑުގެ އެތެރޭގައިވާ ދުޅަ ތިރިކުރުމަށް އެހީތެރިވެއެވެ. ލޭގައި ހަކުރު ހުންނަ މިންވަރު ދަށްކޮށްދީ، ހަޖަމްކުރުމުގެ ނިޒާމް ފަސޭހަކޮށްދެއެވެ. ލޭގެ ޕްރެޝަރ ދަށްކޮށްދީ، ލޭ ގަނޑުވުމުން ދުރުކުރުމާއި އެކު ކޮލެސްޓްރޯލްގެ މިންވަރު ރަގަޅު ހަމައިގައި ބެހެއްޓުމަށް އެހީތެރިވެދެއެވެ.

ޗިއާ ސީޑަކީ ބޭނުން ކުރަން ވަރަށް ފަސޭހަ އެއްޗެކެވެ. ހެނދުނުގެ ޖޫސްތައްޓަށް ނުވަތަ ސެލެޑަށް އަޅައިގެން ވެސް ކާންވިއެވެ. ފެނުގެ ތެރޭގައި 20 މިނިޓް ވަރު ބެހެއްޓުމަށް ފަހުވެސް ބޯލަން ވީއެވެ. ޔޯގަޓް ފަދަ އޮލަ އެއްޗެއްގެ ތެރެއަށް އަޅައިގެންވެސް ބޭނުން ކުރެވޭނެއެވެ.