ހާސްކަމާއި ނުތަނަވަސްކަން ނުވަތަ ފިކުރުބޮޑުވުމާއި ކަންބޮޑުވުން، އިނގިރޭސިބަހުން ނުވަތަ އާއްމުކޮށް އެނގޭނޭހެން ބުނާނަމަ ސްޓްރެސް އަކީ މިއަދު އަހަރެމެންގެ ތެރޭގައި އާއްމުވެފައިވާ ބޮޑު "ބަލިމަޑުކަމެކެވެ"! އެތައް ބައްޔަކަށް އިންސާނާ ހުށަހަޅާ ބޮޑު ވޭނެކެވެ! ތިމާއަށް އިނގުން ނުވާ، ޖަޒުބާތީ އިހުސާސެކެވެ! ހައްލުކުރާން އުނދަގޫ، ބަރުދާސްތުކުރަން ދަތި، ހިތުގެ ހިޔާލުތަކެކެވެ! ސިކުނޑިއަށް ބުރަކަން ދީފައިވާ ފިކުރުތަކެކެވެ!

އާދޭހެވެ! ސްޓްރެސް އަކީ ޒާތެއްގެ އެއްޗެކެވެ. ދަރިމައިވުމުގެ ސިއްހަތަށް މިއީ އަމުދުން އޭގެ އުނދަގޫ ބޮޑު ކަމެކެވެ! ދަރިމައިވުމަށް ދަތިކަން ހުންނަ ފަރާތްތަކަށް ސްޓްރެސްގެ ސަބަބުން ރިހޭފައިމައްޗަށް ފޮއެ ވެއްޓޭތަން އާދެއެވެ! ހަމަ އެއާއިއެކު ސްޓްރެސް ކުޑަ، ދެމަފިރިންނަށް ދަރިމައިވުން މާ ބޮޑު އުނދަގުލެއް ކަމުގައި ނުވާތަންވެސް ފެނެއެވެ! ކޮންމެކަމެއް ކޮންމެ ގޮތަކަށް ވިއެއްކަމަކު، ﷲ ގެ ނިޔާފުޅުން ނޫނީ ހަމަ އެއްމެ ކަމެއްވެސް ނުހިނގާނެތެވެ! މި ސަބަބާއި ހުރެވެސް ސްޓްރެސް ކުޑަ ދިރިއުޅުމެއް އިހްތިޔާރު ކުރުމީ ﷲ އާއި ތިމާގެ ގުޅުން ބޮޑުވެ، ދަރިމައިވުމަށްވެސް ފަސޭހަވެދާނެ ކަމެކެވެ!

ސްޓްރެސްގެ ސަބަބުން ދަރިމައިވުމަށް އުނދަގު ކުރުވާ ސަބަބުތައް ބައިވަރެވެ. އެގޮތުން އިންސާނާގެ ހަށިގަނޑުގައިވާ ހޯމޯނުތަކުގެ ހަމަހަމަކަން ނަގާލާއެއްޗެއްކަމުގައި ސްޓްރެސް ވެދެއެވެ. ދަރިމައިވުމުގެ ބޮޑު ބައެއް ނުވަތަ ދައުރެއް އަދާކުރާ އެކައްޗަކީ އިންސާނާގެ ހަށިގަނޑުގައިވާ ހޯމޯނުތަކެވެ. ސްޓްރެސްގެ ސަބަބުން ކޯޓިސޯލް ނަމަކަށް ކިޔާ ހޯމޯނެއް ހަށިގަނޑުގައި އުފައްދާ، ލޭގެ ތެރޭގައި ދައުރު ކުރުވާނެއެވެ. ކޯޓިސޯލް ހޯމޯނަކީ އަންހެނަކު ދަރިމައިވުމަށް އެހީތެރިވެދޭ އީސްޓްރޮޖެން އަދި ޕްރޮޖެސްޓްރޯން ނަމަކަށް ކިޔާ ދެ ހޯމޯނުގެ ހަމަހަމަކަން ނަގާލާ، އޭގެ އަސްލު ހިނގުމަށް ބުރޫ އަރުވާ ހޯމޯނެކެވެ. މި ދެ ހޯމޯނުގެ ހިނގުން ގަޑުބަޑުކޮށް، ބުރޫއަރުވާނެއެވެ. މިކަމުގެ ނަތީޖާ އަކަށް ވަނީ ގަވާއިދުން މައްސަރުކަންކަން ދިމައިނުވުމާއި، މައްސަރުކަންކަމުގައި މައްސަލަ ޖެހުމާއި، ބިސްދޫކުރުމުގެ ތަރުތީބާއި ހަމަ ގެއްލުމެވެ. މިއީ ހައްތަހާވެސް ދަރިމައިވުމަށް އުނދަގޫ ކުރުވާ ކަންކަމެވެ.

ފިރިހެނާ އަކީވެސް ސްޓްރެސްވާ މީހެއްނަމަ، އޭނާގެ ހަށިގަނޑުގައިވާ ފިރިހެން ހޯމޯނު ނުވަތަ ޓެސްޓިސްޓެރޯން ނަމަކަށް ކިޔާ ހޯމޯނުގެ ހަމަ އާއި ތަރުތީބުވެސް ގެއްލިދާނެއެވެ. އަދި މިއީ ދިގު ދެމިގެންދާ ސްޓްރެސް އެއް ނަމަ، ދަރިފަނީގެ ފެންވަރު ދައްވުމުގެ ފުރުސަތު އޮވެއެވެ. ދަރިފަނީގެ އަދަދު މަދުވުމާއި، ދުވެލި މަޑުވުމާއި، އައިބު ހުރުންފަދަ ކަަންކަމީ ސްޓްރެސްގެ ސަބަނުން ޓެސްޓިސްޓެރޯނަށް އަންނަ ބަދަލުތަކުގެ ނަތީޖާއެވެ. މީގެ އިތުރުން ދެމަފިރިކަމުގެ ގުޅުން ހިންގުމަށްވެސް ބޮޑެތި ގޮންޖެހުންތަކެއް ކުރިމަތިވުމީވެސް ސްޓްރެސްގެ ސަބަބުން ދިމައިވެދާނެ ކަންކަމެވެ.

ސްޓްރެސް ގެ ސަބަބުން އަންހެނާގެ ހޯމޯނުތަކަށް ބަދަލުތަކެއް އައިސް، މައްސަރުކަންކަމާއި ބިސްދޫކުރުމުގެ ތަރުތީބާއި ހަމަ ގެއްލި އޮޅުންބޮޅުންވެދެއެވެ. ފިހިހެނާގެ ދަރިފަނީގެ ފެންވަރު ދަށްވެއެވެ. އަންހެނާގެ މައްސަރުކަންކަމާއި ބިސްދޫކުރާ ކުރުމާއި، ފިރިހެނާގެ ދަރިފަނީގެ ފެންވަރާއި، ދެމަފިރިކަމުގެ ގުޅުމަކީ ދަރިމައިވުމަށް އަސާސީ ކަންކަމެވެ. ވީއިރު މިކަންކަމަށް ބުރޫ އަރާ ހަމަ ކޮންމެ ކަމަކީ ދަރިމައިވުމަށް ހުރި ހުރަހެއް ނުވަތަ އުނދަގުލެއް ކަމުގައިވާނެއެވެ. އެފަދައިން ސްޓްރެސް އަކީވެސް ދަރިމައިވުމަށް ހުރި ގޮންޖެހުމެކެވެ.

ދަރިމައިވުމަށް އުނދަގޫތަކެއް ކުރިމަތިވާނަމަ، މިކަމާ އަޅެ ވިސްނާލަ ބަލާށެވެ. ދުވަސްކޮޅަކަށް ސްޓްރެސްތަކާއި ދުރަށް ޖެހިލާށެވެ! ސީދާ ކަމަށް ހުސްވެ، ﷲ އާއި ތިބާގެ ނަފުސާއި ދެމެދު އޮންނަ އިތުބާރާއި ގުޅުން ބަދަހިކުރާށެވެ! އެކަލާންގެ ހަޟްރަތުން އުންމީދު އެދޭ ހާލު، ނުބައި ހިޔާލުތަކުން ދުރުވާށެވެ! އިންޝާ ﷲ، ކާމިޔާބު ވާނެއެވެ!

 

ހަވާލާ: ހެލްތްލައިން 2024، "ސްޓްރެސް - "އަ ތްރެޓް ފޯރ ފާޓިލިޓީ".