ކިތަންމެ ރީތިކޮށް ފެންވަރާ ސާފުތާހިރު ވެގެން އުޅުން ނަމަވެސް ކޮންމެ މީހެއްގެ ހަށިގަނޑުގައިވެސް ކޮންމެސް ވަހެއް ހުންނާނެއެވެ. ހަށިގަނޑުން ދުވާ ވަސް މީހާގެ ޞިއްޙާތާއި ބެހޭގޮތުން ވަރަށް ގިނަ ކަންކަން ބުނެދެއެވެ. އޮސްޓްރޭލިޔާގެ މުކޯރީ ޔުނިވަރސިޓީގެ ސައިކޮލޮޖިސްޓް މެހެމަތު މަހުމޫތު ހާމަކުރި ގޮތުގައި، އެކި ދިރާސާތަކުން އެކި ގޮތަށް ނަތީޖާ ފެނުން ނަމަވެސް، އާންމު ކެއުމުގައި މަހުގެ ބާވަތްތައް ގިނައިން ބޭނުންކުރާ މީހުންގެ ހަށިގަނޑު ދުވާ ވަސް، އެނޫން އެއްޗެހި ކާ މީހުންގެ ހަށިގަނޑުން ދުވާ ވަހަށް ވުރެ ހިތްގައިމެވެ. އަދި ކޮލެރާ ޖެހިފައި ތިބޭމީހުންގެ ހަށިގަނޑުން ފޮނި ވަހެއް ދުވާކަމަށް ފާހަގަ ކުރެވޭ އިރު، ހަކުރު ބަލީގެ މީހުންގެ ގައިން،  އާފަލު ހަލާކުވުމުން ދުވާ ފާޑުގެ ވަހެއް ދުވާ ކަމަށް އެމީހުންގެ ދިރާސާތަކުން ވަނީ ދައްކާފައެވެ.

ފިރިހެނުންނަށް އަންހެނުންގެ ގައިން އެންމެ މީރުވަސް ދުވާކަމަށް ފާހަގަ ކުރެވިފައިވަނީ އަންހެނުންގެ ބިސް ނިކުންނަ ދުވަސްވަރުއެވެ. އަދި އެންމެ ގަޔާނުވާ ވަހެއް ދުވާ ކަމަށް ބުނެވެނީ އަންހެނުންގެ މައްސަރުގެ ދުވަސްވަރުއެވެ. އިންސާނުންގެ ގައިން ދުވާވަހުގައި އެމީހުންގެ ޖީންގެ ވަރަށް ބޮޑު ދައުރެއްވެއެވެ. އެއްމާބަނޑު މީހުންގެ ހަށިގަނޑުން ދުވާ ވަސް އެއްގޮތްކަމަށް ވެސް ދިރާސާތަކުން ވަނީ ހޯދިފައެވެ.

މީގެ އިތުރުން މީހުނާ އިނދެގެން އުޅޭ މީހުނާއި ހުސްހަށިބަޔަށް ތިބޭ މީހުންގެ ގައިން ދުވާ ވަހުގައިވެސް ތަފާތު ހުންނަކަން ވަނީ ދިރާސާތަކުން ދައްކާފައެވެ. މިހެންވަނީ ޖިންސީ ނިޒާމާއި ގުޅުން ހުރި ގުނަވަންތަކުގައި އުފައްދާ ހޯމޯނެއް ކަމަށްވާ ޓެސްޓޮސްޓެރޯންގެ ސަބަބުންނެވެ. މީހުނާ އިނދެގެން ދަރިން ލިބި އުމުރުން 40 އިން މައްޗަށް ގޮސްފައިވާ މީހުންގެ ޓެސްޓޮސްޓެރޯންގެ މިންވަރު އެއަށް ވުރެ ޒުވާންކޮށް ހުސްހަށިބަޔަށް ތިބޭ މީހުނަށްވުރެ ދަށްވާނެއެވެ. މި ދެބައި މީހުން ބައިވެރިކޮށްގެން ހެދުނު ދިރާސާތަކުން އެނގުނުގޮތުގައި ހުސްހަށިބައި މީހުންގެ ގައިން ދުވާވަސް، މިހުނާ އިނދެގެން އުޅޭމީހުންގެ ގައިން ދުވާ ވަހަށްވުރެ ގަދައެވެ. އަދި މިއީ ޓެސްޓޮސްޓެރޯންގެ މިންވަރު މަތިވުމާއި ދަށްވުމާ ގުޅުން ހުރި ކަމެއް ކަމަށްވެސް ވަނީ ބެލެވިފައެވެ.