މާބަނޑުދުވަސްވަރަކީ އަންހެނުންގެ ހަޔާތުގައި އެންމެ މުހިންމު އަދި ޚާއްޞަ ދުވަސްވަރެވެ. ނަމަވެސް، މި ދުވަސްވަރު ބައެއް އަންހެނުންނަށް ހަކުރުބަލި ނުވަތަ ގެސްޓޭޝަނަލް ޑައިބެޓީސް ޖެހުމަކީ އެކަށީގެންވާ ކަމެކެވެ. މި މަޒުމޫނުގައި އަޅުގަނޑުމެން ބަލައިލާނީ މާބަނޑުދުވަސްވަރު ހަކުރު މަތިވެއްޖެނަމަ، އެކަން ކޮންޓްރޯލް ކުރާނެ ގޮތްތަކަށެވެ.

ފުރަތަމަ ކަމަކަށް، ކެއުމުގެ އާދަތައް ބަދަލުކުރުމަކީ ވަރަށް މުހިންމު ކަމެކެވެ. ހަކުރު އަދި ކާބޯހައިޑްރޭޓް ގިނަ ކާނާ މަދުކޮށް، ފައިބަރު އަދި ޕްރޮޓީން ގިނަ ކާނާ ކެއުމަށް އިސްކަންދޭންވާނެއެވެ. މިސާލަކަށް ތަރުކާރީ، މޭވާ، މަސް އަދި ބިސް ފަދަ ތަކެތި ކެއުމަށް އާދަކުރަންވާނެއެވެ. ގޮދަން ފުށާއި ހުދު ހަނޑުލާއި، ނޫޑުލިސް އަދި ޕާސްޓާ ފަދަ ކެއުންތައް މަދުކުރެވިދާނެއެވެ. އޭގެ ބަދަލުގައި އާޓާ ފުށާއި ބްރައުން ރައިސް ނުވަތަ ރަތް ހަނޑޫ ބޭނުން ކުރެވިދާނެއެވެ. އަދި ހަކުރު ގިނަ ބުއިންތަކާއި ތައްޔާރީ ކާނާ ކެއުމުން ދުރުހެލިވާންވާނެއެވެ. ހަކުރު މަދުކުރުމަށް ހިކަނދިފަތަކީ މުހިއްމު ދައުރެއް އަދާކުރާ ފަތެކެވެ. މީގެ އިތުރުން ފެނަށް އޯބަތް އަޅާފައި އެއް ރޭ ވަންދެއް ބެެހެއްޓުމަށްފަހު، އެ ފެން ބުއިމަކީވެސް ހަކުރު ދަށްކުރުމަށް އެހީތެރިވެދޭނެ އެއްޗެއް ކަމުގައިވެސް ދިރާސާވެރިން ފާހަގަ ކުރެއެވެ.

ދެވަނަ ކަމަކަށް، ޤަވާއިދުން ކަސްރަތުކުރުމަކީ ހަކުރު ދަށްކުރުމަށް ވަރަށް މުހިންމު ކަމެކެވެ. ނަމަވެސް، މާބަނޑު މީހުން ކަސްރަތު ކުރަންވާނީ ޑޮކްޓަރެއްގެ ލަފާގެ މަތިންނެވެ. އާންމުކޮށް ހިނގުމާއި ފެތުމަކީ މާބަނޑު މީހުންނަށް އެކަށީގެންވާ ކަސްރަތުތަކެވެ.

ތިންވަނަ ކަމަކަށް، ޤަވާއިދުން ހަކުރުގެ މިންވަރު ބެލުމަކީ ވަރަށް މުހިންމު ކަމެކެވެ. މިކަމަށްޓަކައި ގްލޫކޯމީޓަރެއް ބޭނުންކޮށްގެން ގަވާއިދުން ހަކުރުގެ މިންވަރު ބަލަންވާނެއެވެ. އަދި މި މަޢުލޫމާތު ޑޮކްޓަރާ ހިއްސާކުރަންވާނެއެވެ.

ހަތަރުވަނަ ކަމަކަށް، ނިދުމާއި ސްޓްރެސް މެނޭޖްކުރުމަކީވެސް މުހިންމު ކަމެކެވެ. ރަނގަޅަށް ނިދުމާއި، ސްޓްރެސް ކުޑަކުރުމަކީ ހަކުރު ކޮންޓްރޯލް ކުރުމަށް އެހީވެދޭނެ ކަންކަމެވެ.

ފަސްވަނަ ކަމަކަށް، މާބަނޑު ދުވަސްވަރު ހަކުރު މަތިކޮށް ހުންނަ ނަމަ، ބައެއް ހާލަތްތަކުގައި ބޭސް ބޭނުންކުރަން ޖެހިދާނެއެވެ. މިސާލަކަށް އިންސިއުލިން ބޭނުންކުރަން ޖެހިދާނެއެވެ. ނަމަވެސް، މިފަދަ ބޭސް ބޭނުންކުރަންވާނީ ހަމައެކަނި ޑޮކްޓަރެއްގެ ލަފާގެ މަތިންނެވެ. 

މާބަނޑުދުވަސްވަރު ހަކުރު މަތިވުމަކީ އޭގެ ސަބަބުން މައިމީހާ އަށާއި ކުޑަކުއްޖާއަށް މައްސަލަތަކެއް ކުރިމަތިވެދާނެ ކަމެއް ކަމުގައިވިޔަސް، ރަނގަޅު ފަރުވާއާއެކު ހަކުރު ކޮންޓްރޯލު ކުރެވިއްޖެނަމަ މިއީ އޭގެ ގެއްލުން ނައްތާލެވިދާނެ ކަމެކެވެ. ކެއުމުގެ އާދަތައް ބަދަލުކުރުމާއި، ކަސްރަތުކުރުމާއި، ޤަވާއިދުން ހަކުރު ބެލުމާއި، ޑޮކްޓަރުގެ ލަފާގެ މަތިން ޢަމަލުކުރުމަކީ މިކަމުގައި އެންމެ މުހިންމު ކަންކަމެވެ. މިގޮތަށް ޢަމަލުކުރުމުން، މަންމައާއި ކުއްޖާގެ ދުޅަހެޔޮކަން ކަށަވަރުކުރެވި، ދުޅަހެޔޮކަން އިތުރު ކުރެވޭނެއެވެ. 

 

ހަވާލާ: ޕަބްމެޑް، ޖީ.ޑީ.އެމް އެންޑް އިޓްސް ޓްރީޓްމެންޓް، 2023، ޑރ.އެމާ ހާޓްސް