ތީރު މަޖައްލާއަކީ، ތީރު މީޑިޔާ ގްރޫޕް ޕްރައިވެޓް ލިމިޓެޑްގެ ދަށުން، 2021 ވަނަ އަހަރުގެ އޮގަސްޓް މަހުގެ 16 ވަނަ ދުވަހު ނެރެންފެށި މަޖައްލާއެކެވެ. މި މަޖައްލާއަށް އެއް އަހަރު ފުރުމާއި ގުޅިގެން މަޖައްލާއާއި ގުޅޭ ބައެއް މުހިންމު މައުލޫމާތު މި ރިޕޯޓްގައި ހިމަނާލާނަމެވެ.

ތަޢާރަފް:

ތީރު މަޖައްލާއަކީ، ސިޔާސީ ނުފޫޒާއި، ވަކިކޮޅަކަށް ބުރަވެފައިވާ ޚަބަރުތައް ނުހިމަނާ، މައުލޫމާތާއި މުނިފޫހި ފިލުވުމުގެ މައުލޫމާތު ގެނެސް ދިނުމަށް ޚާއްސަ އޮންލައިން މަޖައްލާއެއް ނެރުމުގެ މަޤްޞަދުގައި 3 ޒުވާނަކު އިސްނަގައިގެން ކުރި މަސައްކަތުން ވުޖޫދު ކުރެވުނު މަޖައްލާއެކެވެ. "ތީރު" މި ނަމަކީ ކިޔުންތެރިންގެ ދުލަށް ލުއި، ފަސޭހައިން ސިކުނޑީގައި ހަރުލާ ފަދަ ދިވެހިވަންތަ ނަމެއް ދިނުމުގެ ގޮތުން ދެވިފައިވާ ނަމެކެވެ. ތީރުގެ ސްލޯގަން އަކީ "އަމާޒަށް ވާޞިލް ވުން" އެވެ. މުޅި ދުނިޔެއަށް ކޮވިޑް-19 ގެ ބަނަކަން ވެރިވެފައިވާ ދުވަސްވަރެއްގައި، މިފަދަ މަޖައްލާއެއް ފެށުމުގެ އެންމެ ބޮޑު އެއް މަޤްސަދަކީ ތަފާތު އެކީ ދާއިރާތަކުން މައުލޫމާތު ގެނެސްދީ ކިޔުންތެރިންގެ މުނިފޫހި ފިލުވާދިނުމެވެ.

ބާނީން:

ތީރު އުފެއްދުމުގެ ޚިޔާލު ފާޅުކޮށް އެކަން ހަގީގަތަކަށް ހެދުމުގައި އިސްވެ މަސައްކަތްކުރި 3 ޒުވާނުގެ ތެރެއިން 2 ޒުވާނުންނަކީ، މީޑިޔާއެއް ހިންގުމުގެ އެއްވެސް ތަޖުރިބާއެއް ނެތި ހަމައެކަނި އެކަމަށް އޮތް ޝައުޤުވެރިކަމުގައި މަސައްކަތްކޮށް، ކާމިޔާބު މަޖައްލާއެއްގެ ގޮތުގައި ތީރު އާންމުންނާއި ހަމައަށް ގެނެސްދިން ފަރާތްތަކެކެވެ.

ތީރު މީޑިޔާގެ މެނޭޖިންގެ ޑިރެކްޓަރުކަމުގެ މަޤާމްގައި ހުރެގެން، ތީރު އޭގެ ޢަމާޒަށް ވާޞިލްވުމަށް ކުރެވޭ މަސައްކަތުގެ އެންމެ ބުރަ އެއް މަސައްކަތެއް ކުރާ ފަރާތަކީ، ތަފާތު އެކި މީޑިޔާތަކާއި އަމިއްލަ ހައިސިއްޔަތުން ގްރެފިކްސް އަދި މާރކެޓިންގެ، ގިނަ އަދި ފާހަގަ ކޮށްލެވޭ މަސައްކަތްތަކެއް ކޮށްފައިވާ، ތ. ވިލުފުއްޓަށް އުފަން މޫސާ ޝިފާޒެވެ. ކުރު މުއްދަތެއްގެ ތެރޭގައު ތީރު އާންމުންގެ މަޤްބޫލު މަޖައްލާއަކަށް ހަދާ، ތީރުގެ މޫނުމަތި ރީތިކޮށް، ފެންވަރު ރަގަޅު އުފެއްދުމެއްގެ، ގޮތުގައި ކުރިންސުރެ ހިނގަމުން އަންނަ މީޑިޔާތަކާއި އެއް ހަމައެއްގައި ފައިތިލަ ސާބިތުކުރެވިފައިވަނީ ޝިފާޒުގެ ދުރުވިސްނުމާއި، މީޑިޔާއަށް ލޯހުޅުވިފައިވާލެއް ފުރިހަމަ ކަމުންނެވެ.

ތީރުގެ ވެބްސައިޓް ފަރުމާކޮށް ތަރައްޤީ ކުރުމުގައި ހަރަކާތްތެރިވަނީ، މި ދާއިރާއިން ތަޢުލީމް ހާޞިލްކުރަމުން އަންނަ، އެންމެ 20 އަހަރުގެ މާލެއަށް އުފަން މުހައްމަދު އައިމަންއެވެ. ތަފާތު އެތައް ސިފަ ތަކަކާއި އެކު ތީރުގެ ވެބްސައިޓުން ފެންނަން އެ ހުރި ފުރިހަމަ ކަމަކީ އައިމަންގެ ތޫނުފިލި ކަމާއި ބިނާކުރަނިވި ވިސްނުމުގެ ނަތީޖާއެވެ.

މަޖައްލާގެ ލިޔުންތައް ލިޔެ، އޭގެ ފެންވަރު ދަމަހައްޓާ، ކިޔުންތެރިންނަށް ބޭނުންވާނެ ފަދަ މައުލޫމާތާއި މުނިފޫހި ފިލުވުމުގެ ޚަބަރުތަކާއި، ވައްޓަފާޅިއާއި ގުޅުން ހުރި އެކިއެކި ދާއިރާތަކުގެ ލިޔުންތައް އިޚްތިޔާރުކޮށް،ގެނެސް ދިނުމަކީ ރ. އަލިފުއްޓަށް އުފަން ޚަދީޖާ ޢަލީގެ މައިގަނޑު ޒިންމާއެވެ. ޚަދީޖާގެ މަޤްޞަދަކީ ސާބިތު ނުހިފޭ ދިރާސާތަކާއި، ހަމަ އެކަނި ސުރުޚީ ވިއްކުމަށް ހެދޭ ލިޔުންތަކުން އެއްކިބާވެގެން ލިޔެވޭ، މައުލޫމާތު މުއްސަނދި ކުރުމުގެ ލިޔުންތަކާއި، ދިވެހިންގެ ތެރެއިން ފާހަގަ ކުރެވޭ އެކިއެކި ހުނަރުވެރިންގެ މަސައްކަތް އާންމުންނާއި ހަމައަށް ގެނެސް އެފަދަ ފަރާތްތަކުގެ އަގުވަޒަންކުރުމެވެ.

ކުޑަ ނަމަވެސް ކާމިޔާބު މަޖައްލާއެއްގެ ގޮތުގައި ތީރުހިނގަމުން އައިސް، ކޮވިޑް-19 ގެ ބިރުވެރިކަން މަޑުމަޑުން ފަނޑުވަމުން ގޮސް ވިޔަފާރިތައް ވެސް އާންމު ޙާލަތަކަށް އެޅެން ފެށުމުން، އުފެއްދުމެއްގެ ގޮތުގައި ތީރު މަޖައްލާ ބާޒާރަށް ނެރުމުގެ މުހިންމުކަން ތީރުގެ ބާނީންނަށް އިޙްސާސް ކުރެވުނެވެ. އެހިސާބުން އެމަސައްކަތާއި ހަވާލު ވީ، މީޑިޔާގައި 15 އަހަރުގެ ތަޖުރިބާ ލިބި އާންމުންގެ މަޤްބޫލުކަން ލިބިފައިވާ، ގިނަ ބަޔަކަށް ފަރިތަ މޫނެއް ކަމަށްވާ ރިޒްނާ ޒަރީރެވެ. ބޮޑު ބަޖެޓެއް ނެތި، އަމިއްލަ ޖީބުން ޚަރަދުކޮށްގެން ހިންގަމުން އައި ތީރަކީ ވިޔަފާރިވެރިންގެ ވިޔަފާރިތައް ކުރިއެރުވުމަށް އެކަށީގެންވާ ޕްލެޓްފޯމެއް ކަން ސާބިތުކޮށް އެކަމުގެ ޒިންމާ އެޅިފައިވާ ވަނީ ރިޒްނާގެ ކޮނޑުގައެވެ.

ކިޔުންތެރިން:

ތީރަކީ މައުލޫމާތު ހޯދުމަށް ޝައުގުވެރިވާ ފަރާތްތަކަށް ޚާއްސަކޮށް ނެރެވިފައިވާ މަޖައްލާއެކެވެ. ތީރު މަޖައްލާއަށް އެއްއަހަރު ފުރުނު އިރު މި ކުޑަކުޑަ މަޖައްލާގައި 184،000 އަށްވުރެ ގިނަ ކިޔުންތެރިން އެބަތިއްބެވެ. ދިވެހިރާއްޖޭގައި ތިބި ކިޔުންތެރިންގެ އިތުރުން ސްރީލަންކާ، އިންޑިޔާ، މެލޭޝިޔާ، ޔުނައިޓޭޑް ސްޓޭޓްސް، ފިލިޕީންސް، ޔުނައިޓެޑް އަރަބް އެމިރޭޓްސްގެ އިތުރުން، ސިންގަޕޯރ އާއި އިނގިރޭސި ވިލާތް އަދި އޮސްޓްރޭލިޔާގައި ދިރިއުޅޭ ދިވެހިން ތީރު މަޖައްލާ އާންމުކޮށް ކިޔައެވެ.

ލިޔުންތައް:

ތީރު މަޖައްލާގައި ރާއްޖެއާއި ދުނިޔޭގެ މަސްރަހުން ފާހަގަކޮށްލެވޭ ބައެއް ޚާއްސަ ޚަބަރުގެ އިތުރުން ހިމެނެނީ، ސިއްޙަތު، ކާނާ، މުނިފޫހިފިލުވުން، ކުޅިވަރު، މީހުން، ދީން، އަދަބިއްޔާތު، ޒީނަތްތެރިވުން، ޓެކްނޮލޮޖީ، ދަތުރުފަތުރު، ވާހަކައިގެ އިތުރުން ވައްޓަފާޅި އަދި "ދެނަހުރީމުތަ" އިގެ ނަމުގައި ގެނެސްދޭ މައުލޫމާތު ތަކެވެ. "ދެނަހުރީމުތަ" އަކީ ރާއްޖޭގެ އެއްވެސް ނޫސް މަޖައްލާއެއްގައި އަދި ގެނެސްދީފައި ނުވާ ގޮތަކަށް ފަރުމާ ކުރެވިގެން ގެނެސްދެވޭ ވަރަށް ޚާއްސަ އަދި އެހާމެ އާންމު ނޫން މައުލޫމާތުގެ ބައެކެވެ.

ކްލަބްހައުސް:

ޓެކްނޮލޮޖީ އާއި ވައްޓާފާޅިއަށް އަންނަ ބަދަލު ތަކާއި އެކު މިކުޑަކުޑަ ދިވެހިރާއްޖެ ހިމެނޭހެން މުޅި ދުނިޔޭގައި ކްލަބްހައުސްގެ ފޯރި ގަދަވެފައިވާ މިދަނޑިވަޅުގައި އޭގެ ބޭނުން އެންމެ ފުރިހަމަ އަށް ހިފާ އެއްފަރާތަކީ ތީރު ކަމަށް ދެންނެވުން ދޮގަކަށް ނުވާނެއެވެ. ތީރުގެ ޓީމާ ރިޒްނާ ޒަރީރު ގުޅުނު ހިސާބުން، ޚަބަރު ކިޔުމުގައި ރިޒްނާގެ ތަޖުރިބާ އާއި ޢިލްމީ ގާބިލްކަން އެންމެ ބޮޑަށް ފެނިގެން ދިޔައީ ކްލަބްހައުސްގެ ތެރެއިން ނެވެ. ރިޒްނާގެ އިސްނެގުމުގެ މަތިން، ކޮންމެ ރެއެއްގެ 8 ޖަހާއިރު އަދި މެންދުރު ފަހު ގެނެސްދޭ ޚަބަރުގަޑިއަށް އިތުރު ދެވަނަ އަޑަކީވެސް ގިނަ ދުވަސްތަކެއް ވަންދެން މީޑޔާގައި މަސައްކަތްކޮށް އެދާއިރާ ތަޖުރިބާ ލިބިފައިވާ ޚަދީޖާ ފާޒްއެވެ. ތީރު މީޑިޔާގެ ފަރާތުން ކްލަބްހައުސް ގައި ގެނެސްދޭ އެކި ޝޯތަކަކީ އެހުންތެރިންގެ ސަމާލުކަށް ވަރަށް ބޮޑަށް ލިބޭ ޝޯތަކެކެވެ. މީގެ ނަތީޖާއަކީ، ދިވެހިރާއްޖޭގެ މީޑިޔާތަކުގެ ތެރެއިން ކްލަބްހައުސްގައި އެންމެ މަޤްބޫލު މީޑިޔާއަކަށް ތީރު މީޑިޔާ ވުމެވެ. ތީރުގެ ފަރާތުން ކްލަބްހައުސްގައި ގެނެސްދޭ ކާމިޔާބު ޝޯ "ނުދައްކާ ވާހަކަ" އަކީ ކްލަބްހައުސްގައި ތީރަށް ލިބެމުންދާ ކާމިޔާބީގެ އެންމެ އިސް ޙިއްސާދާރެވެ.

ޓީމް ތީރު:

ތީރުގެ ލިޔުންތެރިއެއްގެ ގޮތުގައި އެންމެ ފުރަތަމަ ތީރު ޓީމާއި ގުޅުނީ ތިލަދުން އަދި ޖަޒީރާ ފަދަ ނޫސްތަކަށް ލިޔެ ތަޖުރިބާ ލިބިފައިވާ އައިމިނަތު ޔުމްނާއެވެ. އޭގެ ފަހުގައި ޓީމާއި އެކުގައި މިހާރު ތިބި ލިޔުންތެރިންގެ ތެރޭގައި، ހާމިދު، ސާޖިދު ޢަބްދުﷲ، ޢަލީ ބައްސާމު، މުޙައްމަދު އަދުހަމް، އާދަމް ޔައިޝް، ޢަލީ ބައްސާމް، ޖަޒްލާން މުޙައްމަދު،  އުސައިމީން ގެ އިތުރުން ޠަލްޙަތު ޖައުފަރު އަދި ނުޒުހަތު ޚަލީލް ހިމެނެއެވެ. ތީރުގެ މަރކެޓިންގ ޓީމާއި އެކު މަރިޔަމް ނަފްހާ އަދި މަމްޖޫދާ ކޮށްދީފައިވާ މަސައްކަތްވެސް ޝުކުރުވެރިކަމާ އެކު ބަލައިގަންނަމެވެ. މީގެ އިތުރުން ހިލޭ ސާބަހަށް ތީރަށް މާރކެޓިން ކޮންސަލްޓެންސީ ދެއްވުމުގައި ދެމިހުންނެވި، ޑައިރެކްޓް ޑިމޮކްރަސީ ގްލޯބަލް މޯލްޑިވްސް (ޑީ ޑީ ޖީ އެމް) ގެ ބާނީ އަސްރާ އަހުމަދު އަށް ތީރުގެ ވަރަށް ޚާއްސަ ޝުކުރެއް ރައްދުކުރަމެވެ.

ޒުވާން ޓީމަކާއި އެކު ތީރުގެ ދުވެލި އަންނަނީ ދުވަހަކަށް ވުރެ ދުވަހެއް ބާރުވަމުންނެވެ. ތީރުގެ ވަޢުދަކީ ކިޔުންތެރިން ބޭނުންވާނެ ފަދަ މައުލޫމާތާއި މުނިފޫހިފިލުމުގެ ޚަބަރުތައް ގެނެސްދިނުމުގައި ސާބިތުކަންމަތީގައި ހުރުމެވެ. މައުލޫމާތުގެ ފެތުރުމާއި ނޫސްވެރިކަމުގެ ހުދޫދުގެ ތެރޭގައި ތިބެ މިކަން ކުރިއަށް ގެންދިއުމުގެ ޔަގީންކަން ތީރުގެ ފަރާތުން އެންމެހާ ކިޔުންތެރިނަށް އަރުވަމެވެ. ކޮންމެ މަޖައްލާއެއްގެ ކާމިޔާބީވެސް ގުޅިފައިވަނީ އެ މަޖައްލާއެއްގެ ކިޔުންތެރިންނާއެވެ. އެހެންކަމުން ވޭތުވެ ދިޔަ އެއް އަހަރުގެ ތެރޭގައި ތީރުގެ ކިޔުންތެރިން ތީރަށް ދެމުންގެންދާ ލޯތްބާއި އިޙްތިރާމާއި އެއްބާރު ލުމަށް، ތީރު މީޑިޔާގެ ފަރާތުން ފަށްފަށުން ޝުކުރު އަދާކުރަމެވެ.