އަޅުގަނޑުމެންގެ ތެރެއިން ގިނަ ބަޔަކު އެތައް އަހަރެއް ވަންދެން ބޮޑު ހަރަދެއް ކޮށްގެން ކިޔަވަމުން ދަނީ އެދެވޭ މަޤާމެއްގައި ވަޒީފާ އަދާކުރުމުގެ އުއްމީދުގައެވެ. ޕްރޮފެޝަނަލް، ޒިންމާދާރު މީހަކަށް ވުމަށްޓަކައެވެ. ހާއްސަކޮށް، ހާއްސަ ހުއްދައެއް ނުވަތަ ލައިސަންސެއް ލިބިގެން ކުރެވޭ ހާއްސަ މަސައްކަތްތަކަށް އިންސާނާ ފައްކާވެ ތައްޔާރުވުމަށްޓަކައެވެ. ނަމަވެސް، ކިޔެވުމުގެ އެ ބުރަ ދަތުރު ނިންމާލުމަށްފަހު ލައިސަންސު ހޯދުމަށް ކުރާ ދަތުރަކީ ސުވާލުތަކަކުން ފުރިގެންވާ ދަތުރެކެވެ.

ކިޔަވާ ނިމުމުން ދޫކުރާ ލައިސަންސަ ނުވަތަ ހުއްދަ ލިބެނީ އެއަށް ފައިސާ ދެއްކުމުންނެވެ. މިއީ އަޅުގަނޑުމެން ވިސްނާލަންޖެހޭ ކަމެކެވެ. އަޅުގަނޑުމެންގެ މުޖުތަމަޢުގައި އަބަދުވެސް އަޑުއިވެމުންދަނީ ފައިސާ ދީގެން ސެޓުފިކެޓު ގަންނަ ވާހަކައެވެ. މިއީ ޢަމަލެއްގެ ގޮތުން ނޭދެވޭ ޢަމަލެއް ކަމުގައި ބެލެވެއެވެ. އެހެންނަމަވެސް، ލައިސަންސަށް ފައިސާ ދެއްކުމަކީ މިއާ އެއްގޮތް ކަމެއް ނޫންބާއެވެ؟ ލައިސަންސު ދޫކުރުމަކީ ސަރުކާރުން ކުރާ ކަމަކަށްވާތީ، މިއަށް "ގަތުން" މިހެން ނުކިޔަނީ ބާވައެވެ؟

މި ސުވާލު އުފައްދާ އެތައް ބަޔަކު އުޅެއެވެ. ނަމަވެސް ފާޅުގައި މިވާހަކަ ދައްކާކަށް އެކަކަށްވެސް ނުކެރެއެވެ. ނަމަވެސް މިއީ ހިޔާލުކޮށް ވާހަކަދައްކާލާ، ބުހުސްކޮށްލަން ރަނގަޅު މައުލޫއެކެވެ. ލައިސަންސަށް ފައިސާ ދެއްކުމާއި ސެޓުފިކެޓު ވިއްކުމާ ދެމެދު ހުރި ތަފާތަކީ ކޮބައިތޯއެވެ؟ ދެ ޙާލަތުގައިވެސް ފައިސާ ދައްކައިގެން ލިޔުމެއް ލިބެނީއެވެ. އެހެންނަމަވެސް، އެއްބައި މީހުންނަށް ލައިސަންސަށް ފައިސާދެއްކުމަކީ މާބޮޑު ގޯހެއް ނޫން ކަމުގައި ދެކެވުނަސް، އެއީ އަދި އެއްމެ އެދެވޭ ގޮތް ނޫން ކަމުގައި ދެކޭމީހުން މަދެއް ނޫނެވެ. ފުރަތަމަ ނަގާ ލައިސެންސުގެ އަގު ބޮޑެވެ! މުއްދަތު ހަމަވުމުން އައުކުރާނަމަވެސް އަގު ދައްކަން ޖެހެއެވެ! ސުވާލުތައް އުފެދެނީ މިސަބަބުތައް މިހެން ހުންނާތީއެވެ.

ވިސްނާލަންޖެހޭ އެއް ކަމަކީ ލައިސަންސަށް ފައިސާ ދެއްކުމުގެ މަޤްޞަދަކީ ކޮބައިތޯއެވެ؟ މިއީ އާމްދަނީ ހޯދުމުގެ ގޮތުން ކުރާ ކަމެއްތޯއެވެ؟ ނުވަތަ އެހެން މަޤްޞަދެއް މިކަމުގައި އެބަ އޮތްތޯއެވެ؟ 

ލައިސަންސް ހެއްދުމަށް ނުވަތަ ނެގުމަށް އަގުނެގުމާއި ދެކޮޅުހަދާ މީހުން ދެކޭގޮތުގައި މިއީ ކިޔެވުމަށް ކުރާ ހޭދައިގެ އަގު ވެއްޓިދާ ކަމެކެވެ. ކިޔެވުމަށް އެހާ ބޮޑު ހަރަދެއްކޮށްގެން ހޯދާ މި ލައިސަންސު ނެގުމަށާއި އައުކުރުމަށް އަގު ނެގުމަކީ އެ ލައިސަންސުތަކުގެ އަގު ހުރިކަން ހާމަވާކަމެއް ކަމަށް ދެކޭ މީހުންވެސް އުޅެއެވެ. 

ލައިސަންސަށް ފައިސާ ދެއްކުމަކީ ލައިސަންސު ވިއްކުން ކަމުގައި ނުބެލެވުނު ނަމަވެސް، މިއީ އަޅުގަނޑުމެން ފުންކޮށް ވިސްނާލަންޖެހޭ ކަމެކެވެ. މިކަމުގައި އަބަދުމެ އަގު ނެގުމަކީ ހަމަ އެއްމެ ރަނގަޅު ގޮތްތޯއެވެ. މިކަމާމެދު ހިޔާލުކޮށް، ދެކޭ ގޮތް ކޮމެންޓު ސެކްޝަނުގައި ހިއްސާކޮށްލާށެވެ.