ކޮވިޑް-19ގެ އާލަބީ ވަބާއާ ގުޅިގެން ދުނިޔޭގެ އެކި ކަންކޮޅުތަކުގައި ތަފާތު އެކިއެކި އިޖްތިމާއީ މައްސަލަތައް ދިޔައީ ފެންމަތި ވަމުންނެވެ. އެގޮތުން ވަރި ގިނަ ވުމާއި ވައްކަމުގެ މައްސަލަ ތަކާއި މަކަރާއި ހީލަތުން ފައިސާ ހޯދުމުގެ ގިނަ އަމަލުތަކެއް ދުނިޔޭގެ ތަހުޒީބު އެތައް ގައުމަކުންވެސް ވަނީ ފެނިގެން ގޮސްފައެވެ. ނަމަވެސް ދެކުނު އެފްރީގައި ފެތުރެން ފެށީ މާ ނުބައި ބަލިމަޑުކަމެކެވެ. އޭގެ އަޑި ނޭނގޭ އަނިޔާވެރި ދިލަ ވޭނެކެވެ. 

ދެކުނު އެފްރިކާ ފުރަބަންދުކޮށް، އެޅި ހަރުކަށި ފިޔަވަޅުތަކާއެކު އެގައުމުގެ "ކުޑަކުދިން" މާބަނޑުވާ މިންވަރު އިތުރުވެފައިވާކަމަށް "ސޭވް ދަ ޗިލްޑްރެން" ނަމަކަަަށް ކިޔާ އިޖްތިމާއީ ޖަމާއަތަކުން މިވަނީ ހާމަކޮށްފައެވެ.

މިކަމުގައި އެގައުމުގެ މަޝްރަހު ދިރާސާކުރައްވާ ފަރާތްތަކުގެ މެދުގައި ހިޔާލުތަފާތުވުންތައް އެބަހުއްޓެވެ. ދެކެވޭ ވާހަކަ ތަކުގައި ދެކޮޅަށް ކިރެން އެބަ އޮތެވެ.

އެގޮތުން އެއްބަޔަކު ފާހަގަކޮށްފައި ވަނީ، މިއީ ޒުވާން އަންހެން ކުދިންނަށް ކޮންޓްރެސެޕްޝަންސް ނުލިބުމާއި އެބޯޓް ކުރުމުގެ ފުރުސަތު ނުލިބުމުގެ ނަތީޖާ ކަމަށެވެ. އަދި އަނެއްބަޔަކު އެގައުމުގެ ޕަބްލިކް ހެލްތު ފެއިލްވެފައިވާތީ ވާކަމެއް ކަމަށް ތުހުމަތު ކުރެވޭއިރު، މިއީ އަނިޔާވެރި ބައެއްގެ އަމަލުތަކެއްކަމަށް ދެކޭ މީހުންވެސް މަދެއް ނޫނެވެ. އެހެން ނަމަވެސް އެންމެ ގިނަބަޔަކު ބުނާގޮތުގައި މިއީ އެގައުމުގައި އާދަވެ ހިނގާ ކަމެއް ކަމަށާއި ސިއްހީ ހިތުމަތްތައް ލިބިގަތުމާއި ދޭތެރެ ދުރުކުރާ ތަކެތި ލިބުމުގައި ދަތިތަކެއް ހުރުމުން މިކަންކަން ފެންމަތިވަނީ ކަމަށެވެ.  

ރިޕޯޓްތައް ބުނާގޮތުގައި، މިގޮތަށް ދިމާވެގެން އެންމެ ގިނަ ކުދިން ވިހާފައި ގައުޓެންގައެވެ. މިއީ ދެކުނު އެފްރިކާގެ އެންމެ މީހުން ގިނަ ޕްރޮވިންސްއެވެ. އެ ޕްރޮވިންސްގައި "ކުޑަކުދިން" މަންމައަށްވާ ނިސްބަތް ވަނީ ވަރަށް ބޮޑަށް މަތިވެފައެވެ. އެގޮތުން އެ ޖަމުއިއްޔާއިން އާންމުކުރި ތަފާސް ހިސާބެއްގައި އެ ޕްރޮވިންސުގެ މައިންގެ ތެރެއިން 930 މަންމަ އިންނަކީ އުމުރުން 14 އަހަރުން ދަށުގެ ކުދިން ކަމަށް ބުނެފައި ވެއެވެ.

ދެކުނު އެފްރިކާގައި ކޮވިޑް ފެތުރެންް ފަށައި، މިިދިޔަ އަހަރުގެ އޭޕްރިލް މަހު ފުރަަބަންދު ކުރިއެވެ. އަދި ސްކޫލްތަކާއި ކްލިނިކްތައް ބަންދުކޮށް އެންމެން ގޭގައި ބަންދުކުރިއެވެ.

ސަރުކާރުން އާންމުކޮށްފައިވާ މައުލޫމާތަށް ބަލާއިރު، މިދިޔަ އަހަރުގެ އޭޕްރިލްއިން ފެށިގެން މާރިޗް 2021 އަށް 18 އަހަރުން ދަށުގެ 23،000 ކުދިން ވަނީ ވިހާފައެވެ. މިއީ އޭގެ ކުރީ އަހަރާއި ބަލާއިރު، ވަރަށް ބޮޑަށް މަތީ އަދަދެކެވެ.

މިގޮތަށް ޅަ އުމުރުގައި މާބަނޑުވާ ކުދިން ސްކޫލްތަކަށް ދިއުން މެދުކެނޑިގެން ދެއެވެ. އަދި ކައިވެނި ކުރަން މުޖުބޫރުވެއެވެ. އަދި އެ ކުދިންގެ ދަރިން އެހާ ގިނަ ދުވަހު ދުނިޔޭގައި ނުތިބޭ ކަމަށްވެސް ބުނެފައިވާއިރު، ބައެއް ކުދިންނަށް އިހާނެތިކޮށް ހިތާކަަށްވެސް ބުނެފައި ވެއެވެ.

ދެކުނު އެފްރިކާއަށް މިހާރު ވަނީ ކޮވިޑްގެ ތިން ވަނަ ރާޅެއް އަރާފައެވެ. އަދި އެ ގައުމުގެ އެކި ސަރަހައްދުތައް މިހާރުވެސް ވަނީ ބަންދުކޮށްފައެވެ.

އަދި ސްކޫލްތަކުން އަދިވެސް ކްލާސްތައް ރަނގަޅަށް ކުރިއަށް ނުގެންދާއިރު، ކްލާސްތައް ކުރިއަށްގެންދާ ކަމަށް ވަނީ އޮންލައިން ކޮށެވެ.

ދުނިޔޭގެ ގައުމުތަކަށް ބަލާއިރު މިފަދަ އިޖްތިމާއީ ބަލިމަޑުކަން ގިނަ އެއް ގައުމަކަށް އެފްރިކާވާނެއެވެ. ކޮވިޑުގެ މި ހާލަތުން އެކަންކަން މުޅި ދުނިޔެއަށް ބޭޒާރުވެއްޖެއެވެ.