ދުނިޔޭގެ ކަނޑުތަކުގައި ހިކިފަސް ތަންތަން އުފެދެމުން އަންނަ އިރު، ބައެއް ބިންތައް ނެތެމުން ވެސް ދެއެވެ. އެގޮތުން މިއީ ދުނިޔޭގެ އުތުރުން އަލަށް ފެނުނު ބިމެއްގެ ވާހަކައެވެ. 

ގްރީންލޭންޑުގެ އައްސޭރި އާއި ކައިރިން ސައެންސްވެރިންނަށް މުޅިން އަލަށް ހިކިފަސް ރަށެއް ފެނިއްޖެއެވެ. މި ރަށް ފެނުނު ސައެންސްވެރިން ބުނާ ގޮތުގައި މި ރަށަކީ ދުނިޔޭގެ އެންމެ އުތުރަށް އޮތް ހިކިފަސްތަނެވެ. މި ރަށް ފެނިފައިވަނީ އެ ސަރަހައްދުގައި ހުރި ގަނޑުފެން ނުވަތަ އައިސްތަކަށް އައި ބަދަލުތަކެއްގެ ސަބަބުންކަމަށް ރިޕޯޓުތައްް ބުނެއެވެ.

ގްރީންލޭންޑުގައި ހުންނަ އާޓިކް ސްޓޭޝަން ރިސާޗް ފެސިލިޓީގެ ވެރިޔާ އަދި އެސަރަހައްދުގެ ދިރުންތައް ތަހުގީގުކުރައްވާ ސައެންސްވެރިއެއް ކަމުގައިވާ މޯޓެސް ރަސްޗް ވިދާޅުވީ އަރު ރަށެއް ހޯދުމަކީ އެ މީހުން ކުރަމުން އައި ހަގީގީ މަސައްކަތް ނޫންކަމަށެވެ. އަދި އެ މީހުން އެ ރަށް ފެނުނު ސަރަހަައްދަށް ދިޔައީ، އެރަށް ފެނުމާއެކު، އެ ރަށުގެ ދިރުންތަކާއި ގުޅޭގޮތުން ސާމްޕަލްތަކެއް ނަގާށެވެ.

އެ ސައެންސްވެރިންނަށް އެންމެ ފުރަތަމަ ގަބޫލުކުރެވުނީ އެ މީހުންނަށް ހޯދުނީ 1978 ވަނަ އަހަރު ޑެންމާކުގެ ސާވޭ ޓީމަކަށް ފެނުނު އޫޑާގް ނަމަކަށްކިޔާ ރަށް ކަމަށެވެ. ނަމަވެސް ފަހުން ސީދާ އެ ރަށް އޮތް ތަން ބެލުމުން އެމީހުންނަށް އެނގުނު ގޮތުގައި އެމީހުންނަށް ހޯދުނީ މުޅިން ތަފާތު، އަދި ކުރިން ފެނިފައި ނުވާ ރަށެކެވެ.

މި ރަށް ފެނުނު ދަތުރަށް މާލީ އެހީތެރިކަން ވެދިން ވިޔަފާރިވެރިޔާ ކްރިސްޓިއާން ލެއިސްޓާ ވިދާޅުވީ އޫޑާގް ފެނުނުކަމުގައި ދެކި ހުރިހާ އެންމެންވެސް ތިބީ ވަރަށް އުފަލުން ކަމަށެވެ. ނަމަވެސް އިހުގެ ދަތުރުވެރިންނާ އެއްގޮތަށް ފެނުނު ތަނަކީ ހީކުރި ތަން ނޫން ކަމަށްވެސް އޭނާ ވިދާޅުވިއެވެ.

އަލަށް ފެނުނު މި ރަށަކީ ވަރަށް ކުޑަ ރަށެކެވެ. ބޮޑު މިނުގައި ގާތްގަނޑަކަށް ހުންނަނީ 30 މީޓަރު ނުވަތަ 100 ފޫޓެވެ. އެ ރަށުގައި އައިސް ގްލޭސިއާތައް ހަރަކާތްކުރުމުން އުފެދޭ ވެއްޔާއި ގައު ކަމުގައިވާ "މޮރެއިން" ފެނިފައިވެއެވެ.

މީގެ ކުރިން އެ ސަރަހައްދުގައި މަސައްކަތްކުރި އެމެރިކާ ސައެންސްވެރިންގެ ގިނަ ޓީމުތަކުންވަނީ ދުނިޔޭގެ އެންމެ އުތުރަށް އޮތް ރަށް ހޯދުމަށް މަސައްކަތްކޮށްފައެވެ. އަލަށް ހޯދުނު މި ރަށަށް ކިޔާނޭ ނަމަކާއި ބެހޭ ގޮތުން ސައެންސުވެރިން އެކި ތަފާތު ހިޔާލުތައް ދަނީ ދެމުންނެވެ.