އިންސާނާ ބަލިވުމުން ބޭސްފަރުވާ ކުރެއެވެ. އަދި ކުރަންވެސް ޖެހެއެވެ. އެހެން ކަމުން މިއީ އިންސާނާ ދިރިހުރުމަށް ކޮންމެހެން ބޭނުންވާ އަސާސީ ހިދުމަތެކެވެ. މިއީ ވަކި މީހަކަށް ވުމުން ތަފާތު ވާންޖެހޭނޭ ހިދުމަތެއް ނޫނެވެ. އެމީހަކީ ދޭސީ އަކަސް ބިދޭސީ އަކަސް، ދޮން މީހަކަސް ކަޅު މީހަކަސް ސިއްހީ ހިދުމަތަކީ ލިބެން ޖެހޭނޭ ހިދުމަތެކެވެ.

ކަން އޮތީ މިހެން ކަމުގައި ވީނަމަވެސް، ސިއްހީ ހިދުމަތް ހޯދުމުގައި ބޮޑެތި ދަތިތަކެއް މިއަދު މި ވަނީ ކުރިމަތިވެފައެވެ. މިކަމުގައި ކިތަންމެ ސަބަބެއް އެބަ ވެއެވެ. އޭގެ ތެރޭގައި ބަލިމީހުން އިތުރުވުމަކީ ގިނަބަޔަކު ގަބޫލު ކުރާ އެއް ސަބަބެވެ. ސިއްހީ ނިޒާމުގައި، ސިއްހީ ހިދުމަތްތެރިންގެ ގޮތުގައި މި ތިބެނީ ވަރަށްވެސް މަދު ބައެކެވެ. އެއާއި އެކު ބަލި މީހުންގެ އަދަދު ގިނަކަމުގައި ވަނީނަމަ، އެ ނިޒާމަށް ނުކަތާނެއެވެ. އެހެން ވެއްޖެ ނަމަ ބަލި މީހުން ފަރުވާ ހޯދުމުގައި ކިއު ޖެހެން ޖެހޭނެއެވެ. ސިއްހީ ހިދުމަތް ހޯދުމުގައި ދިމާވާ އެންމެ ބޮޑު އެއް ދަތިކަމުގެ އަސްލު ކަމުގައި މިކަން ވުމަކީ އެކަށީގެންވާ ކަމެކެވެ.

އާދޭހެވެ! ސިއްހީ ފަރުވާ ހިދުމަތެކެވެ. އެއީ ވިޔަފާރިއެއް ނޫނެވެ. އިންސާނުންގެ ސިއްހަތަކީ ވިޔަފާރި މުދާ ގަނޑެއް ނޫނެވެ. އެހެންނަމަވެސް މިއަދު ގިނަބަޔަކު ކުރާ އެއް ޝަކުވާ އަކީ ސިއްހީ ހިދުމަތް ވިޔަފާރިއަކަށް ބަދަލުވެފައިވާ ކަމުގެ ޝަކުވާއެވެ. ދުނިޔޭގެ ބޮޑެތި ވިޔަފާރިވެރީން ސިއްހީ ހިދުމަތުގެ ތެރެއަށް ވަދެ، މި ހިދުމަތް ގަޑުބަޑުކުރި ކަމުގެ ޝަކުވާއެވެ. ބަލި މީހާ އިތުރު ބައްޔަކުން ބަލި ކުރުވާ ކަމުގެ ވާހަކައެވެ. 

ގަބޫލުކުރައްވާށެވެ! ބަލި މީހާ ކޮންމެ ހަރަދެއް ކޮށްގެން ވެސް އޭނާގެ ބައްޔަށް ފަރުވާ ކުރާނެއެވެ. މިއީ އެކަމާއި ދެބަސް ވެވެން ނެތް ކަމެކެވެ. އެހެންކަމުން، ސިއްހީ ހިދުމަތްދޭ ތަންތަނުން، ބަލި މީހުން އަތުން ބޮޑެތި އަގުތައް ނަގައެވެ. ބައެއް މީހުން ކުރާ ޝަކުވާ އަކީ ބަލި މީހާއަށް އޮޅުވާލައިގެން ވެސް ފައިސާ ނަގާ ކަމުގެ ޝަކުވާއެވެ. ކަމުގެ ހަގީގަތެއް ނޭނގެއެވެ. އެހެން ނަމަވެސް އެނގޭހާވެސް ކަމަކީ ސިއްހީ ހިދުމަތުގެ އަގު ބޮޑުކަމެވެ. އެއްބަޔަކު ބުނާހެން ސިއްހީ ހިދުމަތް ވިޔަފާރިޔަކަށް ވީ ކަމުގެ އިހުސާސްވެސް ބައެއް ބަހަރަށް ކުރެވެއެވެ.

ޑޮކްޓަރަށް ދެއްކުމަށް ޖެހެން ޖެހޭ ކިއުގެ ދިގުމިން ފަސް ހަމަސް ދުވަހަށް ދިގުލައެވެ. އެހެން ކަމުން އިތުރު އެހެން ކިއު އެއް ހޯދުމަށް މަޖުބޫރުވެއެވެ. އެހެން ދިމަ ދިމާލުގައި އަގުބޮޑުކޮށް އެ ހިދުމަތް ލިބެން ހުރެއެވެ. ނަތީއަކީ ބޮޑު އަގު ދީގެން ވެސް ޑޮކްޓަރަށް ދައްކާ މީހުން ގިނަވުމެވެ. އިސްވެ ދެންނެވުނުހެން މިކަމުގެ ހަގީގީ ސަބަބެއް އިނގޭކަށް ނެތެވެ. އެހެން ނަމަވެސް ދެކެވޭ ދެ ވާހަކައެއް އެބަ އޮތެވެ. އެއީ ބަލި މީހުން ގިނަ ވުމެވެ. ނުވަތަ ސިއްހީ ހިދުމަތް ވިޔަފާރިއަކަަށް ބަދަލު ވުމެވެ.