ދުނިޔޭގެ އެކި ކަންކޮޅުތަކުގައި އަބަދުވެ ކޮންމެވެސް ބާވަތެއްގެ މުބާރާތެއް ކުޅެވެއެވެ. ގިނަބައެއްގެ މަގުބޫލުކަން ލިބިފައިވާ ފުޓުބޯޅައަކީ ގިނަބަޔަކު ދަންނަ ފަރިތަ ކުޅިވަރެކެވެ. ފުޓުބޯޅަ މުބާރާތްތަކަކީ ދިވެހިން އިންތިހާއަށް ޝައުގުވެރިކަމާއެކު ބަލާ ތަރުހީބު ދެމުން އަންނަ މުބާރާތްތަކެކެވެ. ފުޓުބޯޅައާއި ދިވެހިންގެ ލެޔާއި ވަނީ ގުޅިފައެވެ. 2021 ވަނަ އަހަރުގެ ސާފް ޗެމްޕިއަންޝިޕް ބާއްވާ ގައުމަކީ ދިވެހި ރާއްޖެއެވެ. ފެށޭމަހުގެ ފުރަތަމަ ދުވަހަކީ މި މުބާރާތުގެ ކުޅުން ފެށިގެންދާ ދުވަހެވެ.

ސާފް ޗެމްޕިއަންޝިޕަކީ 1993 ވަނަ އަހަރު ސާކް ގޯލްޑެން ކަޕްގެ ނަމުގައި ފެށިގެން ކުރިއަށްދާ މުބާރާތެކެވެ. މި މުބާރާތުގައި ދިވެހި ރާއްޖެ ފުރަތަމަ ކުޅެފައިވަނީ 1995 ގައެވެ. މި މުބާރާތުގެ ވާދަވެރިކަން ބޮޑުވެ ފޯރި ހިފަމުން ގޮސް، 2008 ވަނަ އަހަރުވެގެން ދިޔައީ މި މުބާރާތުގައި ފުރަތަމަ ފަރަހަށް ދިވެހި ރާއްޖެ ތަށި ހޯދި ފަހަރަށެވެ. މުހުތާރުގެ ލަނޑާއި އެކު މުޅި ގައުމު އުފަލުން ނަށަމުން ދިޔައެވެ. އެ އުފަލުގައި ބައިވެރި ނުވާ ދިވެއްސަކު ނުހުންނާނޭ ބުނުން ދޮގަކަށް ނުވާނެއެވެ. ބޮޑު ސުކުރީނު އަޅުވައިގެން ރާއްޖޭގެ ކޮންމެ ރަށެއްގައި އެ މުބާރާތް ބަލަމުން ދިޔައެވެ. މަސަކަތެއްގައި މާ އަވަދިނެތި އުޅުނު މީހަކު ނޫނިއްޔާ އެ އަހަރުގެ ފައިނަލް މެޗު ބެލިއެވެ. ދިވެހި ގައުމީ ޓީމު ތައްޓާއި އެކު ދިވެހި ރާއްޖޭގެ ރަށްތަކަށް ދަތުރުކުރަމުން ދިޔައިރު މުޅި ދިވެހި ފަޒާ ވަނީ އެއްކުލަ އަކުން އުޖާލާވެފައެވެ. ވަކި އުމުރެއް ވަކި ޖިންސެއް ނެތެވެ. ހުރިހާ ދިވެހިންވެސް އެ އުފަލުފައި ބައިވެރިވިއެވެ. އެތައް ޅެމެއް ލިޔެވި އެތައް ރާގަކަށް އެތައް ލަވަތަކެއްވެސް ކިޔެވެ.

ދެވަނަފަހަރަށް ދިވެހި ރާއްޖެ މި މުބާރާތުގެ ތަށި އުފުލައިލީ 2018 ވަނަ އަހަރުގައެވެ. މިއީ ވެސް ދިވެހި ތާރީހުގައި ލިޔެވުނު ދުވަހެކެވެ. އެހެން ނަމަވެސް ގަބޫލުކުރަން ދަތި، ހިތި ހަގީގަތަކީ ދިވެހިން 2008 ވަނަ އަހަރު މިކަމުގައި ދެއްކި ފޯރިއާއި ގާތްކުރާ ފޯރިއެއްވެސް 2018 ވަނަ އަހަރު ފެނިގެން ނުދިޔަ ކަމެކެވެ. އެހެން ނަމަވެސް އެ އަހަރުވެސް ދިވެހިން ހޯދީ ހަމަ ފަހުރުވެރި ކާމިޔާބީއެކެވެ. ނަމަވެސް މިކަމުގައި ކޮންމެވެސް ހިކުމަތްތަކެއް ވާނެއެވެ.

ޒަމާނާއި އެކު މީހުންގެ ދިރިއުޅުމުގެ އާދަތައްވެސް ވަރަށް ބޮޑަށް ބަދަލު ވެއްޖެއެވެ. އެ ޒަމާނުގައި ފުޓުބޯޅައަށް ދިވެހިން ކުރަމުން އައި ތަރުހީބު މި ޒަމާނުގައި ނެތީބާއެވެ. ނުވަތަ ތަހުރީބާއި ލޯބި އޮތްނަމަވެސް އެކަމަށް ވަގުތު ނުދެވެނީ ބާއެވެ. ވިސްނާލުމުން ދޭހަވަނީ ފަހުން މި ދަންނަވާލެވުނު ހާލަތެވެ. އެހެނީ ދިރިއުޅުމުގެ އެކި ކަންކަމުގައި މީހުން އަވަދިނެތި އުޅެމުން ދާއިރު، ލޭ ކެކުނު ނަމަވެސް ވަގުތު ހުސްކޮށްގެން މެޗުތައް ބެލޭކަށް ނެތެވެ. ތަރުހީބު ދެވޭކަށްވެސް ނެތެވެ. އެއަށް ވުރެ ކުރަން ޖެހޭ ކަންތައް ގިނައެވެ. ނުކޮށްފިނަމަ އަނގަޔާއި އަތާ ދިމައެއް ނުވެއެވެ. މިއީ ގިނަ ދިވެހީންގެ ހާލަތެވެ. މި ހާލާއި ހުރެ ގައުމު ފަހުރުވެރިވާ ހާލަތްތަކުގައި ވަކި ވަކި ފަރުދުންނަށް ފަހުރުވެރިކަން އިހުސާސްވެސް ނުކުރެވެއެވެ.

2021 ވަނަ އަހަރުގެ ސާފް ޗެމްޕިއަންޝިޕް ރާއްޖޭގައި ކުޅެވޭއިރު 2008 ވަނަ އަހަރު ދިވެހިންގެ ޖޯޝާއި ފޯރިހުރި ވަރަށް މިއަހަރު ދިވެހިންގެ ފޯރި ހުންނާނެ ބާއޭ ހިތަށް އަރައެވެ. ފެންނަ މަންޒަރުތަކަށް ބަލާއިރު، މީސް މީޑިޔާގައި ވަރަށް ތަރުހީބު ބޮޑެވެ. ތާއީދު ބޮޑެވެ. ޖޯޝާއި ފޯރި ގަދައެވެ. ނަމަވެސް ހަގީގަތުގައި ބާރަ ވަނަ ކުޅުންތެރިޔާއަކީ މީސްމީޑިޔާގައި ކުޅޭ ކުޅުންތެރިއެއް ނޫނެވެ. އެއީ ދަނޑުބޭރުން ކުޅުންތެރިންގެ ރޫހާއި ޖޯޝު އިތުރުކޮށްދޭން، މެޗު ކުޅެމުންދާ ވަގުތު ހިތްވަރުދޭ ކުޅުންތެރިއެކެވެ. އުންމީދަކީ އެފަދައިން ދިވެހިން ދިވެހި ގައުމީ ފުޓުބޯޅަޓީމަށް މި އަހަރުވެސް ހިތްވަރުދީ ޖޯޝާއި ފޯރި ގެނުވުމެވެ.