ކޮންމެ ބަޔަކީވެސް އެބައެއްގެ އަމިއްލަ އުފަން ފަސްގަނޑުގައި ފަހުރުވެރިކަމާއި އަބުރުވެރިކަމާއި އެކީ މިނިވަން ފިޔަވަޅުތަކެއް އަޅަމުން ހިނގާ ބައެކެވެ. އަމިއްލަ އަރުޟުގައި، ޤައުމިއްޔަތުގެ ވިންދާއި އިހުސާސް ކުރެވުމަށް އެދޭނޭ ބައެކެވެ. އެފަދައިން ދިވެހީންނަކީ ދިވެހި އަރުޟުގައްޔާއި ލަޙުރުގައި އެފަދައިން މަޙުސޫސްވާން އެދޭނޭ ބައެކެވެ. ނަމަވެސް މިއަދު ދިވެހި ޤައުމުގައި ދިވެހީންގެ ބާރު ކުޑަވާން ފަށައިފިކަން ދިވެހީންގެ ހިތްތަކަށް މަޙުސޫސް ވާނެއެވެ. ދިވެހިން ދިވެހި ޤައުމުގައި ބީރައްޓެހިވާން ފަށައިފިއެވެ.

ދިވެހިރާއްޖޭގެ އިޤްތިސާދުގެ މައި އެއް ސިނާއަތަކީ ފަތުރުވެރިކަމެވެ. ފަތުރުވެރިކަމުގައި ރަށު ފަތުރުވެރިކަމާއި، ރިސޯޓު ފަތުރުވެރިކަން ހިމެނެއެވެ. އެގޮތުން ރިސޯޓު ފަތުރުވެރިކަމުގައި، ރާއްޖޭގެ ގިނަ ރިސޯޓުތަކަކީ ރާއްޖެއިން ބޭރުގެ ކޮންމެވެސް ސައުދާގަރެއްގެ މުދާގަނޑަކަަށް މި ވަނީ ވެފައެވެ. މުޅި ދުނިޔެއަަށް ދިވެހި ރާއްޖެ ކަމަށް ބުނެ ތަޢުޒީޒު ކުރަމުން ގެންދާ ދިވެހި ރާއްޖޭގެ ރިސޯޓުތަކަކީ ހަގީގަތުގައި ދިވެހި ޤައުމު ރަމްޒުކޮށްދޭ ރަށްތަކެކޭ ނުބުނެވޭނެއެވެ. އެހެނީ އެތަންތަނުގައި ދިވެހިވަންތަ އެއްވެސް އާދަކާދައެއް ވައްޓަފާޅިއެއް ނުހުންނާތީއެވެ. ޔޫރަޕުގެ މޮޅެތި ފަރުމާތަކާއި އެމީހުންގެ އުޅުމާއި ގުޅުން އިރުވައި ގަދަ އޮއެވަރެންހެން ރިސޯޓުތަކުގައި އެނބުރެމުން ދެއެވެ. ސައްތައިންސައްތަ އިސްލާމީ މި ދިވެހި ޤައުމުގެ ރިސޯޓުތަކުގައި ހުއްދަނޫން ގުޅުންތަކާއި ރަލާއި އޫރުމަހަކީ މަޢުރޫފު ތަކެއްޗެކެވެ. ވީއިރު އެއީ ދިވެހިރާއްޖެކަމަށް ބުނެ ދުނިޔެއަަށް ތަޢުޒީޒު ކުރަން ހެޔޮވާނެހެއްޔެވެ. މިފަދަ ރިސޯޓުތައް ދިވެހި ޤައުމުގައި އެހާމެ ގިނައެވެ. އަދި މުސްތަޤުބަލުގައި ގިނަވުން ނޫން ގޮތެއް ނުވާނެއެވެ.

މި ރިސޯޓުތަކުގައި ހިނގަނީ ފަރަންޖީ ސައުދާގަރުންގެ ބާރެވެ. ބައެއް ފަހަރު އެ ސައުދާގަރުން އެ ރަށްތަކުގައި ނުވަތަ ރިސޯޓުތަކުގައި އެބައިމީހުންގެ އަމިއްލަ ވެރިކަމެއް ކުރާހެންވެސް މަޙުސޫސް ކުރެވޭނެއެވެ. އެތަންތަނުގައި ވަޒީފާ އަދާކުރާ ދިވެހީން ބައެއް ފަހަރަށް ތިބެން މިޖެނީ އެ ރިސޯޓުތަކުގައި މިނިވަންކަމެއް ނެތި އަޅުވެތިކަމެއްގައެވެ. އާދޭހެވެ! ދިވެހި ދީބުގައި، އަމިއްލަ ވަޒުނަގައި ބީރައްޓެހީންނަށް ވެފައެވެ. ދިވެހި ޤައުމުގައި، ދިވެހި އުންމަތުގައި ދިވެހީން ބިކަވެ، ފަރަންޖީ ސައުދާގަރުންގެ ހާދިމުންނަށް ވާން މިވަނީ މަޖުބޫރުވެފައެވެ.

އިންސާނީ އެންމެ ބޮޑު އެއް އަސާސީ ހިދުމަތަކީ ޞިއްޙީ ހިދުމަތެވެ. މިއަދު ދިވެހީން ޞިއްޙީ ހިދުމަތް ލިބިގަތުމުގައި "އާސަންދައިގެ" ފަސޭހައަކީ މޭރުން ކުރަން ދަތި އެހާމެ ޘަމީނު ހިދުމަތެކެވެ. މި ފަސޭހައާއި ލުއިކަން ދިވެހިން ލިބިގަންނަމުން ދަނީ ދަތި ހާލުގައެވެ. ފަރުވާ ހޯދުމަށް އެހާ ދަށްޗެވެ. ކިއު އެހާމެ ދިގެވެ. ހިދުމަތައް އެދި ގުޅުމުން ފޯނެއް ނެގެނީކީ ނޫނެވެ. ފޯނު ނެގުނުނަމަ ނަންބަރު ހުސްވެފައެވެ. އާދޭހެވެ! މިއީ ކޮންމެ ދުވަހަކު ދިވެހީން ތަހައްމަލު ކުރަމުންދާ ވޭނީ ކަންކަމެވެ. ނަމަވެސް ފައިސާ ހުރި ފަރަންޖީ ސައުދާގަރަކު ހިދުމަތަކަށް އެދޭނަމަ، އެކަމުގައި ލަހެއް ފަހެއް ނުވާނެއެވެ. ޤަބޫލުކުރަން ދަތި ނަމަވެސް މިއީ ކަންކަން ތަރުތީބުވެފައި ހުރި ގޮތެވެ.

ދިވެހި އަރުޟުގައި މެދުއުޑަށް އުފުލާ ހަސްފަތާލުތައް އިމާރާތްކޮށް، އެތަންތަނުގައި ދެވޭ ހިދުމަތް ހޯދުމަށް ދިވެއްސަކު ގޮސް އުޅެން މި ޖެހެނީ ބީރައްޓެއްސެއްގެ ގޮތުގައެވެ. ދިވެހިން ބަހެއް ބުނަން ދަންނަ މީހަކު ހިދުމަތުގައި އަމުދަކުން ނޫޅެއެވެ. ލިޔެކިޔުންތަކާއި އިރުޝާދު ކަރުދާސްވެސް ފަރަންޖީ ބަހުންނެވެ. ދިވެހިބަހަށް ތަރުޖަމާކުރުމަށް އެހީތެރިއަކު އިހްތިޔާރު ކުރާނަމަ އެއީ އަގުނެގޭ ހިދުމަތަކަށް ވެދާނޭ ހިސާބަށް މި ޤައުމުގައި ދިވެހީން ބީރައްޓެހި ވެއްޖެއެވެ.

ފަރަންޖީ މަސައްކަތްތެރީންނަކީ އަމުދުން މަދު ބައެއް ނޫނެވެ. އެކިއެކި ސިނާއަތް ތަކުގައި، ހާއްސަކޮށް އިމާރާތްކުރުމުގެ ސިނާއަތުގައި ފަރަންޖީ މަސައްކަތްތެރިން ގިނައެވެ. މިފަދަ އެކި ސިނާއަތްތަކާއި ވަޒީފާތަކުގައި ފަރަންޖީން ތިބުމުގެ ނަތީޖާއަކަށް ވަނީ ދިވެހި މަސަައްކަތް ތެރިޔާއަށް ދިވެހި ޤައުމުގައި ވަޒީފާނެތި ބީރައްޓެހިވާންޖެހުމެވެ.

މަތީ ތަޢުލީމު ދިނުމުގެ ނަމުގައި ފަރަންޖީ މޮޑިއުލް ތަކާއި ފަރަންޖީ ސިލަބަސްތައް ދިވެހި ކޮލެޖު ޔުނިވާސިޓީތަކުގައި ކިޔަވައިދެވެއެވެ. އަމިއްލަ މާދަރީ ބަހަކީ ބައެއް ކޯސްތަކުގައި ނުވެސް ދަންނަ ބަހަކަށް ވެ ނިމިއްޖެއެވެ. ދަސްކުރާ އެއްޗަކުން ނުވަތަ ކިޔަވާ ކިޔެވުމަކުން، އެމީހަކު ނުކުމެ މުޖުތަމައުގައި ހިދުމަތް ދޭން ތިބީ ދިވެހީންނެވެ. ނަމަވެސް ކިޔަވަމުން ދާއިރު ދިވެހި ބަހަކުން އެއްޗެއް ނުވަތަ ބަހެއްވެސް ބުނުމަކީ އަމުދުން ނުރުހެވޭ ކަމަކަށް މި ވަނީ ވެފައެވެ. އަމިއްލަ ޤައުމަށް އުފަން މޮޅެތި ކިތަންމެ ދަރީންނެއް ތިބިނަމަވެސް ތަޢުލީމީ ދާއިރާތަކަށް ބޭނުންވާ އަމިއްލަ ދިވެހިވަންތަ އޮނިގަނޑެއް އެކުލަވައެއް ނުލެވެއެވެ. ބައިނަލްއަގުވާމީ މިންގަނޑަށް ފެތެނީ ފަރަންޖީ އޮނިގަނޑުކަމަށް ވުމުން، އެ އޮނިގަނޑުގައި އަނދަގޮނޑިޖެހި ދިވެހި ދަރިވަރުން، ދިވެހި ކޮލެޖު ޔުނިވާސިޓީތަކުގައި ތިބެން މި ޖެހެނީ "ބީރައްޓެހީންގެ" ގޮތުގައެވެ.

ދިވެހި ޖައްވުގައި ދުވަމުން ދިޔަ ރީތި، ފިޔާތޮށި ފިނިފެންމަލުގެ ރާއިޢު ވަސް މިއަދު ކެނޑެން ފަށައިފިއެވެ. ދިވެހި ބަޚުރުގައި އިތުރު އެހެން ލޮނުރަހަތަކެއް ދޭން ފަށައިފިއެވެ. ދިވެހި ގޮނޑުދޮށްތަކުގައި ކަކުނި ނޫން އެއްޗެއް ގޮނޑުޖަހަން ފަށައިފިއެވެ. މިއީ ހައްތަހާވެސް ދިވެހިން ދިވެހި ޤައުމުގައި ބީރައްޓެހިވަމުންދާ ކަމުގެ ހެކިތަކެވެ.