2019 ވަނަ އަހަރުގެ ފަހުކޮޅު ޗައިނާގެ ވޫހާން އަވަށުން ފެނުނު ކޮރޯނާ ވައިރަސް މުޅިދުނިޔެއަށް ފެތުރި އެ ވައިރަހަށް މިދަނީ އެގޮތްމިގޮތް ވަމުންނެވެ. އެއާއި އެކު އޭގެ އެތައް އާ ވޭރިއަންޓުތަކެއް އުފެދި ދަނީ ފެތުރެމުންނެވެ. އެގޮތުން މީގެ ކުރިން ޑެލްޓާގެ ނަން ދީފައިވާ ވޭރިއަންޓެއްވެސް ވަނީ ވަރަށް ގަދަޔަށް މުޅި ދުނިޔޭގައި ފެތުރިފައެވެ. އޭގެފަހުން މިހާރު އޮމިކްރޯންގެ ނަމުން ނަންދީފައިވާ ވޭރިއަންޓުވެސް ދަނީ ހަލުއިކަމާއި އެކު ފެތުރެމުންނެވެ.

މި ފަހުން ފެނުނު ކޮވިޑް-19 ގެ އާ ވޭރިއެންޓް ކަމަށްވާ އޮމިކްރޯން ވޭރިއަންޓްގެ އަސަރު އެންމެ ބޮޑަށް ކޮށްފައިވަނީ ދެކުނު އެފްރިކާގެ ސަރަހައްދުތަކަށެވެ. ދިރާސާވެރިން ދެކިލައްވާގޮތުގައި މި އާ ވޭރިއަންޓުގައި ކުޑަކުދިންނަށް ކުރާ އަސަރު ބޮޑުވެއެވެ. އެގޮތުން އެ ސަހަރައްދުތަކުގެ ތަފާސް ހިސާބުތަކުން ދައްކާ ގޮތުގައި ކޮވިޑް-19 ޖެހިފައިވާ 5 އަހަރުން ދަށުގެ ތުއްތު ކުދިން ހޮސްޕިޓަލުގައި އެނދުމަތިކުރާ މިންވަރު މީގެ ކުރިއާއި އަޅާބަލާއިރު އިތުރެވެ.

ދެކުނު އެފްރިކާގެ އިސް މެޑިކަލް އެޑްވައިޒަރަކު ވިދާޅުވެފައިވަނީ އޮމިކްރޯން ވޭރިއަންޓްގެ ސަބަބުން އުމުރުން 5 އަހަރުން ދަށުގެ ގިނަ އަދަދެއްގެ ކުޑަކުދިން ހޮސްޕިޓަލުތަކުގައި އެނދުމަތިކުރާ މިންވަރު އާދަޔާ ހިލާފަށް އިތުރުވެފައިވާ ކަމަށެވެ. މީގެ އިތުރުން އޭނާ ވިދާޅުވެފައިވަނީ ޓްޝްވާނޭ މެޓްރޯ ސިޓީގައި، ދެ ހަފްތާ ތެރޭގައި ކޮވިޑާއި ގުޅިގެން 5 އަހަރުން ދަށުގެ 100 އަށް ވުރެ ގިނަ ކުދިން ހޮސްޕިޓަލުތަކުގައި އެނދުމަތި ކޮށްފައިވާ ކަމަށެވެ. މިއީ މީގެ ކުރީގެ އަދަދު ތަކާއި އަޅާ ބަލާއިރު ބޮޑު އަދަދެކެވެ.

އެގައުމުގެ ނެޝަނަލް އިންސްޓިޓިއުޓް ފޯ ކޮމިއުނިކަބަލް ޑިޒީޒަސް (އެން.އައި.ސީ.ޑީ) އިން އާންމުކުރި ތަފާސް ހިސާބުތަކުން ދައްކާ ގޮތުގައި، ޓްޝްވާނޭގައި އެޑްމިޓްކޮށްފައިވާ 452 މީހުންގެ ތެރޭގައި 2 އަހަރުން ދަށުގެ 52 ކުދިން ހިމެނެއެވެ.

ދެކުނު އެފްރިކާގެ ދިރާސީ ސައިންސްވެރިން ބުނާ ގޮތުގައި އޮމިކްރޯން ވޭރިއެންޓާއި، ތުއްތު ކުދިން ހޮސްޕިޓަލުގައި އެނދުމަތި ކުރާ މިންވަރު އިތުރުވުމާއި ގުޅުމެއް އޮތްކަމެއް އަދި ޔަގީން ކުރެވިފައެއް ނެތެވެ. ނަމަވެސް އެކަން ކަށަވަރުކޮށް ޔަގީން ކުރުމަށް ކުރަންޖެހޭ އިތުރު މަސައްކަތްތައް މިހާރުދަނީ ބާރު ދުވެލީގައި ކުރިއަށެވެ. މި ކުދިން ކޮވިޑަށް ފައްސިވެފައި ވާ އިރު، ފައްސި ނުވާ ކުދިންވެސް އެނދުމަތި ކުރެވިފައި އެބަތިއްބެވެ. އެހެންކަމުން މިއީ އެމިކްރޯން ވޭރިއަންޓުގެ ސީދާ އަސަރެއްކަން ބުނަން އެގައުމުގެ ސައިންސުވެރިންނަށް ވަނީ ދަތިވެފައެވެ.

މަޝްރަހު ދިރާސާކުރާ ފަރާތްތަކުން ލަފާ ކުރާ ގޮތުގައި ކޮވިޑުގެ އެކި ވޭރިއަންޓުތައް އުފެދެމުން ދާއިރު، މިހާރުވެސް ދުނިޔޭގައި އެތައް އާ ވޭރިއަންޓެއް އުޅޭނެއެވެ. ނަމަވެސް ސައިންސުވެރިންނަށް ހޯދާ ދެނެގަނެވެނީ އޭގެ ތެރެއިން ނުރައްކާ ބޮޑު ވޭރިއަންޓުތައް ކަމަށް ދިރާސާވެރިން ފާހަގަ ކުރައްވައެވެ. ހަމަ އެގޮތަށް ކުޑަކުދިންނަށް އަސަރު ކުރުވާ ކުޑަކުދިންނަށް ހާއްސަ ވޭރިއަންޓެއްވެސް އުޅެދާނޭ ކަމަށް ދިރާސާވެރިން ދެކިލައްވައެވެ. ދުނިޔޭގެ ގިނަ ގައުމުތަކުގައި ކޮވިޑުގެ ހާލަތު ރަނގަޅުވަމުން ދަނިކޮށް ކޮވިޑުގެ މި އާ ވޭރިއަންޓާއި އެކު ބައެއް ގައުމުތަކުގައި ވަނީ އަނެއްކާ ބިރުވެރިކަން ބޮޑުވެފައެވެ. އެއާއި އެކު ބައެއް ބޯޑަރުތައް އަނެއްކާވެސް ވަނީ ބަންދުކޮށްފައެވެ.