ތަރައްގީއާއި ތަހުޒީބު ދިވެހިން ދެކެންފެށިތާ އަދި މާ ގިނަ ދުވަހެއް ނުވެއެވެ. އެހެނަސް ތަރައްގީއާއި ތަހުޒީބުގައި ދިވެހިން މިވަނީ ހަރުފަތަކަށްފަހު ހަރުފަތެއް ގިރާކުރަމުން "ފުދޭވަރަކަށް" ކުރިއަރާ ގޮސްފައެވެ. އެގޮތުން ފަތުރުވެރިކަމަކީ މި ރާއްޖޭގެ ތަރައްގީގެ އެއް ނާރެހެވެ. 1972 ވަނަ އަހަރު ހުޅުވުނު ފުރަތަ ރިސޯޓާއި އެކު ހިނގަމުން ދިޔަ މި ފަތުރުވެރިކަން މިއަދު މިވަނީ މީހުން ދިރިއުޅޭ ރަށްތަކަށްވެސް ފޯރާފައެވެ. ލޯކަލް ޓޫރިޒަމް ތައާރަފުވެ ރަށްރަށުގައި ގެސްޓްހައުސްތައް ހެދި، އެތަންތަނުން ފަތުރުވެރިން މި ދަނީ ހިދުމަތް ހޯދަމުންނެވެ. މި ނިޒާމުން ތަރުތީބު ކުރެވި އަމަލުކުރަންފަށާ އަނެއް ހަރަކާތަކީ "ހޯމް ސްޓޭ" ގެ ފަތުރުވެރިކަމެވެ. މި ހަރަކާތް ވެގެން ގޮސްފައި މިވަނީ ބޮޑު ބަހުސަކަށެވެ. މި މައުޟޫއަށް މީސް މީޑިޔާގައި ދެކޮޅަށް އިންސާފު ކުރެވެމުން ދެއެވެ. މިއީ ދިވެހިންނަށް ލާބަ ވާނެ ކަމެއްތޯ ނުވަތަ ނޫންތޯ ސުވާލު އުފައްދަމުންނެވެ.

ހޯމް ސްޓޭ ފަތުރުވެރިކަމަކީ ރަށްރަށުގައި މީހުން ދިރިއުޅޭ ގޭގައި އެގޭގެ އަހުލުންނާއި އެކު ފަތުރުވެރިން ބައިތިއްބާ ނިޒާމެކެވެ. ގޭގައި ހުންނަ ހުސް ކޮޓަރީގައި ފަތުރުވެރިޔާ ނިންދަވާ މެހެމާންދާރީ އަދާ ކުރާ އުސޫލެކެވެ. ގިނަބަޔަކު ގަބޫލުކުރާ ގޮތުގައި މިއީ ގެސްޓް ހައުސް ހެދުމުގެ ތަނަވަސްކަން ނެތް ފަރާތްތަކަށް މި ސިނާއަތުގައި ކުރިއަށް ދިއުމަށް އޮތް ފަހި ފުރުސަތެކެވެ. މިއީ އެ ތަނަވަސްކަން ނެތް މީހުންނަށް އަބުރުވެރި ދިރިއުޅުމެއް އުޅެވޭނޭ މަގު ތަނަވަސްކޮށްދޭނޭ ކަމެކެވެ. ރަށްރަށުގައި ކުދި ވިޔަފާރިތައް ފުޅާވެ އިތުރުވާނޭ ކަމެކެވެ. ރަށްރަށުގެ ތެރޭގައި ފައިސާ ދައުރުވެ، އެ ރަށްރަށުގެ އިގްތިސާދު ކުރިއަރާ އެރަށްރަށުގެ ރަށްޔިތުންގެ ދިރިއުޅުމުގެ ފެންވަރު އިތުރުކޮށްދޭނޭ ކަމެކެވެ. ކޮންމެއަކަސް މިއީ މާލީ ގޮތުން ތަނަވަސްކަމާއި އިގުތިސާދީ ފުދުންތެރިކަން އިތުރުކޮށްދޭ ކަމެކެވެ. މިއީ މިކަމަށް ތާއިދުކުރާ ފަރާތްތަކުން ދައްކާ ވާހަކައެވެ.

ހޯމް ސްޓޭގެ މި ސިޔާސަތާއި ދެކޮޅަށް ވާހަކަ ދައްކާ ފަރާތްތަކުން ފާހަގަ ކުރަނީ މިއީ ދުރާލާ ރާވައިގެން ދިވެހި ރާއްޖެއިން އިސްލާމީ ރިވެތި އުސޫލުތަކާއި ދުރޫސުލް އަހުލާގު ފޮހެލުމަށް ބަޔަކު އިންތިޒާމު ކުރާ "އެޖެންޑާ" އެކެވެ. އަދި މިއީ ބަނަ ވިލާގަނޑެއްގެ ގޮތުގައި ވެސް ސިފަކޮށް މީސްމީޑިޔާގައި ބަހުސްކުރާތީ ފެނެއެވެ. އާދޭހެވެ! ފަތުރުވެރިންގެ ގޮތުގައި ގިނައިން އަންނަނީ ޣައިރު މުސްލިމުންނެވެ. އެބައިމީހުންނަކީ އިސްލާމް ދީނުގެ އުސޫލުތަކާއި ހަމަތައް ދަންނާނޭ ބައެއް ނޫނެވެ. އެބައިމީހުން ދިވެހި ގޭތަކުގައި ދިވެހި އާއިލާތަކާއި އެކު އުޅޭ އިރު އެމީހުންގެ ފުށުން އިސްލާމްދީނާއި ބީރައްޓެހި އެތައް ކަމެއް ފެންނާނެއެވެ. މިއީ މީގެ ސަބަބުން ދިވެހިންގެ ޅަ ކުދިންނާއި ދިވެހިންގެ އަގީދާއަށް ބުރޫ އަރަން ފަށާނޭ ކަމެކެވެ. މިއީ ދުރުމުސްތަގުބަލުގައި ދިވެހިން ދީނާއި ދުރުކޮށްދީފާނޭ ކަންކަމެވެ. ފަތުރުވެރިންނަކީ "ދެފޮތިކޮޅުގައި" އަރިތިމަތި ތަކުގައި ވަގުތު ހޭދަކުރަން ލޯބި ކުރާ ބައެކެވެ. އެހެންކަމުން މިއީ އިސްލާމީ ދިވެހި މުޖުތަމައެއްގައި އާންމުކޮށް ފެނިގެންވާނޭ މަންޒަރު ތަކެއް ނޫނެވެ. މިއީ އޭގެ ސަބަބުން އިސްލާމީ މުޖުތަމެއްގައި އޮންނަ ލަދުވެތިކަމުގެ ސިފަ ކެނޑިގެން ހިނގައިދާނޭ ކަމެކެވެ. މިއީ ހޯމް ސްޓޭގެ ސިޔާސަތާއި ދެކޮޅަށް ޝުއޫރު ފާޅު ކުރާ ފަރާތްތަކުން ފާހަގަ ކުރާ ބިރުވެރި ކަންތައްތަކެވެ.

ކޮންމެ ކަމަކީވެސް އެކަމެއްގައި ހެވާއި ގެއްލުން އެކުލެވިގެންވާނޭ ކަމަކެވެ. އޭގައި ހިފާނޭ ކޮޅެއް ނުވަތަ ގޮތެއް ނިންމާނީ އެކަމެއް ކުރާ ބައެކެވެ. ހޯމް ސްޓޭ އަކީވެސް އެފަދަ ކަމެކެވެ. އީމާންތެރިކަމާއި ހިތްވަރު ގަދަ ބަޔަކު މިކަމުގައި މަގުން އެއްކިބާވެގެން ނުދާނެއެވެ. ނަމަވެސް ހަރުދަނާ ކަމާއި ދީނީ ލޯބި ހިތުގައި ކުޑަ ބައެއްނަމަ މިއީ މަގުގެއްލުމުގެ ފުރުސަތު އޮތްކަމެކެވެ. މިކަމުގައި ނުވަތަ މި ބަހުސްގައި ގޮތެއް ނިންމުމަކީ އެމީހެއްގެ އަމިއްލަ ކަމެކެވެ.